Kơčăo bruă čuk pơkra jơlan rơdêh đuăi hmar Tân Phú-Bảo Lộc glông ataih 66 km, prong păng djop 4 boh rơdêh, rơnoh prăk tuh pơ alin truh 17.200 klai prăk tui hơdră kơnuk kơna hăng anom bruă mơdrô tuh pơ alin hrŏm. Tui hăng pơtrun tŭ ư tuh pơ alin hơmâo kơnuk kơna pơsit lĕ, rơnoh prăk kơnuk kơna tuh pơ alin 6.500 klai, dưm dưm hăng 38%, dŏ glăi sang bruă mơdrô tuh pơ alin hăng prăk pơhrui mơ̆ng lu tơhnal bruă ngă hrŏm. Tŏ tui kơčăo bruă anai lĕ hơmâo jơlan rơdêh đuăi hmar Bảo Lộc-Liên Khương, ataih rơbêh 73 km, rơnoh prăk tuh pơ alin lĕ 19.521 klai. Amăng anun, rơnoh prăk mơ̆ng kơnuk kơna lĕ 7.761 klai prăk, dưm dưm hăng 39%, dŏ glăi sang bruă mơdrô tuh pơ alin hrŏm.

Tui hăng ơi Trần Hồng Thái, Khua Jơnum min mơnuih ƀôn sang tơring čar Lâm Đồng, yua rơnoh prăk kơnuk kơna ƀiă, ƀu hơmâo kah pơpha rơnoh pơhrui glăi prăk kơmlai anun bruă čuk pơkra jơlan anai ƀu hur har ôh či ngă bruă, ƀing sĭ mơdrô ƀu gưt djru hrŏm tuh pơ alin mơ̆ng prăk čan. Hrŏm hăng anun, abih dua kơčăo bruă anai lêng kơ dŏ gun bruă pơkă hnơ̆ng, ĕp lăng, mă yua kông ngăn lŏn glai, pơkra ming gơnam amăng lŏn hăng ba yua ƀu gêh găl tui hăng Hră pơtrun mrô 866 lơ 18/7/2023 mơ̆ng Khua dêh čar pơtrun ôh. Ơi Trần Hồng Thái lăi:

“Abih 2 kơčăo bruă anun hơmâo anŏ gun hrup soh, ring bruă mơ̆ng 2 kơčăo bruă dưi hơmâo tơring čar Lâm Đồng ngă tui tong ten hăng bơkơnar dưi pok pơhai tañ tơdah djơ̆ găl hăng jơlan hơdră, laih anun dưi pok pơhai amăng thun 2024 pioh truh thun 2025 lĕ mă bruă hmar mơtam. Dua lĕ, jơlan rơdêh đuăi hmar anŏ glông ataih ƀu pơblih ôh smaơ̆ hơmâo mơ̆n ƀư̆ pơkra glăi yua lu mơta tơlơi mơ̆n pơdjơ̆ nao. Khă hnun, yua kơ anai lĕ ƀu djơ̆ kơnong črăn bruă khom tuh pơ alin ôh, kơnong pơblih mă hơdôm črăn ƀiă đôč anun čang rơmang djă hnơ̆ng jơlan hơdră tuh pơ alin”.

Kiăng pơsir hĭ tơlơi tơnap tap, gun gan anai, tơring čar Lâm Đồng rơkâo hăng Khua dêh čar sem glăi pơhrua nao dơ̆ng rơnoh prăk kơnuk kơna hăng 3.332 klai, amăng anun 2.410 klai kơ črăn jơlan Tân Phú-Bảo Lộc hăng 922 klai kơ črăn mơ̆ng Bảo Lộc-Liên Khương. Laih dơ̆ng, brơi kơčăo bruă čuk pơkra jơlan rơdêh đuăi hmar Tân Phú-Bảo Lộc dưi ngă tui hơdră kah pơpha rơnoh prăk pơhrui glăi hrŏ ƀiă, tui hăng tơlơi pơkă ƀơi Mơta tơlơi 82 Tơlơi phiăn Tuh pơ alin tui hơdră bơnah kơnuk kơna hăng sang bruă sĭ mơdrô pơdjru hrŏm.

