Bruă Khua git gai pơ ala mơnuih ƀôn sang dêh čar ơi Trần Thanh Mẫn nao Jơnum khul pơlir hơbit AIPA-46 pơsit tong jơlan gah pơtom hiăp rơngai, ngă pô, rơnuk rơnua, ngă hrŏm hăng pơđĭ kyar, djop bơnah, djop mơta mơng Việt Nam; tŏ tui ba tơlơi rô nao rai jai dơlăm tui. Amăng tal nao čuă anai, Khua git gai pơ ala mơnuih ƀôn sang dêh čar ơi Trần Thanh Mẫn hơmâo lu mông jơnum bơkơtuai, mông pơbưp yôm hăng Khua git gai pơ ala mơnuih ƀôn sang gơnong glông dêh čar Malaysia, Khua git gai pơ ala mơnuih ƀôn sang gơnong yŭ dêh čar Malaysia hăng ƀing khua mua pơprong pơkŏn ƀơi Malaysia.

Anai lĕ hrơi mông kiăng dua bơnah tŏ tui hơkrŭ pran đăo gơnang yôm phăn, pok rai bruă ngă hrŏm kơplah wah Ƀirô Khua pơ ala mơnuih ƀôn sang dua bơnah. Tơdơi kơ nao truh pơ Malaysia, Khua git gai pơ ala mơnuih ƀôn sang dêh čar ơi Trần Thanh Mẫn hăng bơnai ñu hrŏm hăng khua mua pơprong dêh čar ta nao čuă hăng bưp ƀing apăn bruă, mơnuih mă bruă ƀơi Sang anih jưh pơ ala dêh čar Việt Nam ƀơi Malaysia, ƀing pơ ala mơnuih ƀôn sang Việt Nam ƀơi Malaysia.