Ngă tui tơlơi pơčrâo mơ̆ng Anom pơtô bruă ping gah dêh čar tlam lơ 24/4, ƀơi plơi prong Kon Tum, Khua mua git gai ping gah tơring čar Kon Tum pok pơhai jơnum hrăm hăng hla tui tơlơi pơmin, pran jua Hồ Chí Minh thun 2023 hăng jơnum bruă kơđi čar tơlơi pơmin kơ hơdrôm hră mơ̆ng ơi Nguyễn Phú Trọng Khua git gai ping gah pô čih. Ƀơi mông jơnum, ƀing pơtô bruă ping gah tơring čar Kon Tum lăi pơthâo boh yôm phun amăng hơdrôm hră anăn “Khut khăt, kjăp pran jua pơkơdong glăi hăng tơlơi soh ƀong kông ngăn, bruă ngă sat răm kiăng djru akŏ pơdong ping gah hăng kơnuk kơna jai hrơi rơgoh, tơpă kjăp kơtang” mơ̆ng Khua git gai ping gah ơi Nguyễn Phú Trọng pô čih.

Anai lĕ, hơdrôm hră tơlơi čih yôm biă mă pơtô djơ̆ hăng ngă tui sit nik amăng bruă mă akŏ pơdong ping gah, glông bruă kơđi čar hăng bruă  hơkrŭ ƀơi dêh čar ta ră anai; sa pok hơdrôm hră djă ƀơi tơngan yôm kơ bruă pơkơdong glăi tơlơi soh sat ƀong kông ngăn, sat răm, sa tơlơi phun aliăng pioh akŏ pơdong ping gah hăng glông bruă kơđi čar kiăng jai hrơi rơgoh tơpă, kjăp kơtang.