Rơwang bruă tuh pơplai pơkra jơlan đuăi hmar Bảo Lộc – Liên Khương găn anih anom 10 bôh să, phường gah tơring čar Lâm Đồng, bơdjơ̆ nao rơbêh kơ 5.400 bôh sang anô̆ hăng 14 grŭp, hăng abih bang kual lŏn kiăng mă yua giăm truh 600ektar, amăng anun hmâo lŏn dô̆, lŏn ngă đang hmua, lŏn glai, lŏn pơgang lŏn ia.

Dưi pơphun pơdŏng pơkra amăng lơ 29/6, amăng rơwang pơplih mă bruă gong gai 2 gưl hăng ngă tui pơmut tơring čar mơtăm, rơwang bruă bŏng glăi hăng lu tơlơi tơnap, tơlơi gun. Ƀơi să Ninh Gia, anih hmâo rơbêh kơ 100 bôh sang anô̆ mơnuih ƀôn sang bơdjơ̆ nao yua kơ rơwang bruă, ơi Võ Hữu Xuân, Khua Jơnum min mơnuih ƀôn sang să brơi thâo, tơnap tap blung a mơ̆ să bưp lĕ kơƀah mơnuih apăn bruă hreč bruă pioh pơ ala glăi, pơsir anih anom man pơkra jơlan:

“Hơdră dăp kơ mơnuih apăn bruă gơgrong bruă mơ̆ng Anom bơwih ƀong ƀu dưm kơnar adơi ayong phrâo tŭ mă bruă. Lơm pơphô brơi pok pơhai bruă jao pơkă kual lŏn ăt kah hăng nua lŏn hmâo anô̆ tơnap. Ră anai gun tơlơi pơkă kual hrŏm mơ̆ng hơdôm bôh să anun akă pok pơhai bruă tŭ mă tô̆ tui pioh pơjing rơwang bruă kual pơdŏng glăi plơi pla hơđong”.

Tui hăng ơi Nguyễn Thanh Chương, khua pơ ala kơ Grŭp wai lăng rơwang bruă tuh pơplai pơdŏng tơring čar Lâm Đồng, tơdơi rơbêh kơ 1 blan rơwang bruă dưi pơphun, ăt lĕ rơbêh kơ 1 blan pơphun mă bruă gong gai 2 gưl, sa dua anih anom pơkă bơdjơ̆ nao bruă pơsir anih anom mă yua ăt dưi tŭ mă mơn; anih mă bruă čar ƀơi anih hmâo rơwang bruă găn nao hmâo tơlơi pơplih; bruă pơsit nua lŏn rơđah, pơjing jơlan gah pơ ala, hơdôm kual pơdŏng plơi phrâo hơđong... leng kơ kaih. Ơi Nguyễn Thanh Chương brơi thâo, hrŏm hăng pơtlaih hơdôm tơlơi gah bruă gơgrong mơ̆ng plơi pla, tơring čar Lâm Đồng ăt glăk rơkâo đĭ mơn hăng dêh čar đing nao djă pioh hơdră bruă phara ha jăn kơ hlung lŏn čuah pioh pơhlôm rơnoh man pơkra jơlan đuăi hmar Bảo Lộc – Liên Khương:

“Glông jơlan Bảo Lộc – Liên Khương hmâo pơkă 11 anih hmâo hlung lŏn čuah, amăng anun hmâo 4 hlung lŏn dor lui, sa anih hlung čuah hăng 6 anih hlung lŏn hăng bôh pơtâo pioh pok pơhai pơkra jơlan. 11 anih anai hmâo ba mut amăng Tơlơi pơtrun pơsit 106 mơ̆ng Khua pơ ala mơnuih ƀôn sang kơ pơphô hlâo hơdră phara ha jăn kơ hơdôm rơwang bruă. Tơlơi pơtrun pơsit 106 dưi mă yua truh kơ 30/6, Jơnum min mơnuih ƀôn sang tơring čar Lâm Đồng hmâo rơkâo hăng Gong gai dêh čar hăng Khua pơ ala mơnuih ƀôn sang dêh čar kơ brơi dong hrơi pioh kơ Tơlơi pơtrun pơsit 106 amra tañ hloh ngă tui Tơlơi phiăn lŏn čuah bôh pơtâo”.

