Sơmơ̆, lơm pel ĕp dơlăm ƀiă dong mrô mơnuih apăn bruă djuai ania ƀiă ƀơi sa, dua anih anom, gơnong bruă, sang bruă gưl tơring čar; anom bruă, khul grup gưl tơring glông, hơdôm anih anom mă bruă pơkŏn dŏ aset, pơpha aka ƀu bơkơnar; bruă ĕp pơmut, pơplih anih mă bruă, ruah pơhrua, dưm dăp mơnuih apăn bruă djuai ania ƀiă dŏ kaih, bruă prap lui, pơtô hrăm, dưm dăp mơnuh apăn bruă djuai ania ƀiă amăng sa, dua boh ƀon lan, anih anom mă bruă aka ƀu djơ̆ hrŏm, aka ba glăi tŭ yua hloh….Hrŏm hăng anun lu mơnuih apăn bruă djuai ania ƀiă hơmâo pơtô hrăm brơi truh anih samơ̆ aka ƀu kjăp amăng bruă git gai wai lăng, kah hăng hơdôm jao bơdjơ̆ nao.

Tơkeng rai amăng sang anŏ hơmâo gru grua ngă hơkrŭ, amĭ djuai ania Sêdang, ama lĕ Yuăn, yă Nguyễn Thị Liên, Khua git gai Ping gah tơring glông Đăk Hà, lăi pơthâo tơpă, hrŏm hăng bruă ngă gêh gal brơi mơng gưl Ping gah, gong gai, mơnuih apăn bruă Ping gah djuai ania ƀiă kiăng gir run pơhrăm ƀing gơñu pô:

“Tui tơlơi sit nik brơi ƀuh lĕ sa, dua čô mơnuih apăn bruă djuai ania ƀiă, pran jua mă bruă hăng tơlơi gơgrong aka ƀu prong, dŏ hŭi mlâo. Laih dong ƀing apăn bruă yua Khul apăn bruă Ping gah tơring glông wai lăng, kâo ƀuh dŏ sa, dua čô mơnuih git gai amăng bruă kơđi čar, bơwih ƀong huă, gru grua aka ƀu pơčeh phrâo, aka ƀu hơdeč hmar. Ƀing apăn bruă djuai ania ƀiă kiăng gir run lu ƀiă dong”.

Ƀơi anăp kơ bruă jao amăng rơwang pơplih phrâo, bruă ĕp pơmut lu, klă ƀiă dong mơnuih apăn bruă djuai ania ƀiă amăng tơring čar Kon Tum glăk jing tơlơi kiăng ngă hloh. Samơ̆, tui tơlơi sit nik brơi ƀuh mah tơring čar glăk ngă tui jơlan gah ƀing apăn bruă dŏ kơƀah tơlơi hơget thơi amra pơtô brơi tơlơi anun hăng đing nao kơ bruă pơtô hrăm amăng git gai wai lăng, samơ̆ bruă ngă tui bưp lu tơlơi gun bơdjơ̆ nao hơdră pơtô hrăm brơi, ngă mơ lu mơnuih apăn bruă djuai ania ƀiă aka ƀu dưi hrăm kiăng kjăp amăng bruă mă. Ơi Lê Viết Nam, Kơ-iăng khua gơnong bruă wai lăng mơnuih apăn bruă tơring čar Kon Tum brơi thâo, hơdôm tơlơi gun anai kiăng tañ pơsir hĭ.

“Ră anai tơlơi pơtrun hăng tơlơi črâo ba kơnong ƀing công chức tơdah ba nao pơtô hrăm brơi kah hơmâo hơdră djru brơi. Bơ ƀing viên chức hơmâo anih anom mă bruă amra duh brơi mơ̆ ră anai glăk ngă tui hơdră ĕp mă, yua mă, hơdôm anom bruă hơmâo ƀing apăn bruă kiăo tui hrăm amra tơnap biă mă kiăng djru brơi. Amăng hrơi blan rơgơi lu mơnuih apăn bruă kiăo tui hrăm mă hơjăn. Ră anai bruă pơtô hrăm hơget thơ ăt kiăng ĕp anih pơtô brơi anun bruă ngă hră pơ-ar bưp lu tơnap tap”.

