Amăng tal nao čuă jơmư gưl kơnuk kơna pơ dêh čar Khač, tlam tom brơi, lơ 19/8, ƀơi sang jum tuai Điếu Ngư Đài, plơi prong jưh jom Bắc Kinh, Khua git gai ping gah, Khua mir sir ơi Tô Lâm hơmâo bưp Khua dêh čar Khač ơi Lý Cường. Ƀơi mông bưp bơ ră ruai, Khua git gai ping gah, Khua mir sir ơi Tô Lâm lăi pơtong Việt Nam lăng kơ bruă pơđĭ kyar giăng mah hăng dêh čar jĕ giăm ieo gah mơak klă đôč, hơdai gum hrŏm hlom bom hăng dêh čar Khač, sa jơlan hơdră mă bruă yôm, sa hnơ̆ng, đing nao hlâo hloh amăng jơlan hơdră pơtom hiăp rơngai, ngă pô, ăt gum hrŏm lu bơnah, lu hơdră mơ̆ng Việt Nam hlăk ngă tui.

Khua dêh čar Khač ơi Lý Cường rơkâo kơ dua bơnah ăt kơtưn pơkjăp tui tơlơi giăng mah pŭ ƀăn hăng dêh čar jĕ giăm ha mơguai, pơtrut bruă bưp nao rai mơnuih ƀôn sang hăng djop gưl ƀing hlăk ai tơdăm dra dua bơnah; pok pơhai lu bruă mă bơwih brơi tơlơi hơdip mơda kơ mơnuih ƀôn sang hăng ngă hrŏm bruă pơtô hrăm bruă mă, pơđĭ tui klă tơlơi gơgrong mơ̆ng Bruă ngă giăng mah phun dua bơnah Khač hăng Việt Nam; lăi pơtong bruă mă pok pơhai lu bơnah tơpă hăng ngă pô ăt pok pơhư prong, amra gum hrŏm sit jơnum lu dêh čar. Dua bơnah hơmâo pơčrong sai hơdôm tơlơi hơmâo ƀơi jar kmar, amăng kual mơ̆ hlăk đing nao, tŭ ư hrŏm wai lăng hăng pơsir hĭ hơdôm tơlơi aka ƀu tŭ ư nao rai, kiăng pơgang tơlơi rơngai hơđong ƀơi kual ia rơsĭ, ngă kjăp anih hyu wai lăng pơđĭ kyar kơ rim bơnah dêh čar.