Tơlơi čih mrô sa: Khánh Hòa nao hlâo mă yua KPI - Mơ̆ng tơlơi pơmin hơjăn pô truh kơ hră pơ-ar rơđah rơđông

Să Khánh Sơn, kual čư̆ siăng gah yŭ Khánh Hòa, ataih mơ̆ng gong gai tơring čar rơbêh 120km, lŏn prong, rơhaih, hơmâo čư̆ jum dar, plơi pla dŏ ataih nao rai biă. Hlâo adih, bruă wai lăng bruă mă pơ să bưp ƀu ƀiă ôh tơnap. Ră anai, rim mơguah mơ̆ng ƀing apăn bruă lĕ gơñu pơk măi computer, mut amăng glông Mrô pơkă anŏ klă mă bruă - KPI. Ƀơi măi computer ƀuh hơdôm mơta bruă či ngă: Čơkă ană plơi, ngă hră, pơsir bruă hơmâo ječ ameč. Truh tlam, ƀu kiăng hơmâo pô pơtă ôh, rim čô mơnuih hlong gư̆ tut ngă giong bruă, čih glăi hơdôm bruă phrâo hơmâo aka ƀu dưi ngă. Sit plang čih pioh anai yơh jing “mơnuih krăp lăng”, djru ƀing khua thâo rơđah bruă gơñu kiăng ngă mah dŏ pơ kual ataih yaih, laih dong ăt pơjuăt brơi tơlơi pơmin ngă mă pô, ƀu kiăng pơđar ôh. Amai Nguyễn Thị Hà, pô ngă bruă amăng Khul akŏ pơjing Ping gah să Khánh Sơn, lăi pơthâo, anai jing bruă phrâo, hơmâo ngă mơ̆ng blan 4/2025, lơ̆m tơring čar pơmut KPI kơ rim bruă mă, laih anun bruă anai djru ñu ngă bruă klă hloh:“Mă yua KPI gơmơi lăng bơkơnar biă. Bruă mă hai huăi kaih lơi. Gơmơi thâo dưi ngă hơdôm mơta bruă gơmơi apăn, hơdôm mơta bruă gah hră pơ-ar, wai lăng...laih dong, pơhmu anŏ tơnap lu hă aset pơhmu hăng pô ngă bruă hrup anun mơn. Pơtŏng rơđah hloh anŏ tŭ yua mơ̆ng pô kiăo tui bruă čom puang mơ̆ng ƀing khua”.

Mrô pơkă KPI mơ̆ng tơring čar Khánh Hòa hơmâo pơkra tong ten hăng bơkơnar, hơmâo ngă mơ̆ng ƀing apăn bruă truh kơ ƀing khua. Ƀu kơnong ƀơi să đôč ôh, lu anom pơphô bruă hăng anom bruă mơ̆ng tơring čar hơmâo mă yua KPI. Ơi Nguyễn Minh Tuấn, Kơ-iăng khua gơgrong bruă Anom pơđĭ kyar mrô lŏn djă pioh tơring čar pơsit, KPI djru anom bruă jŭ yap bruă hơmâo ngă hơdôm pă, ngă phun atur pơhlôm hơđong prăk kăk kơ anom bruă wai lăng mă yua mă pô prăk kăk:“Tơdah ƀu dưi wai lăng lĕ ƀing khua mah lăi pơthâo hơmâo lu bruă samơ̆ boh tŭ yua hrơi mă bruă aset đôč. Hrơi mă bruă hăng prăk blan tơnap wai lăng, bruă mă sui, mă tla prăk blan kơ mơnuih mă bruă jai tơnap hloh kơ anom bruă”.

Kiăng pơtrut tui boh tŭ yua mơ̆ng bruă pơtŏng sit glăi bruă hơmâo ngă mơ̆ng ƀing khua, mơnuih apăn bruă hăng anŏ klă bruă mă tui KPI, tơring čar Khánh Hòa hơmâo akŏ pơdong Grup mă bruă KPI, iâu khua mua apăn bruă, ngă bruă tui hrơi pơkă rim rơwang hrơi tơjuh. Khua ping gah tơring čar Khánh Hòa - ơi Nghiêm Xuân Thành git gai mông jơnum pơtŏng sit, kơđiăng lui tơlơi aka ƀu ngă klă. Sit biă ñu rơbêh 5 blan mă yua, brơi ƀuh KPI djru kah pơpha bruă mă rơđah rơđông, hơmâo hrơi pơkă, hăng hơmâo mrô phara tơnap biă. Ngă tañ, djơ̆ hrơi pơkă hơmâo thim puang; kaih lĕ kah puang. Yă Võ Thị Thu Hương, Kơ-iăng khua wai lăng Kual bơwih ƀong hăng sang măi pơkra gơnam, ding kơna Grup ngă bruă KPI, brơi thâo:“Hrơi blan ngă bruă amra hơmâo pơlir hăng rơnoh pơkă mơ̆ng rim bruă mă, hơmâo wơ̆t hăng hrơi ngă giong. Ngă giong tañ hloh kơ hrơi pơkă lĕ hơmâo pơmut puang, tơdah kaih lĕ amra kah hĭ puang. Mrô tơnap mơ̆ng bruă mă hơmâo yap mơ̆ng 1 truh pơngŏ. Mơ̆ng anun, puang KPI mơ̆ng rim čô mơnuih amra pơƀut tui rim blan, rim kŭi, rim thun, tui hluai kơ bruă kiăng mă yua mơ̆ng pô khua”.

