Amăng rơwang tal nao čuă dêh čar Nga, ƀơi ƀirô mă bruă Khua anih jưh pơ ala kơ Việt Nam, pơ̆ plơi prong jưh jom Moscow, Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn hăng Grŭp khua pơ ala gưl dlông Khua pơ ala mơnuih ƀôn sang dêh čar Việt Nam hmâo pơbưp laih, ră ruai hăng mơnuih apăn bruă, mơnuih mă bruă Anih jưh pơ ala hăng pô pơ ala kơ mơnuih Việt Nam ƀơi dêh čar Nga.

Ră ruai hăng mơnuih Việt Nam ƀơi dêh čar Nga, Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn hmâo lăi pơhing kơ tơlơi kơđi čar, bơwih ƀong, mơnuih mơnam mơ̆ng lŏn ia. Khua pơ ala mơnuih ƀôn sang dêh čar ta bơni pran jua gum hrŏm hơbit mơ̆ng mơnuih Việt Nam ƀơi dêh čar Nga, hăng 60.000 čô mơnuih mă bruă amăng lu bruă kah hăng pơhrăm bruă, hyu mă bruă, mă bruă, bơwih ƀong huă, sĭ mơdrô hăng pơdŏng pơjing pran gum hrŏm hơbit. Khua git gai wai lăng pơ ala mơnuih ƀôn sang dêh čar ta pơtŏng sit, hơdră bruă ha sa mơ̆ng Ping gah hăng Kơnuk kơna ta lăng ba na nao hăng lăng mơnuih Việt Nam pơ̆ dêh čar arăng lĕ sa khul ƀu čơlah, jing khul mơnuih mơ̆ng djuai ania hăng bôh than yôm phăn djru kơjăp tui tơlơi rô nao rai gum hrŏm, giăng mah kơplah wah Việt Nam hăng hơdôm bôh dêh čar./.