Ƀơi ƀuôn Kniết, să Ea Ktur, tơring čar Dak Lăk, sang anŏ amai H’Lối Êban (djuai ania Êđê) pơphun ngui đĭ sang phrâo amăng tơlơi mơak mơai, dik dak, hơmâo neh met wa nao ngui tom. Sang phrâo hiam biă, ñu man pơkra 400 klăk, man tong krah đang kơphê glăk mơboh hơkriu, lăng nao pơ đang hmua mơtah mơda, ngă kơ anih anom pơ anai jing rơnuk rơnua, yâo mơak biă mă.

Amai H’Lối ră ruai: Hlâo adih sang anŏ ñu rin biă, hơmâo Kơnuk kơna djru brơi rơmô, jing tuh hơmâo 2 drơi; giong anun gơñu sĭ hĭ ană rơmô či blơi bui dong, phrâo sĭ hơmâo 50 klăk. Ră anai, gơñu pơhrui prăk phun ñu mơtăm lĕ mơ̆ng 6 sao kơphê, pla plah nao phun tiu hăng sâu riêng. Ană tơdăm ñu phrâo glăi mơ̆ng ngă tơhan, ană đah bơnai ñu glăk hrăm gưl 3. Hơmâo tơlơi hơdip dơnap ƀiă, mơak tui hăng anai, H’Lối Êban lăi:“Bơni kơ ƀing adơi ayong kông an hơmâo wai lăng ba ană plơi gơmơi, ngă hơđong kjăp amăng plơi pla. Ƀing kông an ăt pơtô brơi ană plơi ngă tui tơlơi pơtrun mơ̆ng Kơnuk kơna, bơwih ƀong đĭ kyar. Kar hăng sang anŏ gơmơi anai, mơ̆ng sang anŏ rin jing bơwih ƀong đĭ đăi ƀiă laih. Kơphê, tiu hai pơmă ƀiă mơn, laih anun hơmâo tom sâu riêng dong, rông thim rơmô, pơkom prăk amăng bơbui lŏn, anun jing sang anŏ gơmơi dưi man pơkra sang phrâo tui anai”.

Amai H’Nhân Niê dŏ ƀơi ƀuôn Kram să Ea Ktur brơi thâo, rim thun tơhan kông an lêng kơ iâu pơthưr Abih bang plơi pla gum wai lăng rơnuk rơnua Lŏn ia. mơ̆ng anun, djru neh wa thâo hluh tơlơi pơmin soh sat, pơčut pơčao mơ̆ng khul grup sat, pơblư̆ kơnuk kơna, ƀing kah ania pơpha djuai, plư pleč kiăng ƀong ia bah ƀing gơñu. Kông an ăt črâo pơƀuh bruă plư pleč prăk kăk mơ̆ng ƀing ngă soh tui plang internet, bruă hlăk ai đĭ rơdêh soh glăi...Amai H’Nhân Niê pơsit, ƀing đah kơmơi amăng să Ea Ktur lêng kơ gum ngă bruă “Abih bang mơnuih ƀôn sang gum pơgang rơnuk rơnua Lŏn ia”:“Adơi amai ƀing ta dŏ pơ sang khŏm pơtô ană bă anăm mut amăng telephôn, amăng măi tinh či tut like hăng pơƀuh hyu arăng lăng ƀudah ngă tui tơlơi pơčut pơčao pơblư̆ kơnuk kơna, ngă rung răng plơi pla. Gơmơi pơtă pơtăn na nao laih kơ ană amon, lơ̆m đĭ rơdêh hai hnun mơn, djŏp thun kah mơ̆ng dưi mơgăt rơdêh. Amăng khul đah kơmơi ăt pơtă ană amon, adơi amai ƀu dưi hmư̆ tui tơlơi plư pleč, pơčut pơčao mơ̆ng čar rơngiao ôh”.

