Mơ̆ng sa boh sang anŏ ƀun rin tơnap biă mă, tơdơi kơ 6 thun gir run mă bruă, biă mă ñu dưi pla phun sâm Ngọc Linh, sang anŏ ayong A Tŭ, plơi Pu Tă, să Măng Ri, ră anai hơmâo gơnam ƀong mơnong yua, djă pioh. Ñu brơi thâo, yua hơmâo jơlan hơdră pơtô brơi pơđĭ kyar pla phun kyâo jrao, pơjing jrao akha kyâo yua ping gah tơring čar Kon Tum hơđăp, laih anun hơmâo sang bruă prăk djru brơi čan prăk ngă hmua pla pơjing, anun sang anŏ ñu pla phun jrao yom anai. Ră anai đang phun sâm Ngọc Linh rơbêh 800 phun, kơnong yap mă hla hăng asar ba sĭ mơdrô rim thun sang anŏ hơmâo hmăi prăk rơbêh yua laih. Ayong A Tŭ ră ruai:

“Sang anŏ gơmơi hlâo adih tơnap tap biă mă,  asơi huă ƀu hơmâo djop. Dơ̆ng mơ̆ng tơring čar hơmâo jơlan hơdră djru mơnuih ƀôn sang pla phun pla ngă jrao akha kyâo, ta dưi čan prăk pla sâm Ngọc Linh. Hơdôm phun sâm pla mơ̆ng 4-5 thun ră anai hơmâo boh asar laih. Ta pô ăt rah anah či pla thim, sa črăn pioh sĭ mơdrô kiăng hơmâo prăk yua kơ sang anŏ. Pla phun sâm Ngọc Linh ƀu kơnong hơjăn ta ôh, mơnuih ƀôn sang amăng plơi abih tơlơi ư̆ rơpa, abih ƀun rin laih".

Mơ̆ng thun 2020-2025, tơring čar Kon Tum pơkă tơhnal pơtrun kiăng hrŏ mrô sang anŏ ƀun rin rim thun mơ̆ng 3-4%. Mah hnun, tơlơi gêh găl mă bruă dŏ lu kơƀah, tơnap tap hai, samơ̆ ƀuh rơđah mrô pơhrŏ ƀun rin ƀơi hơdôm să kual ataih, kual čư̆ siăng, lu hloh pơkă hăng hră pơtrun jơnum ping gah pơphô hlâo. Hơdôm hră pơtrun, tơlơi pơčrâo bruă nao hrŏm ngă tui hmao kru hrŏm akŏ bruă pơđĭ kyar, lir hơbit djru sit nik ƀuh rơđah, djơ̆ tơhnal pơkă mơ̆ng gong gai kơnuk kơna djop gưl, ƀuh hơmâo boh tŭ yua tong ten yơh. Ayong A Linh, plơi Đak Ka, să Tu Mrông, brơi thâo, ñu arăng djru brơi pơjeh pla, prăk čan hăng pơtô hơdră wai lăng, răk rem, anun yơh ƀu kơnong pơklaih mơ̆ng ƀun rin đôč ôh, dŏ hlăk pơđĭ kyar ngă pơdrong:

“Hơdôm thun laih rơgao sang anŏ gơmơi pla kơphê, pla phun bơr laih anun ngă hrŏm bruă wai pơgang glai rưng kiăng hơmâo prăk pơhrui glăi, yua kơ anun hrưn đĭ pơklaih mơ̆ng ƀun rin hăng čem rông ană bă hrăm hră djop. Dưi hơmâo pin ggah, kơnuk kơna djru ta amra gir run hloh hrăm tui hơdră wai lăng kơphê djơ̆ kiăng boh lu, boh hiam sĭ hơmâo nua ƀiă. Laih anun ta ăt hur har ngă bruă pơgang glai rưng, akŏ bruă amra pla phun kyâo jrao akha amăng gŭ đang kyâo glai kiăng ƀu kơnong abih ƀun rin đôč ôh, dŏ kiăng ngă pơdrong tui dơ̆ng”.

Mơ̆ng hơdôm jơlan hơdră, hră pơtrun, anŏ pơsir djơ̆ lăp mơ̆ng ping gah, kơnuk kơna ta anun 5 thun laih rơgao, lu gơnam đang hmua mơ̆ng mơnuih ƀôn sang djuai ania Sedang kual čư̆ siăng yŭ tơring čar Quảng Ngãi, kah hăng tiu glai, sâm hrĕ, phun jrao ngũ vị tử....hơmâo sĭ dưm pơdă amăng sang sĭ mơdrô prong siêu thị. Hơdôm wơ̆t pơdah thâo gơnam sĭ mơdrô online mơ̆ng đang sâm Ngọc Linh kual čư̆ siăng ataih hai, ăt pơthâo na nao re se mơ̆n. Lu plơi pla ataih, kual asuek, amăng glai klô, amănghlung dơlăm kah hăng Vi Rơngeo, Tu Thŏ, Kon Wơng Kia  ăt pơđĭ kyar tui laih yua ngă bruă čơkă tuai dŏ glăi amăng plơi pla.

Ơi Võ Trung Mạnh, Khua git gai ping gah să Tu Mrông, tơring čar Quảng Ngãi, brơi thâo, kual čư̆ siăng ataih anai ăt ĕp ƀuh anŏ gêh găl hơjăn păn gơñu laih anun pok pơhai ngă tui jơlan hơdră djơ̆ găl:

“Ping gah să hơmâo pơtong rơđah, anŏ gêh găl kơ ta pô. Pă boh să phrâo amăng boh yom phun čih hră pơtrun pơtong rơđah anun lĕ pơđĭ kyar, wai pơgang, lăng pioh, pla glăi phun jrao akha krâo, pơphun bruă čem rông hlô mơnong amăng glai lir hơbit hăng bruă čơkă tuai hyu ngui. Hơdôm să gah yŭ pơđĭ kyar bruă pla boh troh, čem rông hlô mơnong, dŏ hơdôm gah ngŏ lĕ wai pơgang glai rưng, pla phun jrao akha kyâo, rông hlô mơnong gah yŭ tơ-ui kyâo amăng glai, lir hơbit hăng bruă čơkă tuai hyu ngui jing anăp ngă bruă phun. Hơdôm să hơmâo čih pơkra tơhnal pơkă kơ rim să mă bruă rơđah rođong”.

5 thun laih rơgao, tơlơi pơtrun djơ̆ lăp mơ̆ng Ping gah hăng gong gai kơnuk kơna tơring čar Kon Tum hơđăp, hơmâo ngă tui amăng tơlơi hơdip mơda bơwih ƀong huă, ngă pơblih tơlơi pơmin, hơdră mă bruă mơ̆ng mơnuih ƀôn sang djuai ania Sedang, djru kơ hơdôm rơbâo sang anŏ pơ anai ƀu kơnong pơklaih hĭ ư̆ rơpa đôč ôh, dŏ abih ƀun rin hăng hrưn đĭ ngă pơdrong.

Mơ̆ng lơ 1/7/2025, 102 boh să, phường, tơring kual tơring čar Kon Tum hơđăp, pơmut jing 40 boh să, phường hăng pơmut hrŏm tơring čar Quảng Ngãi phrâo. Hơdôm să phrâo gah yŭ anih lŏn mơnai glai klô čư̆ siăng prong tơring čar Quảng Ngãi hơmâo pơphun giong laih jơnum ruah khua ping gah să tal I, pơtong rơđah bruă ngă phun amăng rơwang bruă 2025-2030 kiăng pơjing pran kơtang amăng čăl tŏ tui pơđĭ kyar hrâo.