Tal čuă jơmư anai hơmâo pơphun amăng hrơi mông dua bơnah phrâo pơđĭ tui tơlơi rô nao rai Ngă gŏp yôm amăng abih bang bruă amăng thun 2024. Tal rai čuă anai pơƀuh jơlan hơdră pơtom hiăp mơ̆ng Australia lăng yôm hăng djru ngă hlâo kơ bruă pơđĭ kyar tơlơi rô nao rai hăng kual Ngŏ dơnung ASIA, amăng anun hơmâo Việt Nam.

Gah dêh čar Việt Nam, bruă čơkă Khua pơ ala Kơnuk kơna Australia rai čuă djru pok pơhai jơlan hơdră pơtom hiăp mơ̆ng Ping gah hăng Kơnuk kơna, lăng yôm tơlơi rô nao rai hăng hơdôm boh dêh čar kual Dơnung Thái Bình Dương, biă ñu lĕ Australia. Ră anai Australia jing gŏp ngă hrŏm sĭ mơdrô prong tal 7 mơ̆ng Việt Nam hăng Việt Nam jing gŏp ngă hrŏm yôm dong tal 10 mơ̆ng Australia. Prăk sĭ mơdrô dua bơnah đĭ hơđong, hơmâo rơbêh 14 klai dolar Mi amăng thun 2024. Dua bơnah ăt gir pok bah amăng anih sĭ mơdrô kơ gơnam mơ̆ng hmua dua bơnah. Tal rai čuă gưl Kơnuk kơna pơ Việt Nam mơ̆ng Khua pơ ala Kơnuk kơna Australia yă Sam Mostyn amra hơmâo hơkrŭ kjăp hăng pơđĭ tui tơlơi đăo kơnang nao rai, gum pơgôp amăng tơlơi rơngai, hơđong hăng đĭ kyar amăng kual./.