Tlam mơmŏt lơ 3/9, ƀơi Bắc Kinh, dêh čar Khač, pơđut mông jơnum, bưp nao rai lu bơnah, dua bơnah, Khua mir sir dêh čar ta ơi Lương Cường hơmâo mông bưp hăng khua mir sir dêh čar Nga, ơi Vladimir Putin.

Khua mir sir lăi pơtong Việt Nam lăng bruă ngă giăng mah hăng Nga, dong yua Nga pơđĭ kyar hơđong, kơjăp laih anun ngă pô gơgrong ba yom amăng jar kmar, amra djru pơtrut tui bruă rô nao rai plah Nga hăng ASEAN.

Khua mir sir lăi pơtong, Việt Nam bơni kơ hơdôm anom bruă mơdrô mơ̆ng dêh čar Nga tuh pơ alin amăng anih tuh tia pơkra ming sa ƀut, ngă hrŏm pơkra rai ia jrao, ba yua boh thâo ia rơgơi mrô....Dua bơnah khua mua bơtŭ ư ngă kơjăp tơlơi rô nao rai kơđi čar-pơtom hiăp, pơđĭ kyar tŭ yua hloh djop mơta tơlơi hơmâo kĭ pơkôl amăng tal khua mir sir dêh čar Nga ơi Putin čuă Việt Nam blan 6/2024 hăng tal nao čuă dêh čar Nga mơ̆ng Khua git gai ping gah ơi Tô Lâm blan 5/2025; laih dơ̆ng kơtưn bruă ngă pơblih nao rai khua mua pơprong mă bruă čuă jơmư trư găn nao rai. Dua bơnah lăi pơtong, tơlơi kiăng ngă hrŏm khut khăt pơđĭ tui bruă  bơwih ƀong huă-sĭ mơdrô, tuh pơ alin, lăp hăng tơlơi ngă giăng mah kơđi čar hiam klă laih anun anŏ gêh găl prong mơ̆ng rim boh dêh čar.