Amăng bơyan hơjan hlim, thiếu tá Nguyễn Phúc Thuận (Puih kơđông tơhan pơgang guai Dak Lao), glăk črâo brơi neh met wa amăng plơi Dak Thọ, să Dak Lao, tơring glông Dak Mil, tơring čar Dak Nông kơ bruă pla kơphê. Mơng hrơi arăng jao glăi djru bruă hrŏm hăng Ping gah plơi Dak Thọ, ñu lêng kơ gum hrŏm neh met wa amăng bơwih ƀong huă, ngă hiưm pă ƀơƀrư̆ hrưn đĭ tơlơi hơdip kơ neh met wa kual giăm guai.

“Kiăng pơhlôm brơi anah phun pla, hlô rông lăp djơ̆, kâo juăt pel ĕp, gum hrŏm hăng khul ngă hmua să, tơring glông kơsem min hơdôm anah phun pla lăp djơ̆ kiăng črâo brơi neh met wa pla. Jak iâu ƀing čơđai sang hră gưl prong rai črâo ba neh met wa bruă mă lăp djơ̆ kiăng neh met wa hrăm tui. Kâo ăt khin hơtai rơkâo ƀing apăn bruă nao tơl plơi pla kiăng gum djru hơdôm boh sang anŏ tơnap tap”.

Ơi Nguyễn Khắc Chinh, Khua git gai Ping gah plơi Dak Thọ, să giăm guai Dak Lao, tơring glông Dak Mil, tơring čar Dak Nông brơi thâo, dong mơng hrơi Thiếu tá Nguyễn Phúc Thuận hơmâo jao glăi gum bruă, hơdôm mông jơnum pơƀut amăng plơi pla jai dik dak mơ-ak. Lu tơlơi pơtrun sit nik hăng tơlơi hơdip, bruă bơwih ƀong hơmâo khul Ping gah ba tơbiă hăng pok pơhai ngă ba glăi tŭ yua. Ƀing apăn bruă Ping gah ăt hluh rơđah ƀiă dong kơ tơlơi gơgrong, tơlơi glăm ba, gir run amăng pơđĭ kyar bơwih ƀong huă, khin hơtai pơplih phun pla, hlô rông. Thiếu tá Thuận hrŏm hăng khul Ping gah plơi pla pơtrut pơsur gum pơgôp man pơdong 4 boh sang khăp pap.

“Ayong Thuận lĕ sa čô mơnuih apăn bruă dŏ hlăk ai, hur har pran jua amăng djop mơta bruă. Pơtă pơtăn khul apăn bruă Ping gah kah hăng neh met wa amăng plơi pla kiăng ngă tui klă tơlơi črâo trun. Anai lĕ tơlơi yôm hloh”.

Gir run “Tlâo kiăo tui, pă gum hrŏm” kiăng “hơjan sui ngă djrưh lŏn”, ƀing apăn bruă Ping gah tơhan wai pơgang guai hơmâo pơkiăo nao gum bruă amăng plơi pla ƀơi kual giăm guai Dak Nông djru brơi neh met wa ƀơƀrư̆ pơplih tơlơi pơmĭn bruă mă, hrưn đĭ tơlơi hơdip mơda. Yă H’Xuân, Kơ-iăng Khua git gai Ping gah tơring glông Dak Mil, tơring čar Dak Nông brơi thâo:

“Hăng tơhan wai pơgang guai đơ đam tơring glông ăt hơmâo pơjing lu hơbô̆ bruă, jơlan hơdră hơmâo lăi pơthâo djop anih. Hơdôm jơlan hơdră anai hơmâo lar hyu hăng hơmâo mơnuih ƀôn sang đơ đam tơring glông lăng yôm. Pơgôp yôm amăng bruă pơjing plơi pla Dak Mil, sit biă ñu lĕ ngă tui hơdôm tơlơi pơtrun mơng Ping gah kơ pơđĭ kyar bơwih ƀong huă mơnuih mơnam hăng pơhang rơnuk rơnua amăng tơring glông”.

Hăng tơlơi gir run, gum djru mơng ling tơhan, tơlơi bơwih ƀong huă, tơlơi hơdip mơda kơ neh met wa ƀơi kual giăm guai tơring čar Dak Nông jai hrưn đĭ. Ăt mơng anun, neh met wa hluh rơđah dong kơ bruă wai pơgang guai lŏn ia. Ayong Y Quyết, djuai ania M’nông, dŏ amăng ƀon Sapa, să Thuận An, tơring glông Dak Mil, ñu hơmâo đang kơphê ƀơi guai lŏn ia Thuận Hạnh, ñu brơi thâo:

“Sang anŏ gơmơi hơmâo đang hmua ƀơi anai, hăng hơmâo gong guai amăng hmua mơtăm. Rĭm wŏt nao mă bruă kâo juăt jik rơmet jum dar gong guai. Hăng tơdah ƀuh hlơi thâo aka ƀu thâo krăn găn nao rai ƀơi guai lŏn ia, ƀing gơmơi amra lăi pơthâo brơi ƀô̆ đô̆i mơtăm.Tơhan wai pơgang guai ăt juăt hyu tir na nao, yua anun ƀing gơmơi ăt hơđong pran jua ngă đang hmua ƀơi anai”.

Tui Trung tá Lương Đình Hùng, Khua puih kơđông tơhan wai pơgang guai Dak Song, tơring čar Dak Nông pơsit tong, bruă wai pơgang kjăp guai lŏn ia ƀu djơ̆ kơnong bruă jao kơ ling tơhan đôč ôh mơ̆ ăt lĕ tơlơi gơgrong mơng abih bang mơnuih ƀôn sang, kiăng gơnang nao pran kơtang mơng mơnuih ƀôn sang. Anom bruă ăt gum djru brơi tơlơi hơdip kơ mơnuih ƀôn sang, hơdip hrŏm hăng mơnuih ƀôn sang ƀơi kual giăm guai.

“Anom bruă kiăng gơnang nao mơnuih ƀôn sang, mơnuih ƀôn sang lĕ akŏ phun amăng wai pơgang guai lŏn ia, ling tơhan lĕ ƀing mơnuih pơphun ngă tui bruă jao. Rĭm thun anom bruă gum hrŏm hăng gong gai să pơphun lu bruă mă tui gru grua adôh suang, bơrơguăt drơi jăn, hăng lơm lăng glăi 1 thun ngă tui bruă abih bang mơnuih wai pơgang rơnuk rơnua lŏn ia, kiăng hrŏm hăng mơnuih ƀôn sang ngă klă bruă jao wai pơgang guai lŏn ia ƀơi ƀon lan”.

Hơdôm thun rơgao, Ling tơhan wai pơgang guai tơring čar Dak Nông pơkiăo nao 57 čô mơnuih apăn bruă Ping gah nao jơnum pơƀut hrŏm ƀơi 55 khul apăn bruă Ping gah plơi pla ƀon lan; jao bruă brơi 146 čô mơnuih apăn bruă Ping gah djru brơi rĭm grup sang anŏ amăng kual giăm guai. Hăng hơdôm bruă mă sit nik hăng tŭ yua hơmâo pơgôp hrưn đĭ tơlơi hơdip kơ neh met wa djuai ania ƀiă, pơtrut pran gum pơgôp amăng mơnuih ƀôn sang ƀơi kual giăm guai. Anai lĕ atur kiăng ling tơhan wai pơgang guai tơring čar Dak Nông pơjing bruă wai pơgang amăng abih bang mơnuih, pơhlôm hơđong hăng jai hrơi pơđĭ kyar./.