Truh abih lơ 31/8, đơ đam tơring čar phrâo ba yua rơbêh 4.400 klai prăk, dưi ngă djop 23% akŏ bruă; tơdah yap rơnoh bruă ngă giong hơmâo tla laih prăk kiah 27%. Lăp đing nao lĕ, lu kơčăo bruă, ring bruă phun hăng rơnoh prăk giăm 8000 klai, phrâo mă yua 430 klai đôč, dưm dưm hăng 5% akŏ bruă jao. Jơnum min mơnuih ƀôn sang tơring čar pơtrun hiăp djop gơnong bruă, sang bruă, plơi pla khom pơsir hĭ tơlơi tơnap tap, pơtrut hmar ƀiă bruă man pơkra hăng mă yua prăk tuh pơ alin kiăng ngă giong 100% akŏ bruă brơi yua abih rơnoh prăk sa thun.

Kiăng dưi ngă bruă anai, mơ̆ng ră anai truh abih thun, rim blan tơring čar khom mă yua 2.600 klai prăk. Ơi Hồ Văn Mười, Khua Jơnum min mơnuih ƀôn sang tơring čar Lâm Đồng lăi pơtong, bruă pơtrut hmar ƀiă mă yua prăk tuh pơ alin kơ bruă čar lĕ ƀu kơnong pơgôp hrŏm ngă giong anŏ kiăng čuk pơkra jơlan glông đôč ôh, dŏ jing pran kơtang pơtrut rơnoh pơđĭ kyar bơwih ƀong huă ƀơi tơring čar, yua kơ anun kiăng dăp hơdră tum teč hloh pơsir hĭ tơlơi tơnap tap, brơi mă yua prăk tuh pơ alin kơ bruă čar djơ̆ lăp hmao hrơi blan pơkă.