Jơnum ngă lơphet ƀudah ta juăt lăi jơnum ngă yang hơdor glăi 80 thun hơkrŭ blan čơpăn tŭ yua hăng hrơi akŏ pơdong kơnuk kơna lŏn ia lơ 2/9, hơmâo lu bruă mă phun: Nao tŭ mă apui arôk gru grua, ngă yang kơkuh hăng hơdui đĭ hla gru, hla kơ dêh čar, tơlơi čih pơđok lăi pơthâo kơ hrơi jơnum prong anai yua mơ̆ng khua mua ping gah, kơnuk kơna ta pô pơđok; Pơnah mlăi apui bơnga, rŭi rơdêh por ƀơi adai rơngit čơkă hrơi mơak prong; Rơbat pơtrui, rŭi tơhan.

Djop khul grup rơbat pơtrui rŭi hrŏm, hơmâo 16.000 čô mơnuih apăn bruă kơnuk kơna, hrŏm hăng khul ling tơhan blah ngă, tơhan kông an djop bruă laih anun djop gưl mơnuih mă bruă apah hăng mơnuih ƀôn sang dêh čar, pơ ala djop djuai ania dêh čar. Ling tơhan 4 boh dêh čar Nga, Khač, Lao hăng Kur ăt rai rŭi hrŏm mơak. Tơdơi kơ găn nao ƀơi anih ƀing khua mua dŏ ĕp lăng, lu khul grup tơhan rơbat pơtrui, amra rŭi nao ƀơi sa, dua arăt jơlan amăng ƀôn prong kiăng pơdah thâo tơlơi khăp mơak hrŏm ană plơi pla.

Hăng adai plơi prong jưh jom Hà Nội, Tơhan pơgang rơngit adai – tơhan rơdêh por hơmâo pơphun 9 grup por hăng rơbêh 30 boh rơdêh por hơmâo rơdêh bek, rơdêh por pơgiăng gơnam, rơdêh por pơtŏp tơhan blah ngă, rơdêh por phản lực, pơphun jing lu grup por amăng hrơi ngă lơphet. Hrom hrơi anai mơn, ƀơi ia rớĭ Cam Ranh (Khánh Hòa), tơhan sơlup pơgang ia rơsĭ, ăt hơmâo brơi tơhan nao pơ ia rơsĭ pơƀuh tơlơi rơgơi, anŏ hiam, hăng pơdah lăng amăng tivi kiăo tlôn mơtăm kơ tơdron lăk Ba Đình.

Amăng tal anai, lu bruă ngă hiam, gru grua mơak, adoh suang pơphun djop anih amăng dêh čar. Ƀơi Hà Nội, pơdă gơnam gru grua “80 thun jơlan nao mơ̆ng Hrơi Rơngai-mơai pô lŏn ia-hyuk hyak mơak klă” hơmâo pok bah amăng mut nao ĕp lăng soh sel ƀu mă prăk, bơwih brơi kơ mơnuih ƀôn sang mơ̆ng lơ 28/8 truh abih lơ 5/9/2025, ƀơi anih pơdă gơnam gru grua dêh čar, Cổ Loa, Đông Anh, Hà Nội. Tal pơdă gơnam gru grua anai hơmâo 34 boh tơring čar, ƀôn prong amăng dêh čar hăng 28 ding jum anom bruă hăng sang bruă mơdrô phun nao pơdă hrŏm.

Lăi pơthâo hăng pơdă gơnam gru grua hơmâo lu mơta pơthâo brơi anŏ pơblih phrâo lăp pơ-ư ang ƀơi lŏn ia amăng 80 thun laih rơgao man pơdong hăng pơđĭ kyar djop bruă. Laih dơ̆ng, lăi pơthâo gru grua Việt Nam hăng gru hiam amăng tơlơi hơdipgăn rơgăn hơdôm rơbâo thun čih pioh gru phun; tơlơi hiam hơmâo lu mơta ia iom gru grua mơ̆ng 54 djuai ania; tơlơi hing ang hơmâo lu mơta kông ngăn, gơnam tam mơ̆ng klâo kual hăng ring bruă man pơdong hiam phara mơ̆ng đưm hăng ră anai amăng dêh čar.

