Tlam lơ 10.9, ƀơi Sang bruă mir sir, Khua mir sir ơi Lương Cường hăng Bơnai ñu hơmâo pơphun jơnum čơkă lơphet prong hăng Khua Lŏn ia Australia, yă Sam Mostyn hăng rơkơi ñu rai čuă jơmư gưl kơnuk kơna pơ Việt Nam. Giong ngă yang jơnum čơkă jum anun, Khua mir sir ơi Lương Cường hơmâo bơkơtuai mơtam hăng yă Sam Mostyn Khua Lŏn ia Australia. Dua bơnah lăi lĕ, bruă pơđĭ tui tơlơi ngă giăng mah, bơnah hlom bom hloh tui tơlơi pơkôl blan 3/2024 lĕ sa gru kơđŏm pioh, ba tơlơi ngă giăng mah dua bơnah pơđĭ kyar kơtang. Dua bơnah lŏn ia lĕ bơnah ngă hrŏm sĭ mơdrô prong tơdruă, prăk pơhrui glăi sĭ mơdrô rơbêh 14 klai USD thun 2024, mrô tuai čuă ngui ƀơi dua bơnah lêng kơ đi na nao rim thun. Djop sang bruă mơdrô mơ̆ng Australia hlăk ngă gêh găl pioh tuh pơ alin pơđĭ kyar bơwih ƀong huă ƀơi Việt Nam.

Việt Nam ăt jing bơnah djru gêh găl brơi Australia pơtruh nao rai amăng kual Dơnung Ngŏ ASIA, pơtrut tơlơi rô nao rai hlom bom plah wah Australia hăng ASEAN laih anun bruă ngă hrŏm tŭ yua sit nik Australia hăng hơdôm dêh čar ter hang ia krông Mekong. Khua Lŏn ia Australia lăng yom tơlơi pơgôp hrŏm mơ̆ng khul mơnuih năng ai 350.000 čô Việt Nam dŏ ƀơi Australia, giăm 40.000 čô čơđai sang hră gưl prong Việt Nam dŏ hrăm hră, kơsem min ƀơi Australia; lăi pơtong tơlơi rô nao rai mơnuih ƀôn sang dua bơnah jing atur ngă kơjăp tơlơi giăng mah dua bơnah.

Dua bơnah tŭ ư pok pơhai kơtang amăng bruă djru hơdai gum hrŏm pơđĭ kyar bơwih ƀong huă, anăp nao tơhnal pơkă prăk sĭ mơdrô pơhrui glăi truh 20 klai USD hăng đĭ hloh dua wơ̆t tuh pơ alin dua bơnah amăng hơdôm thun pơ anăp.

Australia ăt pơtrut ngă hrŏm tong ten, dong yua tơlơi kiăng mơ̆ng Việt Nam hăng ASEAN amăng bruă pơhlom tơlơi rơnuk rơnua, hơđong laih anun rô nao rai rơngai ƀơi ia rơsĭ, adai rơngit kual ia rơsĭ Ngŏ; pơsir tơlơi bơrơsua nao rai guai ia rơsĭ hăng hơdră rơnuk rơnua, khom pơpŭ tơlơi phiăn jar kmar.