Pơhiăp ƀơi mông mă bruă, Khua git gai ping gah ơi Tô Lâm brơi thâo, ƀơi hơdôm tơring čar hơmâo ngă hră pơtrun pơkă rơnoh yua lŏn pơmă biă mă, ba truh rơnoh duh glăi pơklaih ala lŏn či čuk jơlan tuh pơ alin bruă čar yom đơi, ngă kơ bruă sĭ mơdrô lŏn đang ăt đĭ tui hăng ba truh lu tơlơi sat pơkŏn nao hrŏm.

Tui hăng tơlơi anai, Khua git gai ping gah ơi Tô Lâm lăi rơđah tơlơi kiăng, tui hăng tơlơi phiăn pơkă mă yua djơ̆ rơnoh yom mơ̆ng lŏn mơnai, anăp nao pơkă rơnoh lŏn mơnai djơ̆ lăp, bơkơnar, tŭ yua, huăi ngă huač soh sel, biă mă ñu ƀing ngă gơ̆p pơgang anŏ tŭ yua hơjăn păn gơñu. Yua kơ lŏn mơnai lĕ kông ngăn prong, anŏ pioh pơkra ming mă bruă bơwih ƀong huă, anai ăt jing tơlơi pơmin sa hơnơ̆ng kiăng abih bang amăng ping gah hăng kơnuk kơna ta ngă tui djơ̆. Khua git gai ping gah ăt lăi, tơlơi kiăng prong hloh hăng jơlan hơdră yom amăng tơlơi phiăn Lŏn mơnai čih pơhrua, kiăng pơkă lăng abih bang pơdjơ̆ nao rơnoh duh jia, sang dŏ, sĭ mơdrô gơnam prong, pơkă lŏn anih mă kông ngăn amăng lŏn.