Amăng rơnuk blah wang, abih bang mơnuih ƀơi kual Dap kơdư ha pran sa jua tui Ping gah, gir run mut hrŏm djru blah wang truh hrơi pơklaih rơngai. Ñu lĕ mơnuih djuai ania Sêdang, tơkeng rai amăng plơi Kon Gung, să Đăk Sao, tơring glông Tu Mơ Rông, tơring čar Kon Tum, truh ră anai ñu lĕ mơnuih hơdip pơlir hăng bruă ling tơhan. Hơdip truh prong amăng rơnuk blah wang kơdong glăi ayăt Mi laih anun lơ̆m pơdơi lơtrek ñu ngă Khua grup tơhan tơring glông Đăk Tô, ơi A Tủi hơdor glăi thun blan wang glêh tơnap. Thun anai ƀrô tal hơdor glăi 48 thun pơklaih rơngai kual Dơnung, rơnuk rơnua lŏn ia. Tơhan hơđăp A Tủi pioh hrơi mông nao čuă hơdôm anih blah wang đưm hlâo adih, anih ñu hăng ƀing gŏp sông kơtang blah wang hăng dưi pơkiăo đuăi ayăt anun lĕ B15, Đăk Tô – Tân Cảnh:

‘’Lơ 30/4 ƀing gơmơi mơng anih B15 nao djru blah wang ƀơi Quảng Ngãi, lơ̆m glăk tui nao, ƀing gơmơi hmư̆ hing dưi pơklaih rơngai kual Dơnung laih. Lơm anun ƀing gơmơi ruk glăi pơ anih B15 ƀơi Kon Tum, ră anai lĕ Sang pơtô tơhan tơring čar. Lơ̆m hmư̆ hing pơklaih rơngai kual Dơnung, adơi ayong hok mơ-ak biă mă, ling tơhan ƀing gơmơi poh tơngan hok mơ-ak hrŏm đơ đam dêh čar lơ̆m dưi pơklaih mơng tơlơi kơtư̆ juă mơng ayăt. Adơi ayong lêng kơ rang kơđiăng dŏ tơguăn tơlơi git gai mơng gơnong glông črâo brơi bruă yôm phăn kơ ling tơhan’’.

Ơi Y Tánh Mlô (djuai ania Bơnông) pơ̆ Ƀuôn Phôk, să Ea Rbin, tơring glông Lak, tơring čar Dak Lak ăt hmâo găn rơgao laih hơdôm thun blan kơtang tit mơng blah ngă ƀơi kual lŏn Dăp Kơdư. Ñu lăi lĕ, tơlơi hơdip lom anun tơnap tap biă, samơ̆ ăt sa pran tui Ping gah, tui bruă hơkrŭ.

 “Ping gah, bruă ngă hơkrŭ mơng ƀing ta pơjing pơsur mơnuih ƀôn sang amăng dlai pioh tui ngă hơkrŭ. Mơng thun 1958 trut thun 1975, tơlơi hơdip rơnuk anun amăng dlai tơnap tap biă. Neh wa ngă đang hmua pơdai, pla hơbơi plum truh thun 1972-1973 lĕ Mi raih trun put jrao hret. Ling tơhan hăng neh wa rơpa glar, hyu klơi pơtơi, koh tơdŭ huai, pĕ añăm dlai pioh ƀong, hyu ĕp mă gơnam pioh ƀong huă mơ̆, neh wa ăt ha pran jua kiăo Ping gah, tui bruă ngă hơkrŭ”.

Să Nâm Nung, tơring glông Krông Nô, tơring čar Dak Nông lĕ kual pơdong puih kơđông rơnuk N’Trang Lơng blah pơkiăo đuăi ayăt Prang đưm hlâo, hăng hơmâo tơlơi tŏ tui amăng dua rơnuk blah wang pơklaih rơngai lŏn ia. Ƀơi anai lĕ puih tơhan B4 – pơlir tơring čar mrô IV, hơmâo tŭ yap anih djă pioh gru grua ngă hơkrŭ gưl dêh čar. Nâm Nung glăk hơmâo tơring čar Dak Nông pơjing sa anih brơi tuai čuă ngui hăng anăn ‘’Tơlơi hing ang mơng ia hăng apui’’ gah kual lŏn dron yôm rŏng lŏn tơnah UNESCO Dak Nông. Kual blah wang Nâm Nung lĕ anih yôm kiăng pơtô pơblang glăi gru grua ngă hơkrŭ brơi kơ tuai čuă ngui lơ̆m pot glăi anih blah wang, ơi Y Xuyên, dŏ ƀơi ƀon Ja Rah, să Nâm Nung, hơdor glăi hrơi blan hrŏm hăng plơi pla djru brơi ƀô̆ đô̆i blah ayăt Mi:

“Đưm hlâo adih blah wang hŭi rơhyưt biă yơh, ƀom mĭn djop mơta, ƀing gơmơi dŏ amăng glai lơ̆m rơdêh por plĕ ƀom ƀing gơmơi trun hơđăp amăng luh. Lơ̆m rơdêh por por đuăi ƀing gơmơi djru brơi ƀô̆  đô̆i gui hyu boh phao hăng gơnam ƀong. Lơ̆m ling tơhan kơ ƀah ia măm, hra … ƀing gơmơi gui nao amăng glai brơi kơ tơhan”./.