Lơ 19/8, ƀơi Sang jơnum prong Mơnuih ƀôn sang, plơi prong jưh jom Bắc Kinh, Khač, amăng tal nao čuă gưl Kơnuk kơna pơ dêh čar Khač tui tơlơi jak iâu mơng Khua git gai Ping gah, Khua mir sir dêh čar Khač ơi Tập Cận Bình, Khua git gai Ping gah, Khua mir sir ơi Tô Lâm hơmâo mông bưp Ding kơna Ding jum kơđi čar Ping gah Cộng sản Khač, Khua Jơnum min djop djuai ania mơnuih mơnam dêh čar Khač ơi Vương Hộ Ninh. Khua git gai Ping gah, Khua mir sir ơi Tô Lâm lăi pơtong Ping gah hăng Kơnuk kơna dêh čar Việt Nam đing nao biă mă kơ bruă hơkrŭ hăng pơđĭ kyar tơlơi rô nao rai hăng Ping gah, kơnuk kơna Khač, lăng anai lĕ bruă yôm phăn, kiăng đing nao blung a amăng hơdră pơtom hiăp; Việt Nam lêng kơ tui hơdră “sa dêh čar Khač”, dong yua dêh čar Khač pơđĭ kyar prong kơtang, tŏ tui hơdrưh amăng pơgang rơnuk rơnua, ngă hrŏm hăng pơđĭ kyar amăng kual hăng jar kmar.

Tŭ ư hăng tơlơi čang rơmang laih dong tơlơi rơkâo ngă hrŏm mơng Khua git gai Ping gah, Khua mir sir ơi Tô Lâm, Khua Jơnum min djop djuai ania mơnuih mơnam Khač ơi Vương Hộ Ninh brơi thâo, dêh čar Khač čang rơmang hăng amra pơtrut pơbưp nao rai amăng djop plang, djop gưl kơplah wah dua bơnah; pơtrut ngă hrŏm sit nik amăng djop mơta bruă, ngă tui tơlơi gơgrong git gai gum hrŏm abih bang mơng Jơnum min git gai ngă hrŏm kơplah wah dêh čar Khač-Việt Nam.