Yap rim hrơi truh tal pơplông mă ƀăng gưl 3 thun 2023, lu čơđai sang hră ƀu tlaih dô̆ pơmin yua kơ anai lĕ tal pơplông yôm phăn ƀơi anăp ruah bruă hrăm, bruă mă pơgi kơdih anai.

Thun anai, tơring čar Dak Lak hmâo rơbêh kơ 20.000 čô čơđai rơkâo pơplông ƀơi 32 bôh anih anom pơplông pơ̆ 15 bôh tơring glông, plơi prong amăng tơring čar. Kiăng tal pơplông mă ƀăng gưl 3 thun 2023 ba glăi bôh tơhnal klă hloh, Gơnong bruă pơtô pơhrăm tơring čar Dak Lak glăk prăp lui klă hơdôm tơlơi bơdjơ̆ nao tal pơplông. Amăng anun bôh yôm hơkrŭ đĭ bôh thâo, pơsit bôh thâo čơđai kiăng pơpha bruă hrăm glăi glăk dưi đing nao. Ơi Phạm Đăng Khoa, Khua Gơnong bruă pơtô pơhrăm tơring čar Dak Lak brơi thâo: Truh ră anai, bruă prăp lui kơ tal pơplông mă ƀăng gưl 3 thun 2023 glăk dưi pok pơhai djơ̆ rơnoh pơkă. Hrom hăng bruă pel ĕp glăi, pel ĕp anih anom mă yua pơhlôm tơlơi rơkâo mơng Ding jum pơtô pơhrăm, pơhrăm mơnuih mă bruă wai lăng čơđai pơplông. Hơdôm bôh sang hră hmâo čơđai pơplông mă ƀăng gưl 3 glăk hrăm glăi tơlơi hmâo hrăm, pơphun pơsit bôh thâo tui tơlơi pơplông lông lăng mơ̆ Ding jum pơtô pơhrăm ba tơbiă pioh pơpha čơđai hrăm glăi kiăng lăp djơ̆.

 “Anăp nao mơnuih lĕ ƀing čơđai tŭ mă tơlơi hrăm ƀu lu kiăng pơphun djru brơi čơđai hăng hơdôm bôh sang hră ăt pơpha mơn bruă nai pơtô hmâo tơlơi găn rơgao lu amăng bruă pơhrăm glăi brơi čơđai anai kiăng ƀing čơđai hmâo djop bôh thâo hăng phing kơ pran jua pioh gum hrom pơhlôm tal anai”.

Tui hăng tơlơi pơkă mơng Ding jum pơtô pơhrăm, mơng lơ 4/5, čơđai pơplông amăng đơ đam dêh čar pơphun ngă hră rơkâo pơplông mă ƀăng gưl 3 thun 2023. Hơdôm hrơi ngă hră rơkâo truh 5 mông čơtlăm lơ 13/5. Čơđai glăk hrăm anih 12 ƀơi hơdôm bôh sang hră gưl 3, anom pơtô pơhrăm bruă mă hăng pơtô brơi anih 12 rơkâo pơplông mă ƀăng tui hơdră lăng nao rai mơng ataih, čơđai rơkâo pơplông mơng gah rơngiao ngă hră ƀơi anăp rơkâo ƀơi anăp.

Jai giăm truh hrơi pơplông mă ƀăng gưl 3 thun 2023 truh, adơi Phạm Chính Tuyến, čơđai sang hră anih 12, Sang hră gưl 3 Lương Thế Vinh, Hà Nội jai dô̆ pơmin lu, yua kơ anai dưi lăng lĕ tal pơplông yôm phăn hloh ƀơi anăp jơlan ruah mă hrăm bruă mă pơgi kơdih anai.

