Ƀơi mông bưp, Grup khua mua pơ ala mơnuih ƀôn sang ƀơi Hậu Giang lăi pơthâo hơdră či jơnum lok rơma, khua mua pơ ala mơnuih ƀôn sang dêh čar tal XV; boh yôm phun lăi glăi tơlơi tơña, rơkâo đĭ mơ̆ng mơnuih ruah khua. Giong anun, lu mơnuih ƀôn sang dưi ruah khua pơhiăp rokâo đĭ, mơ-it kơ ƀing pơ ala tơlơi mơnuih ƀôn sang tơguan pơsir ƀơi tơring čar.

.

Pơhiăp đĭ ƀơi mông bưp, ơi Trần Thanh Mẫn, Kơ-iăng khua pơ ala mơnuih ƀôn sang dêh čar pơdah pran jua hok mơak ƀuh tơring čar Hậu Giang hơmâo yak pơblih phrâo pơđĭ kyar tañ amăng klâo blan tal sa thun anai, rơnoh pơđĭ kyar  truh rơbêh 12%, ba akŏ hlâo amăng dêh čar. Thun blan pơ anăp anai, Kơ-iăng khua git gai pơ ala mơnuih ƀôn sang dêh čar ta rơkâo, Hậu Giang pok pơhai klă hloh ngă tui Hră pơtrun jơnum ping gah dêh čar tal XIII, Hră pơtrun mơ̆ng ping gah tơring čar Hậu Giang tal XIV; kiăng đing nao bruă pơtô hrăm mơnuih apăn bruă djru hrom bruă pơđĭ kyar ƀơi tơring čar; akŏ pơdong glông bruă kơđi čar tơpă rơgoh, kjăp kơtang dưi djơ̆ bruă kiăng amăng rơnuk phrâo.