Mơng lơ 11 truh lơ 15/9, grup Khua pơ ala mơnuih ƀôn sang dêh čar Dak Lak pơphun hơdôm tal pel ĕp kơ bruă mă ƀơi gong gai dua gưl hăng bruă pok pơhai akŏ bruă pơđĭ kyar bơwih ƀong huă-mơnuih mơnam thun 2025, hăng hơnong pơkă pơđĭ kyar bơwih ƀong huă 8% pơ glông. Grup hyu mă bruă pơpha jing 2 grup, nao pel ĕp pơ 8 boh să, phường hơmâo Xuân Lãnh, Sông Cầu, Phú Yên, Tuy An Nam, Krông Năng, Krông Pač, Ea Kar hăng phường Buôn Ma Thuột. Ƀơi hơdôm boh ƀon lan, grup amra hmư̆ hră lăi pơthâo, bơkơtuai hăng khua mua gưl Ping gah, gong gai, jơnum min djop djuai ania mơnuih mơnam, hơdôm gơnong bruă bơdjơ̆ nao kơ bruă ngă tui bruă jao pơđĭ kyar bơwih ƀong huă-mơnuih mơnam, bruă pơplih ngă hră pơ-ar, pơplih mrô hăng bruă mă mơng gong gai tơdơi kơ dưm dăp tui hơbô̆ bruă dua gưl.

Sit biă ñu ƀơi sa, dua boh ƀon lan brơi ƀuh, hrŏm hăng hơdôm anŏ pơplih phrâo, hơbô̆ bruă gong gai dua gưl ƀuh lu tơlơi tơnap tap. Bruă mă đĭ lui tui tơdơi kơ pơmut hrŏm lơm biên chế aka ƀu kah pơpha lăp djơ̆, lu bruă mă anun lĕ boh thâo măi mok,  prăk kak ăt dŏ kơƀah mơnuih apăn bruă, ngă bruă mă jai lu tui. Hrŏm hăng anun, gơnam măi mok, anih anom aka ƀu lăp djơ̆ hăng tơlơi rơkâo, glông yua măi mok aka ƀu hơđong, bruă ngă hră pơ-ar lŏn mơnai hăng sa, dua hră pơ-ar mơng ataih bưp lu tơnap tap…Grup pel ĕp amra tum pơƀut glăi lăi pơthâo Jơnum min apăn bruă Khua pơ ala mơnuih ƀôn sang dêh čar kiăng rơkâo hơdră pơsir brơi hmao tlôn.