Mông livestream hơmâo pơphun hăng tơlơi gum hrŏm mơng anom bơwih ƀong hrŏm Ngă hmua hơdjă Krông Pač, mơnuih ngă hmua, ƀing hlăk ai amăng ƀon lan hrŏm hăng sa, dua anom bơwih ƀong sĭ mơdrô djru logistics hăng pơdŭ pơgiăng gơnam. Jơlan hơdră hơmâo pơdah pơƀuh amăng lu plang mơnuih mơnam. Pơhiăp amăng mông livestream, Khua git gai Ping gah să Ea Knuêc yă Ngô Thị Minh Trinh lăi pơtong:

“Hơnong pơkă mơng mông livestream anai ƀu djơ̆ kơnong dŏ glăi ƀơi bruă sĭ hơdôm tơ̆n boh sầu riêng đôč ôh, mơ̆ tơlơi yôm ƀiă dong lĕ lăi pơthâo rup rap, gơnam yôm phara mơng plơi pla; pơsur neh met wa mut hrŏm amăng pơplih yua boh thâo phrâo, mơng bruă hrăm tui sĭ mơdrô gơnam mơng ataih truh pơ lăi pơthâo gru grua ƀon lan; laih dong pơƀuh gơnam đang hmua hiam hơdjă ƀơi Dak Lak brơi abih bang”.

Hrŏm hăng tơlơi mut hrŏm mơng Khua git gai Ping gah să, sa dua čô mơnuih amăng ƀon lan ăt mut hrŏm lăi pơthâo gơnam tam. Yă Hoàng Thị Nguyên, 70 thun, dŏ hơdip amăng plơi Tân Sơn, să Ea Knuêc hok mơ-ak brơi thâo, lơm tal blung a ñu djă micro lăi pơthâo gơnam tam mơng plơi pla amăng glông pơlăng nao rai ƀơi anăp:

“Hơmâo Ping gah să, khua git gai Ping gah hăng wŏt hơdôm gơnong bruă amăng să ăt hơmâo jơlan hơdră, mah 70 thun samơ̆ kâo ăt gir run gum hrŏm kiăng ƀing ană tơčô hok mơ-ak, amăng sang anŏ kiăng gir run ngă hiưm pă pla brơi lu sầu riêng pioh sĭ pơ tač rơngiao hăng kâo ăt pơ-ư ang kơ ană tơčô amăng sang anŏ, tơlơi anai ngă pran jua yâo mơ-ak”.

Hăng mơnuih ƀôn sang, bruă gong gai ƀôn lan ƀu djơ̆ kơnong gum hrŏm hăng tơlơi pơtrun ƀudah ngă hră pơ-ar đôč ôh mơ̆ ăt wŏt bruă mă tong ten, hơmâo ba mơnuih apăn bruă giăm mơnuih ƀôn sang. Bruă khua mua să hrŏm hăng neh met wa ƀuh ƀô̆ amăng plang mơnuih mơnam lĕ bruă mă sit nik kiăng ngă lar hyu pran pơplih pơčeh phrâo, laih dong hơkrŭ pran đăo gơnang kơplah wah mơnuih ƀôn sang hăng gong gai. Ơi Mai Đình Thọ, Khua anom bơwih ƀong hrŏm Ngă hmua hơdjă Krông Pač lăng yôm tơlơi pơčeh anai:

“Tơlơi yôm hơmâo sa čô khua git gai Ping gah să mut hrŏm ƀu djơ̆ kơnong amăng bruă git gai wai lăng ƀơi ƀon lan đôč ôh ăt wŏt tơlơi đing nao bruă djru brơi neh met wa hluai tui bruă sĭ gơnam online. Bruă mă anai djru brơi mơnuih ngă hmua ngă kiăo tui tơlơi pơplih phrâo, hrưn đĭ rơnoh yôm mơng gơnam đang hmua hăng ba glăi tŭ yua sit nik amăng bơwih ƀong huă. Kâo pơmĭn sa čô khua git gai Ping gah tui anai amra ngă jê̆ giăm, tơlơi gum hrŏm mơnuih ngă hmua kiăng ĕp hơdră klă hloh brơi neh met wa, đing nao hơdôm tơlơi sit nik amăng tơlơi hơdip mơda kơ mơnuih ƀôn sang”.

Mông livestream pơhưč hơdôm rơbâo wŏt mơnuih mut lăng hăng lu mơnuih rơkâo blơi gơnam. Ƀu djơ̆ kơnong djru sĭ gơnam đang hmua, tơlơi anai ăt djru brơi neh met wa ƀuh hăng hrăm tui bruă lăi pơthâo gơnam tam amăng plang internet, pơjing tơlơi juăt pơkra pơjing-sĭ mơdrô pơlir hăng anih anom blơi mut phrâo.

Bruă khua git gai Ping gah să Ea Knuêc, tơring čar Dak Lak mut livestream sĭ boh sầu riêng ră anai lăng yôm biă, jing tơlơi yak nao ngă tui tơlơi pơtrun mrô 57-NQ/TW kơ pơtrut yua boh thâo phrâo hăng pơplih mrô, laih dong pơdah tơlơi ƀuăn “Jê̆ giăm mơnuih ƀôn sang” hăng bruă mă sit nik mơng khua mua ƀon lan lơm pok pơhai gong gai 2 gưl./.