Jơnum min mơnuih ƀôn sang să Hòa Phú, tơring čar Dak Lăk hơmâo pơphun pok anih pơtô brơi rơbêh 140 čô mơnuih hrăm, jing ƀing mă bruă pơkra hră pơ-ar hăng ƀing pơ ala hơdôm anom bơwih ƀong amăng să. Pô pơtô lĕ mơnuih apăn bruă boh thâo ia rơgơi, ƀing nao hrăm ƀu kơnong hơmâo pơƀuh kơ boh thâo AI đôč ôh ăt hơmâo pơtô mă yua AI či ngă bruă ƀing gơñu glăk mă. Ơi Nguyễn Trung Hòa - Nai pơtô mơ̆ng Sang hră Cao đẳng Công thương Miền Trung, pô nao pơtô pơ anai brơi thâo:“Tơlơi phara mơ̆ng anih hrăm anai pơhmu hăng lu tal hrăm pơkŏn lĕ ƀing hrăm dưi mă yua boh thâo tơdơi kơ hrăm giong mơtăm. Ƀing gơmơi ƀu kiăo tui hơdră pơtô hơmâo hơđăp ôh, gơmơi djru ƀing hrăm thâo mă yua, pơhiăp tom djơ̆ hăng AI đah mơ̆ng tŭ yua djơ̆ hăng tơlơi kiăng. Rim čô khua, mơnuih amăng anom bơwih ƀong dưi pơjing kơ pô sa “AI djru bruă”, djru pơsir bruă brơi hơjăn ta hăng tŭ yua”.

Tui hăng khua mua să Hòa Phú, hơdôm hrơi blung a mă bruă tui hơbô̆ bruă gong gai dua gưl, să bưp lu tơlơi tơnap amăng bruă pơkra hră pơ-ar kơ mơnuih ƀôn sang hăng anom bơwih ƀong. Lu biă ñu yua ƀu hơmâo djŏp mơnuih apăn bruă. Ƀing khua mua, mơnuih mă bruă lĕ hơđăp samơ̆ bruă mă lĕ phrâo, rim anih mă bruă kơnong kơ hơmâo hơdôm čô đôč samơ̆ glăm ngă lu bruă phara tơdơi kơ dăp glăi gong gai.

Mơ̆ng tơlơi kiăng anun, khua mua să Hòa Phú pơsit kiăng aset mơnuih mă bruă samơ̆ dưi ngă lu bruă, jing khŏm thâo mă yua boh thâo mrô. Amăng anun, mă yua tơlơi rơgơi ană mơnuih pơčeh rai-AI jing hơdră tŭ yua biă. Să jak iâu ƀing kơhnăk apăn bruă kơ boh thâo mrô hăng AI glăk pơtŏp brơi, hăng pran jua “Hrăm giong lĕ khŏm thâo ngă mơtăm”. Ơi Đỗ Xuân Hiến - Kơ-iăng khua Jơnum min mơnuih ƀôn sang să Hòa Phú, tơring čar Dak Lăk lăi:“Tơdơi kơ pơtŏp hrăm, gơmơi kiăng rim čô khua, mơnuih mă bruă khŏm hơmâo sa “AI djru bruă” hơjăn či bơwih brơi bruă mă. Hlâo adih, sa mơta bruă kiăng ha hrơi čih pơkra, samơ̆ hăng AI kơnong kiăng 30 giây đôč. Bruă dŏ glăi lĕ tơlơi pơmin, tơlơi rơgơi mơ̆ng pô ta, bơ bruă lĕ hơmâo “pô djru bruă AI” laih djru ba”.

