Mơmŏt lơ 29/8, Ping gah ƀôn prong, Khul pơ ala mơnuih ƀôn sang, Jơnum min mơnuih ƀôn sang, Jơnum min djop djuai ania mơnuih mơnam Việt Nam ƀôn prong Hồ Chí Minh pơphun ƀong huă hrŏm hăng ƀing khua sang anih jưh ƀơi ƀôn prong ƀrô tal hơdor glăi 79 thun hrơi akŏ pơjing kơnuk kơna dêh čar Việt Nam ƀơi sang bruă Jơnum min mơnuih ƀôn sang ƀôn prong. Khua Jơnum min mơnuih ƀôn sang ƀôn prong Hồ Chí Minh Phan Văn Mãi pơdah tơlơi pơpŭ hăng lăng yôm hơdôm bruă pơtom hiăp, hơdôm tơlơi dưi mơ̆ gơyut gơyâo amăng jar kmar gum hrŏm hăng ƀôn prong pok pơhai amăng hrơi blan rơgao.

Mơng akŏ truh ră anai, ƀôn prong hơmâo čơkă rơbêh 30 grup khua mua pơprong mơng tač rơngiao, hơmâo ƀing khua apăn akŏ mơng hơdôm boh dêh čar, hăng hơmâo giăm 100 mông pơbưp pơtom hiăp hăng hơdôm boh tơhnal djop mơta, đing nao ngă hrŏm pơđĭ kyar bơwih ƀong huă hơđong kjăp. Tơlơi anai pơdah tơlơi yôm hăng kơdrưh ang mơng ƀôn sang hăng gơyut gơyâo jar kmar.

Ƀrô djơ̆ tal hơdor glăi 79 thun hrơi pơdŏng lŏn ia djop mơnuih dưm kơnar Việt Nam, mơguah lơ 30/8, Khua git gai Ping gah tơring čar, Khul Khua pơ ala mơnuih ƀôn sang, Jơnum min mơnuih ƀôn sang, Jơnum min djop djuai ania mơnuih mơnam dêh čar Việt Nam tơring čar Dak Lak hrŏm hăng khul ling tơhan hăng mơnuih ƀôn sang hmâo nao dưm guang bơnga, tuĭ ñan ƀơi Pơsat Ling tơhan pơsăn drơi tơring čar, anih pơdơi pơdă mơ̆ng 2.326 čô ling tơhan pơsăn drơi.

Amăng mông tơhmit, ƀing pơ ala hmâo dưm laih guang bơnga, tuĭ ñang, pioh sa mơnit ƀlok hơdor, pơdah pran jua hơdor tơngia dơlăm pioh kơ pran jua tuh rơyuh prong prin mơ̆ng Ƀing sông kơtang pơsăn drơi tlaih rơngai djuai ania, pơlir hơbit lŏn ia. Tơdơi kơ ngă yang tuĭ ñan, pơpŭ bơnga, khua git gai tơring čar Dak Lak hrŏm hăng khul ling tơhan hăng lu mơnuih ƀôn sang tuĭ ñan ƀơi hơdôm bôh pơsat tơhan pơsăn drơi./.