Tui hăng anun, ơi Nguyễn Trung Hải, ding kơna apăn bruă phun ping gah tơring čar, Khua git gai ping gah khul djop anom bruă, mơnuih tơpuôl, Khua Jơnum min djop djuai ania mơnuih mơnam Việt Nam tơring čar Kon Tum, dưi glăi ngă bruă phrâo jing Khua anom pơtô bruă ping gah tơring čar Kon Tum. Yă Y Thị Bích Thọ, ding kơna apăn bruă phun ping gah tơring čar, Khua anom pel ĕp bruă ping gah tơring čar brơi nao ngă bruă phrâo khua git gai ping gah djop anom bruă mơnuih tơpuôl, ngă rah khua jơnum min djop djuai ania mơnuih mơnam Việt Nam tơring čar, rơwang bruă thun 2019-2024. Jao bruă phrâo, pơpha bruă kơ ơi Huỳnh Quốc Huy, ding kơna apăn bruă phun ping gah tơring čar, khua anom pơtô bruă ping gah tơring čar, nao ngă khua anom pel ĕp bruă ping gah tơring čar Kon Tum tal XVI rơwang bruă thun 2020-2025.

Ƀơi mông jơnum lăi pơthâo hră pơtrun, pơsit bruă mă phrâo, jao bruă kơ ƀing khua mua anai, ơi Dương Văn Trang ding kơna apăn bruă ping gah dêh čar, Khua git gai ping gah tơring čar Kon Tum, Khua jơnum min pơ ala mơnuih ƀôn sang tơring čar pơtă pơtăn hăng čang rơmang 3 čô khua hơmâo jao bruă phrâo anai ăt gir run hloh, hrŏm hăng ƀing adơi ayong amăng sang bruă phrâo ngă giong bruă jao.