Jao hră pơsit hăng đĭ pơhiăp ƀơi mông jơnum, Khua git gai ping gah, Khua mir sir ơi Tô Lâm bơni kơ ƀing khua mua dưi hơmâo Ding jum kơđi čar pơpha bruă, ruah ngă khua phrâo: Ơi Trần Lưu Quang ngă khua Anom bơwih ƀong gơnong dlông hăng ơi Mai Văn Chính ngă Khua anom pơtô mơnuih ƀôn sang gơnong dlông ping gah dêh čar. Khua git gai ping gah, Khua mir sir ơi Tô Lâm lăi pơtong, ơi Trần Lưu Quang hăng ơi Mai Văn Chính lêng kơ mơnuih ngă khua, hơmâo hrăm bruă djơ̆ tơhnal pơkă, dưi đĭ bruă mơ̆ng kual gah yŭ, găn rơgao lu bruă mă, tơlơi thâo thăi amăng bruă mă, mut hrăm lu anih pơtô kơ ƀing khua mua pơ gơnong dlông, hơmâo tơlơi thâo hruaih amăng bruă mă sit nik hăng thâo tong ten amăng bruă git gai wai lăng, pơčrâo bruă, ba glăi boh tơhnal lu amăng bruă gơñu git gai.

Pơhiăp đĭ tơdơi kơ tŭ mă bruă ngă khua phrâo, ơi Trần Lưu Quang hăng ơi Mai Văn Chính lăi, anai lĕ tơlơi mơak prong hing ang kơ drơi jăn pô samơ̆ ăt sa bruă mă glăm ba prong mơ̆n, kiăng hrŏm hăng abih bang ƀing ngă bruă hrŏm gir run hloh kiăng ngă giong bruă jao hlâo kơ jơnum prong ruah khua ping gah dêh čar ral XIV. Ơi Trần Lưu Quang hăng Mai Văn Chính čang rơmang, hăng bruă mă phrâo jing Khua anom bơwih ƀong gơnong dlông hăng Khua anom pơtô mơnuih ƀôn sang gơnong dlông amra tŭ mă tơlơi jao mơ̆ng Ping gah, Kơnuk kơna, Khua mua djop anom bruă ping gah ƀơi gơnong dlông, djru ba, ngă hrŏm tong ten kiăng hrŏm hăng abih bang anom bruă ngă pơgiong hiam klă bruă jao amăng anih phrâo.