Amăng mông bơkơtuai, dua gơñu tŭ ư hrŏm kơtưn đĭ hloh dong bruă bưp hăng lăi pơthâo nao rai gah grŭp gưl dlông hăng hơdôm gưl, pơtrut kơtang bruă bơkơtuai kơplah wah hơdôm ƀirô, khul grŭp mơ̆ng dua bơnah. Dua gơñu tŭ ư gum hrŏm kơjăp dong, dŏng yua tơdruă amăng hơdôm bruă bơkơtuai kual hăng jar kơmar, biă ñu lĕ ƀơi Sang gum hơbit djop dêh čar hăng Bruă khul pơphun ƀu pơlir hơbit.

Việt Nam bơni hăng amra ngă jơlan tô nao rai pioh Nepal kơtưn gum hrŏm hăng ASEAN hăng rơkâo Nepal ngă jơlan tô nao rai pioh djru Việt Nam pơtrut kơtang tơlơi rô nao rai hăng hơdôm bôh dêh čar Nam Á. Dua gơñu tŭ ư gum hrŏm kơjăp dong, gum hrŏm hăng hơdôm tơlơi gir run hrŏm đơ đam rŏng lŏn tơnah amăng bŏng glăi hăng pơplih ayuh hyiăng, ngă tui tơlơi pơkôl pơkă pơđoh tơbiă djah pơwot glăi 0 amăng thun 2050 ăt kah hăng gum hrŏm amăng hơdôm bruă mă wai lăng tơlơi rơnuk rơnua mơ̆ng Sang gum hơbit djop dêh čar./.