Gong phun jua pơhiăp Việt Nam gum pơdă prưng rup “80 thun Jua pơhiăp Việt Nam gum hrŏm hăng lŏn ia”. Biă ñu pơ anai, mơnuih ƀôn sang dưi ĕp lăng boh thâo ia rơgơi pơƀuh glăi kar hăng sit mơtăm “Pơwơ̆t glăi pơ thun blan hing ang”: dŏng pơtơdron lăk Ba Đình 80 thun hlâo adih, pơhmư̆ Khua mir sir Hồ Chí Minh dŏ pơđok Tuyên ngôn độc lập, amăng hrơi mông kơdrưh yôm, ôl kơdol pran jua, jruh ia mơta hăng jua pah tơngan, jua ur hrek mơ̆ng rơtuh rơbâo mơnuih ƀôn sang, yor tơngan ƀuăn pơgang ba Lŏn ia. Kơnong amăng hơdôm hrơi đôč, “Pơwơ̆t glăi thun blan hing ang” hơmâo čơkă hơdôm pluh rơbâo čô mơnuih nao lăng.

Ƀơi plơi prong jưh jom Hà Nội pơdah jơlan hơdră adoh suang hơdor glăi 80 thun hrơi hơkrŭ blan čơpăn tŭ yua hăng hrơi akŏ pơdong kơnuk kơna lŏn ia lơ 2/9 ƀơi dua boh anih Sang gru grua Quần Ngựa hăng tơdrok lăk anăn Hơkrŭ blan čơpăn ƀơi anăp sang adoh suang prong. Ƀôn prong ăt pơphun brơi 6 anih pơnah mlăi apui bơnga brơi mơnuih ƀôn sang lăng.

Hrŏm mông anun mơn, ƀôn prong HCM ăt bang bơngač hăng 4 anih pơnăh mlăi. Tơlơi ngă lăp hơdor amăng lu bruă hơmâo ƀơi ƀôn prong anai dong lĕ adoh suang hơmâo pơphun ƀơi 3 anih: jơlan Nguyễn Huệ (Kuâ̆n 1), sang adoh suang gah rơngiao đang bơnga plơi prong phrâo (phường Bình Dương) hăng tơdron lăk Thùy Vân (phường Vũng Tàu).

Ƀơi kual Dap Kơdư-Dơnung Tong krah, lu bruă mă gru grua mơak, adoh suang, pơrơguăt drơi jăn, pơnah mlăi apui bơnga...ăt hơmâo pơphun ƀơi djop anih bơwih brơi kơ mơnuih ƀôn sang ĕp lăng. Ƀuh rơđah jơnum ngă yang mơak anăn “Tơlơi hiam hloh lŏn mơnai glai klô hăng ia rơsĭ mơtah pơtum hrŏm” ƀơi Gia Lai; rơwang hrơi tơjuh ngui ngor gru grua mơak-tuai čuă ngui-mơnong ƀong haư hăng jơlan hơdră adoh suang ƀơi tơring čar Dak Lak; lu bruă ngă pơdă rup, gơnam gru grua “Lâm Đồng-50 thun mơak lŏn ia lir hơbit jing sa”, pơdă rup hiam adoh suang ƀơi Đà Lạt, tơring čar Lâm Đồng; lu bruă hơdor glăi 50 thun pơklaih rơngai Gia Lai-Kon Tum ƀơi tơdron lăk Đại đoàn kết, Plơi Ku, Gia Lai; pơdă rup gru grua anăn “Ia iom pơtum ƀut”, hrŏm hăng pơphun ngui pơdă sang čơ, pơdah rup gơnam gru grua gah bruă kơphê hăng gơnam OCOP ƀơi Ƀuôn Ma Thuôt, tơring čar Dak Lak...