Rơwang bruă 2020-2025, Ping gah Jơnum min mơnuih ƀôn sang tơring čar Dak Lăk hơmâo git gai, črâo bruă abih bang tui tơlơi pơtrun “rơđah mơnuih, rơđah bruă, rơđah boh than ba glăi”, ngă pơplih rơđah rơdông ƀơi djŏp bruă bơwih ƀong, gru grua, mơnuih mơnam, ling tơhan - pơgang rơnuk rơnua. Rơnoh đĭ kyar GRDP hơmâo 6,24%/thun; bruă pơkra gơnam, pơkra măi mok hăng apui lơtrik phrâo jing bruă hmư̆ hing bang bơngač; bruă tuai hyu ngui rŭ đĭ kơtang; prăk pơhrui bruă sĭ mơdrô pơ čar rơngiao hơmâo 11,2%/thun. Anih anom kual, sang măi pơkra gơnam hơmâo ngă giong, pơhưč lu kơčăo bruă tuh pơ alin prong, pok rai anih đĭ kyar phrâo.

Mut amăng rơwang bruă thun 2025-2030, Ping gah Jơnum min mơnuih ƀôn sang tơring čar Dak Lăk kiăng hơmâo rơnoh đĭ kyar GRDP mơ̆ng 11,5%/thun truh kơ lu hloh; prăk pơhrui yap tui akŏ mơnuih hơmâo 160 klăk/thun; prăk sĭ gơnam pơ čar rơngiao hơmâo rơbêh 13 klai dolar Mi; pơhưč 43 klăk wơ̆t tuai hyu ngui, hăng prăk pơhrui glăi hơmâo năng ai 97.150klai prăk, hrŏ trun mrô sang anŏ rin 2%/thun, kơnong ƀơi kual mơnuih ƀôn sang djuai ƀiă hrŏ trun 3%/thun. Tơlơi yôm phun đĭ kyar hơmâo bruă pơkra gơnam hăng măi mok, ngă hmua mă yua boh thâo phrâo, tuai čuă ngui hăng bơwih ƀong ia rơsĭ; pơlir hăng pơplih kơtang anih tuh pơ alin, pơtrut mă yua boh thâo ia rơgơi, pơčeh phrâo, mă yua boh thâo mrô hăng pơđĭ tui mơnuih mă bruă rơgơi.

Ơi Nguyễn Đình Trung, Ding kơna Khul khua gum bruă git gai Ping gah, Khua git gai Ping gah tơring čar Dak Lăk lăi, Jơnum tal anai amra ngă atur kơ sa rơwang đĭ kyar phrâo, pơsit tơlơi gơgrong bruă ba jơlan mơ̆ng Ping gah Jơnum min mơnuih ƀôn sang tơring čar ƀơi hrơi mông ngă brơi jing sit tơlơi kơtưn ngă pơdrong sah mơ̆ng Dak Lăk:“Ping gah Jơnum min mơnuih ƀôn sang tơring čar kiăng ngă tui klă djŏp tơlơi pơtrun mơ̆ng Ping gah hăng kiăo tui hơdôm rơnoh pơkă tui hăng Tơlơi pơtrun mơ̆ng Ping gah tơring čar, đah mơ̆ng ngă dưm kơnar, abih bang hăng tŭ yua hloh, biă ñu pơhlôm rơnoh đĭ kyar 8% truh kơ lu hloh amăng thun 2025, ngă phun atur kiăng hơmâo rơnoh đĭ kyar 2 mrô amăng rơwang bruă pơ anăp. Pơtrut hơdôm bruă pơsur tuh pơ alin, ngă bruă pơsir khut khăt mơtăm đah mơ̆ng tañ hơmâo prăk tuh pơ alin, biă ñu lĕ hơdôm ring bruă yôm phun. Tañ lăi pơthâo pơsir hĭ tơlơi tơnap, kiăng đĭ kyar bơwih ƀong huă mơnuih mơnam tañ hloh amăng rơwang bruă pơ anăp”.

Ping gah Jơnum min mơnuih ƀôn sang tơring čar Dak Lăk pơsit tơlơi kiăng ngă amăng rơwang bruă pơ anăp thun 2025-2030 lĕ: Pơđĭ tui tơlơi rơgơi mơ̆ng khua mua git gai, tơlơi kơtang mơ̆ng Ping gah; tơlơi gum pơgôp, ha pran jua gum mngă truh kih bruă mă truh pơ thun 2030. Pơtrut pơplih anom bruă kơnuk kơna, pơplih kơtang tui anih tuh pơ alin sĭ mơdrô, pơtrut bơwih ƀong mơnuih ƀôn sang ngă pô, pơđĭ tui tơlơi rơgơi mơ̆ng mơnuih mă bruă; pơđĭ tui tơlơi rơgơi wai lăng kông ngăn gơnam tam hăng pơgang ayuh hyiăng anih anom; pơđĭ tui kơtang boh thâo ia rơgơi măi mok, pơčeh phrâo rơgơi, pơplih boh thâo mrô; pơƀut đĭ kyar bơwih ƀong huă nao hrŏm hăng boh thâo mrô; hơdjă agaih, mơtah mơda, gum akŏ pơdong tơring čar Dak Lăk hơđong kjăp, đĭ kyar, pơdrong sah, rơgơi, gru grua hiam, kjăp pran hăng lŏn ia mut amăng rơnuk phrâo - rơnuk hrưn đĭ mơ̆ng djuai ania Việt Nam”.