Mơ̆ng tơlơi bơngơ̆t blung a lĕ khŏm “pơmut puang lu tơket tơkeng”, lu mơnuih mă bruă čar ƀơi Khánh Hòa ƀơ ƀrư̆ lăng KPI kah hăng “ia jrao pơđĭ pran rim hrơi”, djru gơñu wai lăng bruă klă hloh. Ơi Phạm Quốc Hoàn, Khua gơnong bruă boh thâo ia rơgơi lăi, hơmâo KPI, ƀing khua amuñ črâo ƀuh tơlơi kơtang - tơdu mơ̆ng rim čô mơnuih lơ̆m ngă bruă.

“Plang e-Office ră anai hơmâo tum pơƀut wai lăng KPI anai laih, bruă bruă hơmâo glông djă pioh hơdor lui, pơjing rai glông čih pioh djŏp bruă hơmâo ngă kơ rim čô mơnuih mă bruă čar kiăo tui tơhnal bruă mă. Bruă pơglăi leng kơ čih pioh amăng plang soh. Ƀu hơmâo tơlơi tơnap hơget ôh lơ̆m pơphun ngă”.

Tơlơi tơpă sit amăng bruă čom puang hăng KPI djru ƀing khua, mơnuih mă bruă čar gơgrong bruă hloh, git gai amuñ hloh lơ̆m ba tơbiă hră pơtrun amăng bruă wai lăng. Hlâo adih, tơlơi juăt hmư̆ lĕ “Ngă giong tŭ yua bruă mă” juăt jing tơlơi hơmâo lăi soh đôč. Ră anai rim čô mơnuih leng kơ hơmâo mrô puang phara, mrô čih mông ngă bruă hăng mrô hră hơmâo pơkra brơi djơ̆ hrơi pơkă rơđah rơđông biă mă, anun “anŏ tŭ yua” jing sit biă.

Mơ̆ng Khánh Hòa, pran jua pơplih phrâo hơmâo bưp krĕp djơ̆ hăng tơlơi pơtrun mơ̆ng Kơnuk kơna. Tong krah blan 7, Khul čih pơkra tơlơi djru - hơdră ngă bruă yôm mơ̆ng Kơnuk kơna hơmâo ba tơbiă Không bruă KPI, pok rai bruă pok prong hơbô̆ bruă wai lăng bruă mă amăng djŏp anom bruă čar, mă yua mơ̆ng lơ 1/1/2026. Ơi Trần Lưu Quang, Khua gum bruă git gai Ping gah, Khua hơđăp Khul čih pơkra tơlơi djru - hơdră ngă bruă yôm mơ̆ng Kơnuk kơna, Khua ping gah ƀôn prong Hồ Chí Minh lơ̆m ngă bruă hăng tơring čar Khánh Hòa brơi thâo:

“Anai jing hơdră ngă bruă ƀu djơ̆ tơring pơpă leng kơ hơmâo ôh. Ƀing apăn  bruă hơmâo pơčeh rai hơnong pơkă tong ten. Hlâo adih, ƀing ta juăt pơtŏng lăng tum teč, lăi hrŏm hrŏm đôč, kah hăng “pơđĭ tui”, “pơtrut kơtang”. Mông anai, tơring čar gir pơplih, pơƀuh rơđah rơđông amăng rim tơlơi lăi glăi, pơpŭ bơni ƀing khua mua, mơnuih mă bruă čar leng kơ sit tui bruă hơmâo ngă. Khua mua tơring čar tŭ ư soh, kiăng tơlơi anai hơmâo bang hyu truh pơ să, hơmâo ngă tui anai jing tơlơi tŭ yua prong biă yơh”./.