 “Ăt giăm truh hrơi pơplông laih dô̆ hmâo lu jơlan pioh mut gưl dlông. Ƀing gơmơi ăt tơnap mơn ruah mă, bơngot biă. Amăng rơwang  hrơi tơjuh lĕ kâo hmâo pioh laih 4 mông kiăng nao hrăm dong truh mơmot, bơ̆ hơdôm mông ƀu hmâo hrăm lĕ lông ngă lăng akô̆ tơlơi pơplông toán, sa akô̆ tơlơi pơplông Tơlơi Anglê laih anun pơkra mă pô. Bơ̆ Văn lĕ tơdah dô̆ mông kâo amra pơđok lăng hrăm pioh thâo hluh hloh kơ tơlơi hrăm”.

Tơlơi pơmin bơngot lom khom run hrăm glăi tơlơi pô hmâo hrăm prăp lui kơ tal pơplông mă ƀăng lĕ tơlơi pơmin hrom mơng ƀu ƀiă čơđai sang hră amăng hơdôm hrơi kơnong kơ dô̆ rơbêh kơ 1 blan dong amra pơphun pơplông. Anai lĕ rơwang kiăng ječ pioh čơđai hrăm glăi tơlơi hmâo hrăm mơng hơdôm mơta tơlơi hrăm amăng tal pơplông mă ƀăng gưl 3. Gah hơdôm bôh sang hră kiăng bruă pơhrăm glăi kơ ƀing čơđai ba glăi bôh tơhnal, hrom hăng bruă dăp glăi bôh yôm tơlơi hrăm, pơhrăm glăi bôh thâo hmâo hrăm phun kơ čơđai, nai pơtô dô̆ brơi čơđai ngă hơdôm tơlơi ba tơbiă, tơlơi pơplông ngă gru. Nai Vũ Thị Minh Trang, nai pơtô Ngữ văn, Sang hră pơtô pơlir gưl hrăm Alfred Nobel brơi thâo:

 “Hrom hăng hơdôm mông hrăm amăng anih lĕ ƀing čơđai ăt hmâo mơn hơdôm mông hrăm kơtưn đĭ dong hăng ăt triăng pơhrăm mơn hơdôm tơlơi ba tơbiă mơ̆ ƀing nai hăng gum hrom hăng ƀing nai amăng hơdôm mơta mông hrăm amăng anih hrăm”.

Khă amăng rơwang pơhrăm glăi ječ, samơ̆ ƀing nai hăng ƀing juăt bruă leng kơ pơtă čơđai khom hơđong pran jua, tơlơi suaih pral, gơgrong hlâo hrăm glăi tơlơi hmâo hrăm, bôh thâo phun rim mơta tơlơi hrăm. Nai prin tha Huỳnh Văn Chương, Khua Anom bruă wai lăng anô̆ kơjăp, Ding jum pơtô pơhrăm pơtă:

 “Ră anai ƀing čơđai glăk đing nao hrăm glăi lĕ bơnah gah Kơdư hăng biă ñu Anom wai lăng anô̆ kơjăp lĕ ƀing gơmơi pơtă ƀing čơđai hơđong pran jua hăng hrăm glăi tŏng ten tui jơlan hơdră, kiăo tui hơdôm akô̆ tơlơi pơplông mơng lu thun, biă ñu ƀing gơmơi phrâo lăi pơthâo mơng thun 2023. Ƀing čơđai gir run lĕ kơsem min tŏng ten akô̆ tơlơi pơplông, biă ñu hơdôm tơlơi tơña mă yua, mă yua lu pioh ƀing ta dưi ngă hmâo lu puang, pioh ruah mă ƀăng rah hăng djơ̆ hăng bruă anun lĕ ruah đĭ gưl dlông hăng tơlơi kiăng pơkon”.

Ding jum pơtô pơhrăm brơi thâo hmâo prăp lui abih bang laih măi mok, anih anom mă yua măi mok kơ bruă rơkâo pơplông. Ding jum pơtô pơhrăm ăt hmâo mơn bruă dô̆ gak hrơi mlăm pioh djru pơsir hơdôm tơlơi tơdah hmâo. Tal pơplông mă ƀăng gưl 3 thun 2023 amra pơphun mơng lơ 27 truh kơ 30/6. Bôh tơhnal pơplông pơkă hlâo amra lăi pơthâo amăng lơ 18/7./.