Ƀu kơnong ƀơi să Hòa Phú đôč ôh, ƀơi phường Tân An, tơring čar Dak Lăk, bruă mă yua boh thâo AI amăng bruă ngă hră pơ-ar blung a hơmâo tŭ yua laih. Amai Văn Thị Anh Đài - pô ngă bruă hră pơ-ar phường Tân An brơi thâo:“Mă yua boh thâo AI jing gêh gal biă mă kơ ƀing apăn bruă wơ̆t hăng mơnuih ƀôn sang. Hăng ƀing khua, mơnuih apăn bruă, gơmơi amuñ či pel ĕp sem lăng tơlơi dưi ngă bruă, thâo rơđah hră pơ-ar hơget yua gưl să pơkra. Hăng mơnuih ƀôn sang, AI ăt djru gơñu hơduah ĕp hăng thâo hră pơ-ar hơget dưi ngă hlao ƀơi phường, mơ̆ng anun huăi rơngiă mông, hăng amuñ hloh lơ̆m nao ngă hră pơ-ar”.

Sit nik brơi ƀuh, bruă mă yua AI hăng boh thâo mrô ƀu kơnong  djru plai ƀiă glêh tơnap kơ ƀing ngă bruă pơ să đôč ôh, ăt ba glăi tơlơi tŭ ư, djơ̆ pran jua, gêh gal kơ mơnuih ƀôn sang hăng anom bơwih ƀong lơ̆m nao ngă hră. Yă Phạm Hồng Hải, dŏ pơ phường Tân An, tơring čar Dak Lăk brơi thâo:“Hrơi anai sang anŏ gơmơi nao ngă hră yua lŏn hăng kơđŏm hră pơkŏn dong. Năng blung sư̆ rơbư̆ mơn, samơ̆ hơmâo ƀing mă bruă pơ să pơtô brơi anun jing ngă tañ biă. Tơdơi kơ mơ-it nao, kâo hơmâo hră pơkă hrơi nao mă amăng telephôn, gêh gal biă yơh”.

Kiăng mă yua boh thâo ia rơgơi sit nik mut amăng tơlơi hơdip, tơlơi gum hrŏm mơ̆ng hơdôm anom bơwih ƀong dăng kông - boh thâo măi mok jing yôm biă mă. Hrơi blan rơgao, hơdôm sang bruă dăng kông ăt gum tơngan hrŏm hăng gong gai ngă bruă anai. Hmư̆ hing lĕ Viettel Dak Lăk hơmâo ngă hrŏm hăng gong gai pơphun ngă lu hơdră ngă bruă tui mrô, bơwih tŭ yua kơ gong gai dua gưl. Ơi Nguyễn Thanh Bình - Kơ-iăng khua Viettel Dak Lăk brơi thâo:“Gơmơi hơmâo brơi pô djru bruă kơ ƀing khua, mơnuih apăn bruă jing mơnuih ƀu hơmâo biă ôh, pơƀut ngă rơbêh 2.000 mơta bruă bơdjơ̆ nao 23 tơlơi pơtrun phrâo kơ bruă kah pơpha, jao bruă mơ̆ng Kơnuk kơna. Pô djru bruă anai djru ba ƀing khua  ngă bruă djơ̆ hăng tơlơi phiăn, laih dong pơđĭ tui tŭ yua bruă mă”.

Hăng pran jua “Hrăm giong khŏm thâo ngă mơtăm”, hơdôm anih pơtŏp hrăm boh thâo mrô ƀơi să Hòa Phú ƀudah phường Tân An mơ̆ng Dak Lăk glăk pok jơlan phrâo, djru ba ƀing mă bruă pơ sang să ƀu kơnong thâo mă yua boh thâo mrô đôč ôh, ăt pơplih tơlơi pơmin, thâo mă yua măi mok boh thâo či bơwih brơi mơnuih ƀôn sang klă hloh amăng rơwang phrâo. Anai ăt jing hơdră ngă bruă rơđah rơđông kiăng hơdôm boh să phường amăng tơring čar pơphun ngă tŭ yua Tơlơi pơtrun 57 mơ̆ng Ding jum kơđi čar kơ boh thâo - ia rơgơi hăng pơčeh phrâo./.