Amăng hơdôm bruă mă mơng “Blan nao čuă ngui pơ tơring čar Lâm Đồng thun 2025”, amăng 2 hrơi rơgao, gơnong bruă gru grua, bơrơguăt drơi jăn hăng tuai čuă ngui tơring čar Lâm Đông gum hrŏm hăng Khul bơwih brơi tuai čuă ngui ƀon lan pơphun grup Famtrip nao pel ĕp kiăng kơtưn pơlir hơbit gơnam tam, bruă bơwih brơi tuai čuă ngui ƀơi 3 kual đang bơnga-ia rơsĭ-glai rưng. Tơdơi kơ pơmut hrŏm 3 boh tơring čar Lâm Đồng, Dak Nông hăng Bình Thuận, bruă bơwih brơi tuai čuă ngui amăng tơring čar Lâm Đồng phrâo hơmâo pok rai anih pơđĭ kyar pơprong, lu tơlơi dưi, tơlơi gal phrâo.

Grup pel ĕp Famtrip hơmâo ƀing rơgơi kơhnâo, mơnuih wai lăng bơwih brơi tuai čuă ngui, tơlơi bơwih bơwang ƀơi 3 anih phun amăng tơring čar Lâm Đồng hơmâo: Mũi Né- “kar hăng boh priă kơ bruă bơwih brơi tuai čuă ngui ter hang ia rơsĭ kual Ngŏ dơnung Asia”; Đà Lạt kual pla bơnga-“Kual Mi kô̆ tong krah glai rưng “; Tà Đùng- “Tong wing Hạ Long ƀơi kual Dap kơdư”. Hơdôm tơlơi pơgôp brơi ƀuh tơring čar Lâm Đồng kiăng tañ man pơkra jơlan glông kiăng pơlir kual bơwih brơi tuai čuă ngui ia rơsĭ-glai rưng-đang bơnga. Blan nao čuă ngui pơ tơring čar Lâm Đồng thun 2025 hăng anăn: Lâm Đồng “Anih tum pơƀut anŏ yôm-pơlir pran jua” pơphun mơng lơ 6/9 truh lơ 5/10 hăng hơdôm bruă mă tui gru grua-tuai čuă ngui-sĭ mơdrô-bơrơguăt drơi jăn. Anai lĕ hrơi mông kiăng bruă bơwih brơi tuai čuă ngui tơring čar Lâm Đồng ngă lar hyu tơlơi pơsit kơ kual lŏn jê̆ giăm, thâo čơkă tuai, lu gru grua yôm phar hăng bă blai prăk mơ-ak.