Tui hăng kơčăo bruă mơ̆ng tơring čar Lâm Đồng, hrơi blan pơkă pơkra jơlan đuăi hmar Bảo Lộc – Liên Khương lĕ 30 blan. Kiăng pơhlôm rơnoh bruă ba tơbiă, khua Jơnum min mơnuih ƀôn sang tơring čar Lâm Đồng ƀơi anăp pel ĕp, hơduăh lăng, črâo ba pơtlaih anô̆ gun kơ rơwang bruă. Hrŏm hăng anun kơtưn ba nao mơnuih mă bruă gưl tơring čar nao pơ̆ să; tañ pơjing Grŭp wai lăng rơwang bruă jơlan nao rai tơring čar; Anom pơđĭ kyar pơlar lŏn mă yua tơring čar; Grŭp wai lăng rơwang bruă đang hmua tơring čar ... pioh ngă tui hơdôm bôh yôm gah bruă pô mă. Ơi Hồ Văn Mười, Kơ-iăng Khua git gai Ping gah tơring čar, Khua Jơnum min mơnuih ƀôn sang tơring čar Lâm Đồng, brơi thâo, hăng hơdôm rơwang bruă phun mơ̆ng tơring čar, amăng anun hmâo rơwang bruă jơlan đuăi hmar Bảo Lộc – Liên Khương, pơsir lŏn mă yua pơkra jơlan dưi pơsit lĕ jơlan pơsir phun ñu:

“Ƀing gơmơi dô̆ bơngot kơ bruă anai. Jơlan pơsir anun lĕ bruă lăi pơhing, pơsur brơi neh wa thâo hluh hơdôm ring bruă phun, hơdôm jơlan đuăi hmar anai amra ba glăi bôh tŭ yua kơ mơnuih ƀôn sang lơm pơ ala, pơsir anih pơkra jơlan lăp djơ̆, tui tơlơi phiăn. Ƀing gơmơi hmâo ba tơbiă laih kơ Khua git gai Ping gah tơring čar brơi pơjing Grŭp črâo ba pơsir hơdôm ring bruă phun, amăng anun hmâo pơjing Grŭp črâo ba pơsir lŏn man pơkra jơlan hăng ba tơbiă biă hăng Khua git gai Ping gah tơring čar amra jing Khua Grŭp anai hăng ba tơbiă hăng ƀing apăn bruă amăng Grŭp apăn bruă Ping gah tơring čar, ƀing apăn bruă Ping gah tơring čar tui pran jua lĕ rim mơnuih khom gơgrong ba bruă lăng tui, hơduăh lăng đing nao črâo ba bruă pơsir anih anom mă lŏn pơkra jơlan”.

Pơsir tơlơi tơnap, tơlơi gun amăng rơwang pơplih phrâo, mă yua bruă gong gai 2 gưl, tơring čar Lâm Đồng glăk đing nao pơtlaih hơdôm ring bruă, rơwang bruă phun kiăng pơtrut bơwih ƀong – mơnuih mơnam pơđĭ kyar. Kơnong hăng rơwang bruă tuh pơplai pơkra jơlan đuăi hmar Bảo Lộc – Liên Khương, hơdôm gơnong bruă, anom bruă mơ̆ng tơring čar hăng 10 bôh să, phường anih jơlan đuăi hmar găn nao glăk đing nao prong bruă pơsir lŏn man pơkra jơlan. Khua pơ ala tuh pơplai jơlan đuăi hmar Bảo Lộc – Liên Khương, brơi thâo, truh blan 10 pơ̆ anăp amra ngă giong bruă pel ĕp bôh ƀôm bôh min. Bruă pel ĕp dăp hơdră, ruah mă pô gơgrong pơkra jơlan amra ngă giong amăng blan 11 hăng pơphun pok pơhai pơkra jơlan đuăi hmar ƀơi glông jơlan man pơkra./.