Pơhiăp đĭ ƀơi mông mă bruă, Kơ-iăng Khua dêh čar ơi Trần Hồng Hà lăi pơtong, ƀu pơđĭ rơnoh prăk mơ̆ng kơnuk kơna ôh ƀơi 2 kơčăo bruă anai. Samơ̆, kiăng pơsir hĭ tơlơi jŭ yap anun, Kơ-iăng Khua dêh čar pơtrun hiăp kơ hơdôm ding jum, anom bruă pơdjơ̆ nao khom hơmâo hră pơblang rơđah hăng khua dêh čar rơkâo pơsir amăng bruă pơtum ngăn rơnoh mơ̆ng sang bruă prăk kơnuk kơna. Yua kơ tui hăng tơlơi phiăn ră anai, rơnoh prăk hơmâo mơ̆ng pô sang bruă tuh pơ alin ƀu djop 20% ôh pơkă hăng rơnoh prăk tuh pơ alin amăng kơčăo bruă anai, anun ƀu djop anŏ gêh găl či čan prăk.

“Kâo rơkâo gah kơnuk kơna lĕ Ding jum prăk kăk khom kơsem min lăng kiăng lăi pơthâo hăng Khua dêh čar sem glăi pioh ngă hră pơtrun mơ̆ng Kơnuk kơna ƀudah čih pơkra glăi Hră pơtrun 78, thun blan pok pơhai bruă anai tañ hloh klă hloh. Yua kơ jơlan hơdră mơ̆ng kơnuk kơna pơblih lu đơi, ƀu hơmâo sa hnơ̆ng ôh hăng tơlơi či lup amăng bruă tuh pơ alin, wơ̆t hăng pô tuh pơ alin hai ƀudah sang bruă prăk ngă hrŏm ăt kiăng hơmâo hră pơdah thâo hăng Khua dêh čar kiăng hơmâo tơlơi git gai pơčrâo ba amăng bruă anai khom sa hnơ̆ng, kiăng djă bong tơlơi ƀuăn mơ̆ng Kơnuk kơna khom sit nik”.

Tơlơi mơ̆ hơdôm kơčăo bruă čuk pơkra jơlan rơdêh đuăi hmar dŏ bơrơkua nao rai amăng bruă pơkă hnơ̆ng hyu mă kông ngăn lŏn glai, Kơ-iăng Khua dêh čar ơi Trần Hồng Hà rơkâo tơring čar Lâm Đồng hăng hơdôm sang bruă tuh pơ alin lăi pơthâo hăng anom bruă mơ̆ng kơnuk kơna pô wai lăng kiăng hơmâo hră pơtô pơčrâo brơi ngă tui djơ̆ găl hăng tơlơi phiăn.

Hlâo kơ anun, ƀơi mông mă bruă, khua mua tơring čar Khánh Hòa lăi pơthâo hơdră kơsem min anŏ dưi ngă tui kơčăo bruă čuk pơkra jơlan rơdêh đuăi hmar Nha Trang-Đà Lạt. Tui hăng anun, rơnoh prăk tuh pơ alin truh 25.000 klai, tui hơdră pơdjru PPP jing kơnuk kơna ha bơnah, sang bruă mơdrô ha bơnah, hră pơkôl BOT hơmâo kơnuk kơna djru, rơnoh prăk truh 70% dŏ glăi pô sang bruă tuh pơ alin; thun blan tla glăi prăk kơnuk kơna lĕ 26 thun 9 blan. Kơčăo bruă mă yua abih đơ đam 672 hektar, amăng anun 409 hektar lŏn glai tha, glai pơgang plơi hăng anih ngă hmua. Tơdơi kơ ngă tui hơdră pơkă lăng man pơkra tơdrông tua ƀơi čư̆ siăng, kơdư hang, pơnăng bong glăi kriăng pơtâo….amra hrŏ trun dŏ 125 hektar đơ đam glai rưng bơbeč djơ̆.

Hăng kơčăo bruă pơkra jơlan rơdêh đuăi hmar anai, Kơ-iăng Khua dêh čar ơi Trần Hồng Hà rơkâo kơ 2 boh tơring čar Khánh Hòa hăng Lâm Đồng, sang bruă tuh pơ alin jing group Sơn hải hăng hơdôm ding jum ngă hrŏm pơdjơ̆ nao, pơtum kơsem min lăng, dăp hơdră, čih pơkra ngă giong hơdôm bruă či ba yua boh thâo ia rơgơi, jŭ yap mrô rơnoh pơkă, boh nik ñu khom jŭ yap tong ten hơdră mă bruă tuh pơ alin ba yua rơnoh prăk.