Mơguah anai (5/9), ƀơi Anom jơnum dêh čar pơ̆ Hà Nội, Ding jum pơtô pơhrăm dêh čar pơphun ngă Lơphet hơdor glăi 80 thun hrơi gru grua bruă Pơtô pơhrăm hăng pok phun thun hrăm 2025-2026. Anai lĕ tal blung a, giăm hmâo 30.000 čô čơđai sang hră, ƀing hrăm gưl dlông hrŏm 1,7 klăk čô nai pơtô čơđai amăng đơ đam dêh čar nao pơhmư̆ mông ngă lơphet pok phun thun hrăm hrŏm, tô nao rai mơ̆ng ataih, gum hrŏm kơkuh khăn gru hăng adôh tơlơi adôh bơni lŏn ia.

Nao pơhmư̆ hmâo Khua git gai Ping gah dêh čar ta ơi Tô Lâm, Khua mir sir dêh čar ta ơi Lương Cường, Khua dêh čar ơi Phạm Minh Chính, Khua git gai pơ ala mơnuih ƀôn sang dêh čar ơi Trần Thanh Mẫn hrŏm hăng khua git gai, khua hơđăp git gai Ping gah, Kơnuk kơna; khua pơ ala kơ hơdôm ding jum, grŭp, gơnong bruă hăng hơdôm khul grŭp jar kơmar ƀơi dêh čar Việt Nam. Thun hrăm 2025-2026 dưi pơsit lĕ thun hrăm tal blung a pok pơhai hơdôm tơlơi pơtrun pơsit yôm phăn mơ̆ng Ping gah hăng Khua pơ ala mơnuih ƀôn sang, amăng anun hmâo Tơlơi pơtrun pơsit kơ pơtô pơhrăm čơđai anet brơi kơ čơđai mơ̆ng 3-5 thun, Tơlơi phiăn pioh kơ bruă pơtô pơhrăm hăng hơdră gum djru, djru prăk hrăm.

Gơnong bruă pơtô pơhrăm pơsit anăn ñu thun hrăm 2025-2026 jing “Ngă kơjăp – Pơčeh phrâo – Pơplih phrâo – Pơđĭ kyar” hăng 10 bruă jao, jơlan pơsir phun pioh ngă ba glăi bôh tơhnal hơdôm hơdră pơtrun, hơdră bruă gum djru mơ̆ng Ping gah hăng Kơnuk kơna kơ pơtô pơhrăm, ngă tui truh kih hơdôm bruă ba tơbiă. Ngă lơphet hơdor glăi 80 thun hrơi gru grua bruă Pơtô pơhrăm hăng pok phun thun hrăm 2025-2026 ƀu kơnong kơ lok glăi phiăn juăt gru grua, čih pioh hơdôm tơlơi gum hơgôp prong mơ̆ng Gơnong bruă pơtô pơhrăm pioh kơ bruă ngă hơkrŭ mơ̆ng Ping gah hăng lŏn ia ôh mơ̆, ñu dô̆ jing tal pioh rŭ tơgŭ bruă gơgrong amăng bruă pơtô pơhrăm đơ đam dêh čar lăi ha jăn hăng abih bang mơnui mơnam ƀơi anăp tơlơi kiăng pơđĭ kyar mơ̆ng lŏn ia amăng rơnuk phrâo./.