Jing mục sư (pô pơtô đăo) wai lăng Khul đăo hiam tin lành să Ea Ktur, ơi Y Djan Êban dŏ ƀơi ƀuôn Kniết, să Ea Ktur - khua pơ ala Jơnum min pơ ala mơnuih ƀôn sang tơring čar Dak Lăk, brơi thâo: tơlơi hơdip mơ̆ng neh met wa trơi pơđao, yâo mơ-ak, dưi ngă yang hiam, dưi đăo hiam ăt yua hơmâo tơlơi pơgang ba mơ̆ng tơhan kông an djŏp gưl mơn:“Kâo lăng kông an mơ̆ng să truh pơ tơring čar gum pơgang ba lŏn ia hăng djru ba ană plơi rơnuk rơnua yâo mơ-ak. Pơhmutu, ƀu hơmâo kông an lĕ mơnuih ƀôn sang đĭ rơdêh nao rai ƀơi jơlan ƀu djơ̆ lơi yua ƀu thâo hluh; hơmâo lu tơlơi truh, tơlơi bơrơdjơ̆ wơ̆t hăng lu bruă pơkŏn dong. Kông an bruă blung a lĕ pơgang Lŏn ia, dua lĕ pơgang ba plơi pla. Tơlơi anun jing yôm biă mă”.

Hăng 23 thun ngă kông an, Trung tá Y Sila Êban, Khua grup Rơnuk rơnua - Kông an să Ea Ktur, tơring čar Dak Lăk pơ-ư ang biă mă yua gum djru pơgang rơnuk rơnua lŏn ia, pơhlôm hơđong kjăp tơlơi hơdip ană plơi pla:“Ră anai, kâo hơmâo sa čô ană đah rơkơi glăk hrăm kông an, kiăo tui bruă kâo mơn. Čang rơmang ană plơi pơ anai anăm hmư̆ tui ôh tơlơi arăng pơčut pơčao, gir ngă bruă, pla kơphê, pla tiu kiăng hơmâo prăk”.

Akŏ thun anai, ƀơi să Ea Ktur, Khul hlăk ai Kông an mơnuih ƀôn sang - Ding jum kông an ngă hrŏm hăng hơdôm anom bruă pơ Dak Lăk pơphun jơlan hơdră “Glăi pơ plơi pla”. Hrŏm hăng čuă jơmư, brơi gơnam kơ sang anŏ tơhan djai pơsăn drơi, jơlan hơdră anai jao glăi 1ring bruă “Anih pioh măi computer kơ ƀing čơđai” hăng brơi 100 anung prăk hrăm tơlơi Anglê, 20 boh rơdêh tang wang brơi kơ ƀing čơđai...Trung tá Du Lê - Khua kông an să Ea Ktur, tơring čar Dak Lăk brơi thâo, pơphun ngă bruă amăng hrơi mông yôm hloh pơkơdong, hyu mă mơnuih ngă soh tơlơi phiăn rơnuk rơnua hơđong kjăp hơdôm bruă ngă lơphet 80 thun Ngă hơkrŭ Blan Čơpăn truh kih, Hrơi akŏ pơdong Kơnuk kơna lŏn ia lơ 2/9, hăng Jơnum ruah khua ping gah djŏp gưl, ling tơhan hyu tir pơgang ba hmua pơdai, pơgang ba gơnam tam kơ mơnuih ƀôn sang:“Tal anai kông an pơtrut tui bruă pơkơdong ƀing ngă soh amăng hrơi blan ngă bruă kơtang hloh, pơhlôm hơđong rơnuk rơnua amăng bơyan pĕ sầu riêng, bơyan pĕ boh cau. Adơi ayong hyu tir, bưp ƀing khua đăo, mơnuih ană plơi djuai ƀiă đăo kơnang, pơtă pơtăn kơ neh met wa pơgang ba gơnam tam, lăng ba bơyan pơdai kơtor. Rơngiao kơ anun ngă hrŏm hăng kông an, tơdah đing đăo pô hlơi ngă soh lĕ lăi pơthâo tañ hăng kông an să”.

Pơwơ̆t glăi pơ să Ea Ktur, Dak Lăk amăng hơdôm hrơi Blan Čơpăn hing ang, djă gru đưm, ia mơtah mơda mơ̆ng đang kơphê, tiu, sầu riêng mơboh jor,...pơƀuh rai tơlơi hơdip trơi pơđao pơ anăp adih. Kiăng plơi pla Ea Ktur đĭ kyar, ƀing ling tơhan kông an glăk gum hrŏm hăng mơnuih ƀôn sang amăng rim tơlơi pơmin, hơdră ngă bruă; djă bong kjăp rơnuk rơnua, pơgăn tơlơi pơmin kah ania pơpha djuai, pơgang ba tơlơi hơdip rơnuk rơnua yâo mơ-ak kơ rim boh sang anŏ, plơi pla./.