Pơhiăp ƀơi mông jơnum tơña, ơi Trần Thanh Mẫn, Khua git gai pơ ala mơnuih ƀôn sang dêh čar ta brơi thâo: Anai lĕ tal blung a amăng rơwang bruă tal 15, Jơnum min apăn bruă phun pơ ala mơnuih ƀôn sang dêh čar pok pơhai bruă mă “krăo lăng glăi”, pơdah rai bruă mă glăm ba prong mơ̆ng Jơnum min apăn bruă phun pơ ala mơnuih ƀôn sang dêh čar amăng bruă krăo lăng đut tơhnal ngă tui tơlơi rơkâo, bruă pơtrun mơ̆ng ƀing pơ ala mơnuih ƀôn sang dêh čar, Jơnum min apăn bruă phun pơ ala mơnuih ƀôn sang dêh čar. Mơ̆ng anun, pơtong glăi hlom bom, ngă rơđah hloh tơlơi tơnap tap, anŏ gun lơ̆m hlăk ngă tui laih anun pơsir hĭ, pơđĭ hloh tơlơi gơgrong ba mơ̆ng djop sang bruă krăo lăng.

Khua git gai pơ ala mơnuih ƀôn sang dêh čar đăo kơnang, ƀing pơ ala mơnuih ƀôn sang dêh čar hăng tơlơi thâo, kơhnâo tơgơi mơ̆ng rim pô, pran jua akŏ pơdong, lăi pơthâo brơi Kơnuk kơna, kơ ƀing khua ding jum, khua anom bruă gưl dêh čar kiăng git gai pơčrâo ba, pơsir hĭ tơlơi kơƀah, tơdu, đah mơ̆ng pơsir hĭ tơlơi tơnap gun gan anun. Ƀing ding kơna amăng Kơnuk kơna, ƀing khua apăn akŏ gơnong bruă ăt pơdah rai pran jua tơlơi glăm ba amăng bruă mă, gir run tŭ ư, lăi glăi tơpă djơ̆ tơlơi hăng tơña, pơdah thâo bruă či ngă, hơdră či pơsir tŭ yua djop tơhnal pơtrun, bruă jao mơ̆ng ƀing pơ ala mơnuih ƀôn sang dêh čar, mơ̆ng kơnuk kơna ba tơbiă amăng thun 2024 hăng Hră pơtrun Jơnum ruah khua ping gah dêh čar ta tal 13 pơkă.