Pơhiăp amăng mông ngă Lơphet lăi pơthâo, jao tơlơi pơsit bơni hăng pok phun bruă bơkơtưn thun 2025 amăng čơtlăm mơmot lơ 13/2, Khua git gai pơ ala mơnuih ƀôn sang dêh čar ơi Trần Thanh Mẫn rơkâo pơplih phrâo kơtang dong tơlơi pơmin, bruă mă, pơđĭ tơlơi thâo, pơplih phrâo pơphun bruă Khua pơ ala mơnuih ƀôn sang dêh čar hloh dong, djơ̆ tui tơlơi čang rơmang, dô̆ tơguan mơ̆ng Ping gah, mơnuih pơ ala hăng mơnuih ƀôn sang.

Pơ ala kơ khua git gai Ping gah, Kơnuk kơna Khua git gai pơ ala mơnuih ƀôn sang dêh čar ơi Trần Thanh Mẫn jao laih Miđai mă bruă Dăp Tal Sa kơ Kơ-iăng Khua hơđăp Jơnum min hơdôm tơlơi mơnuih mơnam mơ̆ng Khua pơ ala mơnuih ƀôn sang, Kơ-iăng Khua hơđăp Grŭp mă bruă mơnuih ƀôn sang gah Jơnum min apăn bruă Khua pơ ala mơnuih ƀôn sang dêh čar yă Lê Thị Nguyệt; jao Ƀăng bơni mơ̆ng Jơnum min apăn bruă Khua pơ ala mơnuih ƀôn sang kơ 15 grŭp. Khua git gai pơ ala mơnuih ƀôn sang dêh čar ơi Trần Thanh Mẫn lăi rơđah, anai lĕ thun blung a, Jơnum min apăn bruă Khua pơ ala mơnuih ƀôn sang dêh čar pok pơhai bruă bơkơtưn, apah bơni na nao ƀơi hơdôm bôh ƀirô mơ̆ng Khua pơ ala mơnuih ƀôn sang tui Tơlơi phiăn bơkơtưn, apah bơni. Ding jum kơđi čar hmâo mă yua Tơlơi črâo ba mrô 41 kơ kơtưn tơlơi git gai mơ̆ng Ping gah pioh kơ bruă bơkơtưn, apah bơni amăng rơnuk phrâo. Khua git gai pơ ala mơnuih ƀon sang dêh čar rơkâo khom lăi pơthâo abih pran jua črâo ba pioh pok phun tal bơkơtưn sit nik hơdor glăi 100 thun pơdŏng Ping gah hăng 100 thun pơdŏng Lŏn ia./.