Mông pơƀut glăi bruă mă pơtop hrăm anun hơmâo rơbêh 40 rơbâo čô mơnuih mơ̆ng djop khul tơhan mơnuih ƀôn sang, kông an mơnuih ƀôn sang, khul grup djop sang bruă amăng mơnuih ƀôn sang, khul ayup diăp, tơki dŏ dong hăng ƀing pĕ gông brô̆ ayup diăp gah ling tơhan, khul tơhan djă phao kơtuang, rơdêh tơhan, gơnam yua gah ling tơhan, hrŏm hăng lu khul mơnuih apăn bruă amăng kơnuk kơna gum rŭi hrŏm.

Biă mă ñu, pok blung mông jơnum pơƀut glăi bruă rơbat pơtrui hơmâo tơlơi pôr pơhiăp lăi pơthâo ƀơi anăp pơdah amăng tivi pơtruh nao rai mơ̆ng Khánh Hòa, pơƀuh brơi rup rơbat pơtrui ling tơhan blah ngă ƀơi kual ia rơsĭ, hơmâo ƀattô mur, ƀattô tơhan sơlup pơgiăng phao amrom apui, ƀattô phao amrom apui, djop mơta khul tơhan pơlih ia rơsĭ, khul hyu sem lăng bruă mă akan hơdang, khul nai ia jrao tơhan, rơdêh por bĕk....Lăng yak rơbat pơtrui tong ten kơtang biă mă, khul ling tơhan buh sum ao, rơbat tơpă hơđong, dong kơjăp, nao pơ anăp, giong anun tơhan kông an hăng khul djop sang bruă kơnuk kơna hăng mơnuih ƀôn sang rŭi nao kiăng pơƀuh tơlơi lăp pơ-ư ang djuai ania khin hơtai, râo pơdưh tơlơi pơmin pran jua hing ang mơ̆ng lŏn ia hơkrŭ blah ayăt đưm, kơjăp amăng bruă man pơdong hăng pơgang dêh čar. Tui hăng akŏ bruă, hlâo kơ mut nao mông jơnum ngă yang prong juăt lăi Ngă lơphet prong sit nik amăng mơguah lơ 2/9, mông pơƀut glăi bruă rơbat pơtrui, rŭi tơhan sa wơ̆t dơ̆ng tal rơnuč či tlam lơ 30/8.