Ƀơi anung prăk man pơdong XL02, kơčăo bruă tal 3, găn nao să Tân Tiến hăng Vị Bổn (tơring čar Dak Lăk), hơdôm pluh boh rơdêh glit, rơdêh ƀen pơgiăng pơtâo čuah, rơdêh tuh ia mơtuir, hrŏm hăng rơbêh 30 čô kông ñơn, kĭ sư mơ̆ng Kông ti pơčruh ngăn man pơdong Tân Nam glăk đik đak tuh, tơtŏm ia mơtuir pơkra jơlan kơsu tal 2. Ayong Cao Văn Hoà nh, kông ñơn grup tuh ia mơtuir kơsu mơ̆ng kông ti ră ruai, ha mơkrah thun rơgao, ñu glăi čuă sang anŏ ñu ha wơ̆t đôč, dŏ glăi lêng kơ dŏ pơ anai pơkra jơlan soh. Ayong Cao Văn Hòanh brơi thâo:“Kâo dŏ glăi pơ anih pơkra jơlan hơmâo 6 blan laih, adơi ayong amăng grup pơkra jơlan kơsu glăk tuh ia mơtur ƀơi jơlan tal sa hăng tal 2. Gơmơi kơnong pơdơi lơ̆m hơjan hlim đôč, bơ hrơi pơkŏn gơmơi ngă bruă na nao tơhrơi mlăm mơtăm”.

Ơi Phan Xuân Phú, Khua gơgrong bruă man pơdong mrô 2 (Kơčăo bruă tal 3, Kông ti pơčruh ngăn man pơdong Tân Nam) brơi thâo, prăk pioh man pơkra năng ai 1.200 klai, glông 15km, găn nao pơ hơdôm boh să Tân Tiến, Vụ Bổn hăng Ea Knêč (tơring čar Dak Lăk). Ră anai bruă man pơkra ăt kaih mơn pơhmu hăng hrơi pơkă, anun jing kông ti hơmâo iâu pơthưr rơbêh 120 boh rơdêh, măi mok, hrŏm hăng 200 čô kông ñơn, kĭ sư man pơkra hrơi mlăm mơtăm, kah pơpha jing lu tal ngă bruă amăng ha hrơi, ngă bruă wơ̆t hăng hrơi pơdơi mơtăm kiăng kơ tañ. Hơdôm bruă yôm phun amăng bruă man pơkra lĕ tuh ia mơtuir pơkra jơlan kơsu tal 1 hăng 2, man pơdong jơlan brơi ană plơi rôk nao rai, brơi rơdêh dưi nao rai jăng jai; laih dong kông ti ăt hơmâo hơdră gum djru mơnuih mă bruă dong.“Adơi ayong kông ti glăk ngă bruă wơ̆t amăng hrơi kơnuk kơna pơdơi “3 ca, 4 kíp”, hơmâo prăk apah, prăk blan tla brơi djơ̆ tơlơi pơkă”.

Ƀơi Kơčăo bruă tal 2 yua Ding jum man pơdong tuh pơ alin găn nao hơdôm boh să Krông Á, Yang Mao hăng Čư̆ Pui, hrơi mă bruă ăt dik dak, hơmâo pran dañ tui anun mơn. Ayong Nguyễn Đình Cường, kĭ sư mơ̆ng Kông ti pơčruh ngăn Grup bơwih ƀong Đạt Phương, anom bruă gơgrong man pơdong XL03 hăng 3 boh tơdrông toa hăng ngŏ hăng 1 arăt jơlan luh mut nao amăng čư̆ glông 2km, găn nao pơ să Čư̆ Pui (tơring čar Dak Lăk) lăi pơthâo, anai jing kơčăo bruă găn nao pơ kual hŭi rơhyưt hăng tơnap hloh. Abih bang glông jơlan lêng dŏ amăng glai rơwăng, čư̆ glông, pơđuai trun. Rim hrơi kông ti brơi nao hơdôm rơtuh čô kông ñơn hăng lu rơdêh, măi mok man pơkra tơdrông hăng man pơkra kjăp jơlan luh:“Ră anai 100 čô mơnuih glăk tuh bê tông tơdrông toa ƀơi Km64 črăn găn nao pơ să Čư̆ Pui; năng ai 200 čô mơnuih pơkŏn kah jing 2 grup man pơkra pơhrua yong, jơgăn pơkĕ tơdrông. Gơmơi gir ngă amăng hrơi kơnuk kơna pơdơi, hrơi năm, hrơi tơjuh ăt ngă mơn, ngă hiư̆m pă kiăng truh lơ 30/6/2026 lĕ amra dưi mă yua tơdrông hăng jơlan luh.

Ơi Phạm Văn Hòa - Kơ-iăng khua Khul wai lăng kơčăo bruă tuh pơ alin man pơkra ring bruă Ngă hmua hăng Jơlan nao rai tơring čar Khánh Hòa lăi pơhmư̆, ră anai tơlơi tơnap bruă čuk pơkra pok anih ngă jơlan ƀơi Kơčăo bruă tal 1 găn nao pơ tơring čar Khánh Hòa yua anom bruă ngă pô tuh pơ alin hơmâo pơklaih brơi laih. Anom bruă glăk pơčrâo brơi ƀing gơgrong bruă man pơdong prăp rơmet rơdêh, măi mok hrŏm hăng ƀing kông ñơn kiăng pơhrua tui hơdôm hrơi ngă kaih, wơ̆t amăng hrơi adai hơjan hlim hai:“Tơlơi tơnap prong hloh lĕ čuk pơkra pok anih pơkra jơlan giong laih, samơ̆ amăng bơyan hơjan lĕ tơnap biă mă hăng khŏm pơdơi hĭ. Ƀing gơgrong tuh pơ alin kơđot ia, bruăi ia kiăng ia tañ thu či man pơkra dong. Pran jua yak rơgao hơjan hlim jing adơi ayong lêng kơ gir ngă djơ̆ hăng hrơi pơkă”.

Ơi Trương Công Thái, Kơ-iăng khua jơnum min mơnuih ƀôn sang tơring čar Dak Lăk, pơsit mah bruă man pơkra ƀơi Kơčăo bruă mrô 3 kơnong kơ dưi ngă 80% đôč, jing kaih 20% samơ̆ hăng pran jua ngă bruă hơdeč, ƀu hơmâo hrơi pơdơi, kiăng dưi brơi rơdêh nao rai amăng rơnuč thun 2025 amra dưi mơn. Ơi Trương Công Thái brơi thâo:

“Dak Lăk glăk mut amăng bơyan hơjan, gơmơi git gai črâo brơi pô gơgrong man pơkra tuh kơsu ƀơi atur jơlan lơ̆m huăi hơjan; tơdah hơjan lĕ pơkra pơnăng pơgăn, tuh bê tông pơgăn glông jơlan hăng pơkra glông jơlan nao rai rơnuk rơnua. Hăng pran jua gir kơtir, gơmơi ƀuăn amra brơi rơdêh nao rai amăng rơnuč thun 2025”.

Hăng tơlơi gir run kơtang mơ̆ng pô tuh pơ alin, anom bruă gơgrong man pơkra, jơlan rơdêh đuăi hmar blung a tô glai rưng hăng ia rơsĭ ƀơi Dơnung Tong Krah amra dưi ngă giong amăng thun 2027, pok rai tơlơi gêh gal pơđĭ tơlơi bơwih ƀong - mơnuih mơnam, mring hăng pơhlôm pơgang lŏn ia - rơnuk rơnua amăng hrơi blan tơdơi kơ pơmut hrŏm tơring čar./.