Čơtlăm lơ 19/8, Kơ-iăng Khua git gai pơ ala mơnuih ƀôn sang dêh čar ơi Vũ Hồng Thanh hrŏm hăng Grŭp khua hyu mă bruă mơ̆ng Jơnum min apăn bruă bơwih ƀong hăng prăk kak Khua pơ ala mơnuih ƀôn sang dêh čar ta lăng tui hơdôm rơwang bruă yôm phăn mơ̆ng lŏn ia hăng bơwih ƀong – mơnuih mơnam mơ̆ng tơring čar Lâm Đồng.

Tui tơlơi lăi pơthâo glăi mơ̆ng Jơnum min mơnuih ƀôn sang tơring čar Lâm Đồng, ƀơi tơring čar hmâo Rơwang bruă jơlan đuăi hmar Kơdư – Dơnung gah Yŭ, črăn Gia Nghĩa – Chơn Thành, ataih rơbêh kơ 124 km, abih bang prăk mă yua rơbêh kơ 25.500 klai prăk, dưi hmâo Khua pơ ala mơnuih ƀôn sang dêh čar ta pơsit hơdră pơtrun tuh pơplai mơ̆ng rơnuč blan 6/2024, samơ̆ glăk dưi pok pơhai kaih biă. Jơlan mrô 27C ataih rơbêh kơ 119 km tô tơring čar Lâm Đồng hăng tơring čar Khánh Hòa, hmâo jơlan čun čue Khánh Lê ataih rơbêh kơ 30km, jing anih kơdol amăng pơlar bruă tuai čuă ngui, dŭ pơgiăng gơnam tam mơ̆ng tơring čar.

Tơdơi kơ đing nao ngă rơđah hơdôm tơlơi gun, čih pioh jơlan gah yak rơgao tơlơi tơnap mơ̆ng tơring čar Lâm Đồng, ƀing khua mua amăng Grŭp lăng tui mơ̆ng Jơnum min apăn bruă bơwih ƀong hăng prăk kak Khua pơ ala mơnuih ƀôn sang dêh čar ta pơsit yôm pran jua gơgrong hlâo, khut khăt amăng bruă git gai, pơpha mơnuih mă bruă; črâo rơđah sa dua mơta bruă akă dưi ngă, ngă akă giong khom dưi đing nao pơsir. Kơ-iăng Khua git gai pơ ala mơnuih ƀôn sang dêh čar ơi Vũ Hồng Thanh pơtă tơring čar Lâm Đồng pơtrut tañ rơnoh hơdôm ring bruă, rơwang bruă phun; gum hrŏm hăng ƀing tuh pơplai bruă pơsir klă tơlơi tơnap, tơlơi gun pơjing ngăn rơnoh pơđĭ kyar mơ̆ng hơdôm rơwang bruă lŏn čuah, bôh pơtâo./.