Hăng sa amăng 4 bôh să ƀu ngă tui pơmut hrŏm tui tơlơi pơsit dưm dăp anom bruă čar, să Quảng Hòa dưi hmâo tơring čar Lam Đồng jao jăng jai 55 čô mơnuih mă bruă. Tui anun mơn tơdơi rơbêh kơ sa blan mă bruă, să kơnong kơ hmâo 32 čô mơnuih, kơƀah 23 čô mơnuih. Ơi Hoàng Trung Diện, Khua Jơnum min mơnuih ƀôn sang să Quảng Hòa brơi thâo, tơlơi anai hmâo ba truh laih tơlơi “hŏng” anih mă bruă hăng “hrêp mă” amăng bruă dưm dăp mơnuih mă bruă:

“Biă ñu lĕ amăng bruă pơpha mơnuih apăn bruă git gai hơdôm bôh anom, grŭp. Anom bruă truh ră anai akă hmâo mơn kơ-iăng khua anom hăng akă hmâo khua anom, kơnong kơ hmâo 2 čô mơnuih apăn bruă lĕ mơnuih juăt bruă wai lăng prăk kak, mơnuih bơwih brơi hră pơ-ar mă yua prăk kak. Jơnum min mơnuih ƀôn sang să mă yua sa dua čô mơnuih amăng grŭp Ping gah ăt kah hăng bơnah gah khul grŭp nao gum djru kơ Jơnum min lơm git gai bruă mă”.

Lơm anun hmâo să kah hăng Quảng Hòa glăk kơƀah mơnuih mă bruă, să Krông Nô, tơring čar Lâm Đồng glăi glăk “tơnap pơsir” lơm kơnong kơ ƀơi Anom bôh thâo, bơkơjăp drơi jăn mơ̆ng să, hmâo laih 26 čô mơnuih apăn bruă, mơnuih mă bruă čar. Ơi Huỳnh Long Quốc, Khua Jơnum min mơnuih ƀôn sang să brơi thâo, tơdơi kơ pơmut hrŏm 3 bôh să, anun lĕ: să Dak Drô, Tân Thành hăng tơring kual Dak Mâm (tơring glông Krông Nô, tơring čar Dak Nông hơđăp), să Krông Nô phrâo tŭ mă hơnong Anom bôh thâo bơkơjăp drơi jăn mơ̆ng tơring čar hơđăp, ba truh mơnuih lĕ lu mơ̆ bruă lĕ ƀiă:

“Ră anai bruă mă ƀu hmâo, adơi ayong dô̆ bơngot biă. Hơdôm bôh să pơkon hmâo pơjing hơdôm anom bơwih brơi kơ bruă hrŏm tui anun ƀu pioh mơ̆ pơpha mrô adơi ayong nao pơ̆ hơdôm bôh să pơkon đôč bơ̆ ră anai 26 čô mơnuih ƀu hmâo bruă mă. Čơkă mă prăk blan ngăn drăp mơ̆ ƀu ngă hơget, tơring čar khom hmâo jơlan pơsir djru kơ să pioh pơtlaih brơi ƀơi anai”.

Tơdơi kơ blan blung a mă bruă gong gai 2 gưl, tơring čar Lâm Đồng dŏng tal 4 đơ đam dêh čar kơ mrô djơ̆ pran bơwih brơi kơ bruă čar. Khă hnun hai, bruă pơpha mơnuih apăn bruă akă “djơ̆ mơnuih, djơ̆ bruă”, “anih rơbêh, anih kơƀah” mơnuih apăn bruă ngă bruă mă mơ̆ng gong gai akă djơ̆ bôh tơhnal kah hăng hmâo čang rơmang. Rơđah biă ñu đơ đam tơring čar hmâo 93 bôh să, phường ƀu hmâo mơnuih apăn bruă gah hơdră mă măi kompiutơr; 60 bôh să, phường kơƀah mơnuih mă bruă gah kông ngăn glai klô hăng rơhuông adai; 33 bôh să, phường kơƀah mơnuih mă bruă wai lăng man pơdŏng...

Kiăng pơsir, tơring čar Lâm Đồng nao djru gưl să. Hrŏm hăng anun tơring čar ăt pơjing mơn 12 grŭp hyu mă bruă ƀơi anăp pơ̆ hơdôm bôh să, phường djru pơsir tơlơi tơnap, tơlơi gun mơ̆ng gong gai să. Gơnong bruă ping gah hăng Grŭp pơkă tơlơi phiăn Khul khua pơ ala mơnuih ƀôn sang tơring čar Lâm Đồng ăt glăk pơjing mơn kơčăo bruă lăi pơthâo gưl hmâo tơlơi dưi jao jăng jai dong mrô mơnuih mă bruă gong gai gưl să gơgrong hlâo bruă git gai, pơplih mơnuih apăn bruă djơ̆ tui tơlơi kiăng kơ bruă mă.

Ơi Đỗ Văn Chung, Khua Gơnong bruă čar tơring čar Lâm Đồng brơi thâo, tơring čar ăt glăk pơtrut kơtang mơn bruă dưm dăp, pơphun bruă mă ƀơi hơdôm bôh să pioh bruă mă mơ̆ng gong gai 2 gưl sit nik rơbô̆t ba glăi bôh tơhnal:

“Ƀơi anăp khom pel ĕp glăi 124 bôh să, phường, kual phara ha jăn hmâo sa dua hră čih anăn bruă apăn bruă mă mơ̆ng rim mơnuih apăn bruă, mă bruă čar pioh git gai. Ngă hiưm hơpă blung hlâo lĕ amăng hơdôm bôh să djơ̆ bruă mă, bruă jao. Dua lĕ amăng ƀut hơdôm bôh să hlâo adih pioh pơplih nao rai, pơkiăo hyu pioh să anun djru să adih mơ̆ng pơphun bruă ruah mơnuih mă bruă”.

Hmao thâo rơđah tơlơi “ƀu djơ̆ bruă apăn, soh bruă” – “anih rơbêh, anih kơƀah” mơnuih apăn bruă ƀơi gưl să, tơring čar Lâm Đồng glăk khut khăt ngă tui pioh bruă gong gai să jai hrơi jai ngă giong, mơnuih apăn bruă ngă djơ̆ bruă, djơ̆ bruă pô mă hăng mơnuih ƀôn sang dưi bơwih brơi klă hloh./.