Amăng hơdôm thun rơgao, bruă yôm phăn amăng pơjing, ĕp pơmut mơnuih apăn bruă djuai ania ƀiă amăng tơring čar Kon Tum anun lĕ mơng hơdôm boh sang hră kơnuk kơna čem rông ba. Ƀing čơđai djuai ania ƀiă amăng tơring čar hơmâo Ping gah, kơnuk kơna hăng gong gah ƀon lan čem rông ba. Samơ̆ tui yă Y Ngọc, kơ-iăng khua jơnum min mơnuih ƀôn sang tơring čar Kon Tum, yua hơdră djru kơnong brơi ƀing čơđai hrăm abih anih 12 anun lu čơđai mah hrăm hră rơgơi samơ̆ ăt ƀu dưi kiăo tui hrăm gưl prong. Yua anun kiăng hơmâo hơdră djru brơi dong kiăng hơmâo lu dong mơnuih apăn bruă djuai ania ƀiă mơng hơdôm boh sang hră kơnuk kơna čem rông ba:

“Čem rông ba ƀing čơđai truh abih anih 12 tơdơi anun lu čơđai ƀu dưi hrăm đĭ dong tah. Sa, dua čô čơđai mut hrăm gưl prong ha thun duh prăk hrăm hră mơng 25-30 klăk prăl mơ̆ ƀing čơđai sang anŏ tơnap tap. Tơdah gong gai djru lu čơđai hrăm tui anun ăt ƀu dưi lơi. Gơnong glông, Khua pơ ala mơnuih ƀôn sang ăt kơsem min hăng ƀing čơđai djuai ania ƀiă kual tơnap tap lơm mut hrăm gưl prong amra djru brơi ƀing čơđai prăk hrăm hră mơng 20-30% mơ̆ dŏ glăi lĕ kơnuk kơna amra djru brơi”.

Phrâo anai amăng tal hyu pel ĕp, krăo lăng kơ bruă ngă tui tơlơi phiăn kơ bruă ĕp pơmut mơnuih apăn bruă djuai ania ƀiă, rơwang thun 2016-2023 ƀơi tơring čar Kon Tum, ơi Y Thanh Hà Niê Kđăm, Ding kơna khul apăn bruă Ping gah, Ding kơna Jơnum min apăn bruă khua pơ ala mơnuih ƀôn sang, Khua khul djuai ania mơng Ƀirô khua pơ ala mơnuih ƀôn sang hrŏm hăng bruă tŭ yap tơlơi rơkâo mơng tơring čar Kon Tum amăng bruă pơjing mơnuih apăn bruă djuai ania ƀiă ăt lăi pơtong:

“Tơring čar tŏ tui đing nao pơhưč, dưm dăp mơnuih apăn bruă, viên chức, công chức djuai ania ƀiă lăp djơ̆ hăng tơlơi gal amăng ƀon lan. Amăng anun đing nao hrưn đĭ klă dong, tŭ yua bruă pơtô hrăm tơlơi djuai ania ƀiă kiăng pơhlôm jê̆ giăm hăng mơnuih ƀôn sang, hluh rơđah hăng thâo pap kơ mơnuih ƀôn sang. Kơtưn amăng bruă git gai, pel ĕp na nao, lăng bruă ngă tui tơlơi črâo trun, hơdră bruă mơng Ping gah, kơnuk kơna, mơng gong gai ƀon lan amăng bruă pơjing mơnuih apăn bruă djuai ania ƀiă”.

Kiăng hơmâo ƀing mơnuih apăn bruă djuai ania ƀiă lu tui hăng kjăp bruă, hrŏm hăng tơlơi gir run pơsir hĭ tơnap tap, tơring čar Kon Tum ăt glăk ngă tui bruă ĕp pơmut, dưm dăp, ruah pơhrua…tui tơlơi pơkă tong ten, tơpă sit, ngă gêh gal kiăng ƀing apăn bruă djuai ania ƀiă hơđong pran jua pơhrăm gơñu pô hăng anih pran jua mă bruă.

Pơsit tong bruă ĕp pơmut, ruah mơnuih apăn bruă tui tơlơi pơtă mơng Khua git gai Ping gah dêh čar hơđăp ơi Nguyễn Phú Trọng anun lĕ kiăng pơplih phrâo, jing “kal kjăp” mơng bruă jao “akŏ phun”, hơdjơ̆ nao bruă phun mơng Ping gah, bruă jao kơđi čar, Ping gah tơring čar Kon Tum glăk pok pơhai ngă tui klă tơlơi črâo trun mơng Ding jum kơđi čar kơ jơnum Ping gah djop gưl anăp nao Jơnum Ping gah đơ đam dêh čar tal XIV, amăng anun gir run pơjing mơnuih apăn bruă Ping gah djuai ania ƀiă rơwang thun 2025-2030 hăng anăp nao truh thun 2045 brơi pơhlôm djop, kjăp bruă kiăng kal kjăp, bah amăng sir khŏp./.

Tơlơi čih 1: “Kon Tum pơjing khul mơnuih djuai ania ƀiă apăn bruă pioh pơđĭ kyar tañ, kơjăp phik

https://vov4.vov.vn/jarai/toloi-hing-ang-monuih-topul-thoi-su-xa-hoi/but-2-toloi-cih-kon-tum-pojing-khul-monuih-djuai-ania-bia-apan-brua-kiang-nga-kojap-brua-ma-brua-gogrong-toloi-cih-1-kon-tum-pojing-khul-monuih-djuai-ania-bia-apan-brua-pioh-podi-kyar-tan-kojap-phik-461358.vov4