Tlam lơ 27/8, ƀơi Hà Nội, jơnum ngă yang hơdor glăi 80 thun hrơi akŏ pơdong anom bruă Ding jum bruă čar hăng jơnum kơ bruă bơkơtưn khăp kơ lŏn ia tal I, kiăng hơdor glăi čăl ngă bruă hmư̆ hing laih anun hơdor tơngia kơ djop rơnuk gưl khua mua, mơnuih apăn bruă ding jum bruă čar, ngă kơjăp yak nao amăng rơnuk pơblih phrâo hrưn đĭ ngă bruă pơyơr pran jua yua sa boh dêh čar Việt Nam khin hơtai kơjăp phik. Pơ ala kơ khul khua mua ping gah, kơnuk kơna lŏn ia pơpŭ bơni jao Miđai mă bruă mrô Sa kơ Ding jum bruă čar.

Khua git gai ping gah ơi Tô Lâm lăi pơtong, mah amăng čăl pơpă hai, rơnuk blah wang ƀudah rơnuk rơngai lŏn ia, hlăk man pơdong ƀudah hlăk pơblih phrâo-anom bruă bơwih brơi bruă čar jing khul tơhan ngă bruă tong ten, hur har, thâo pơčeh phrâo, djru hrŏm akŏ pơdong atur bruă git gai wai lăng dêh čar laih anun djru ba tơlơi bơwih ƀong huă hơdip mơda kơ mơnuih mơnam.

Khua git gai ping gah pơtrun hiăp abih bang khua mua, mơnuih apăn bruă amăng Ding jum bruă čar khom djă kơjăp tơlơi gơgrong ba phun amăng bruă lăi pơthâo hăng ngă tui jơlan hơdră djru kơ mơnuih mơnam dêh čar dưi hlom bom, djop djel, tŭ yua; pơblih phrâo dơlăm hloh amăng bruă bơkơtưn mă bruă-apah bơni kiăng pơjing rai hơdôm bruă mă bơkơtưn lu hloh, hơmâo pran kơtang, tơgŭ mă bruă tui anŏ kiăng pơyơr lu hloh amăng rơnuk lŏn ia hrưn đĭ pơblih phrâo; biă mă ñu kơsung nao hlâo pơblih yua ia rơgơi mrô, pơblih hơdră ngă hră pơar, jing bruă mă ba gru amăng glông bruă đơ đam dêh čar.