Rôk nao ƀơi  jơlan bê tông prong rơhaih, hiam, agaih, ơi Y Lisa Niê, Khua grup ping gah plơi Tung Krăk, să Ea Drông, tơring čar Dak Lăk brơi thâo, anai jing tơlơi hơmâo mơ̆ng tơlơi tŭ ư ha pran, gum ngă mơ̆ng ƀing khua, mơnuih ping gah hăng mơnuih ƀôn sang. Glông jơlan bê tông anai glông 130m, kơnuk kơna djru blơi boh pơtâo, simăng, mơnuih ƀôn sang blơi mă čuah, kuăi dor jơlan hăng djru 100 hrơi mă bruă či pơkra giong, nao rai mơak, pơgiăng gơnam mơ-ak mơn, djru pơplih phrâo plơi pla:“Hăng bruă ngă Khua grup ping gah, kâo pơčrông sai lăng mơnuih ƀôn sang či pơkra jơlan nao rai truh pơ hmua, anai jing tơlơi dưi kiăng mơnuih ƀôn sang tŭ mă tơlơi dơnap, djru nao rai mơ-ak hloh. Kâo iâu ană plơi jơnum, iâu pơthưr mơnuih ƀôn sang gum ngă, pơčruh rim boh sang 600.000 prăk, hăng 80 boh sang anŏ gum pơčruh. Yua hơmâo thim prăk djru mơ̆ng kơnuk kơna anun jing jơlan hơmâo pơkra giong.”

Jơlan bê tông ƀơi ƀuôn Tung Krăk jing sa amăng hơdôm hơbô̆ bruă hmư̆ hing amăng bruă hrăm hăng hla tui Wa Hồ ƀơi să Ea Drông, tơring čar Dak Lăk, pơƀuh tơlơi gơgrong bruă nao hlâo, ba gru hlâo mơ̆ng ƀing khua, mơnuih ping gah amăng bruă man pơdong plơi pla phrâo amăng plơi. Hăng bruă pơpha brơi lŏn či pơkra jơlan hăng iâu pơthưr mơnuih ƀôn sang gum pơgôp, gơñu hơmâo pran đăo kơnang, hăng tơlơi tŭ ư mơ̆ng mơnuih ƀôn sang, djru jơlan hơmâo pơtruh hrŏm.

Ƀu kơnong amăng bruă man pơdong plơi pla phrâo đôč ôh, bruă hrăm hăng hla tui Wa ƀơi să Ea Drông ƀu kơnong pơƀuh hăng bruă lăng ba tơlơi hơdip mơnuih ƀun rin. Pok pơhai ngă hơdôm jơlan hơdră dêh čar pơtrun kơ hrŏ trun ƀun rin, să Ea Drông hơmâo hơdră djru anah phun pla, man pơdong sang dŏ, brơi čan prăk mơ̆ng Sang bruă prăk djru mơnuih ƀôn sang. Hơdôm hơdră djru anai, gêh gal brơi mơnuih ƀôn sang pơđĭ kyar bơwih ƀong, pơđĭ tui prăk pơhrui. Yua hnun, mrô sang anŏ rin mơ̆ng să hrŏ trun mơ̆ng 280 boh sang amăng thun 2024 dŏ glăi 214 boh sang amăng thun anai. Ơi Ya San Niê Kdăm, Khua plơi Ea Kjoh A, să Ea Drông, tơring čar Dak Lăk brơi thâo:“Hơdôm boh sang anŏ ƀun rin lêng hơmâo tơlơi gum djru mơ̆ng gong gai či pơđĭ tui bruă rông pla. Mơ̆ng thun 2023, amăng plơi Ea Kjoh A hơmâo 16 boh sang anŏ hơmâo djru bê či rông, rim boh sang hơmâo 8 drơi. Gơñu gir rông gơnam, hrôh lu. Lơ̆m bê prong, nua đĭ lĕ gơñu sĭ hĭ, mă prăk anun yơh či blơi ƀong, pơdong sang, čem rông ană bă hrăm hră. Tơlơi hơdip hơđong, gơñu hơđong bơwih ƀong, kiăo tui tơlơi pơtrun, tơlơi phiăn mơ̆ng kơnuk kơna”.

Să Ea Drông ră anai hơmâo akŏ pơdong yua pơmut 2 boh să Ea Drông hơđăp hăng Ea Siên, hơmâo 21 boh plơi, giăm 24.0000 čô mơnuih, amăng anun hơmâo rơbêh 70% jing mơnuih djuai ania ƀiă. Ping gah să hơmâo giăm 900 čô mơnuih ping gah, jơnum ƀơi 52 grup ping gah amăng să.

Hăng tơlơi pơplih phrâo, bruă hrăm hăng hla tui tơlơi pơmin, pran jua, kơnuih Hồ Chí Minh jing jơlan nao djơ̆ amăng bruă git gai, črâo bruă, pơdah amăng rim bruă ngă rơđah rơđông mơ̆ng rim čô khua, mơnuih ping gah. Ayong Hoàng Văn Dụng (djuai ania Nùng), mơnuih mă bruă măng Jơnum min pơ ala mơnuih ƀôn sang, Jơnum min mơnuih ƀôn sang să Ea Drông, tơring čar Dak Lăk lăi:“Hrăm hăng hla tui Hồ Chí Minh ƀu kơnong tơlơi pơtrun khŏm ngă hăng bruă mă rơđah, sit nik rim hrơi hăng bruă ngă mơ̆ng ƀing ta. Jing sa čô ping gah thun hlăk ai, mơ̆ng bruă mă rim hrơi, kâo ăt gir mă yua boh thâo ia rơgơi amăng bruă mă, lêng kơ hơduah ĕp tơlơi pơhing phrâo rim hrơi đah mơ̆ng kiăo hmao bruă mă, gir ngă klă bruă hơmâo jao”.

Yă H Thúy Mlô, Kơ-iăng khua ping gah să Ea Drông, brơi thâo, bruă hrăm hăng hla tui kơnuih Hồ Chí Minh ƀơi plơi pla jing bruă juăt ngă, pơplih klă amăng bruă akŏ pơjing Ping gah:“Bruă hrăm hăng hla tui kơnuih Wa jing djru pơđĭ tui tơlơi thâo pơmin, gơgrong bruă, thâo lăng glăi pô, pơplih glăi amăng anom bruă ping gah. Lu grup ping gah ăt pơtrut tui pran jua thâo lăng glăi tơlơi soh, ñim glăi, hơmâo pơdah rơđah pran jua kơsung nao pơ anăp mơ̆ng Ping gah, mơ̆ng anun djru akŏ pơjing ping gah jai hrơi klă, tơpă, kjăp kơtang hloh. Hăng ping gah să lĕ amăng bruă mơ̆ hmư̆ hing hrăm hăng hla tui kơnuih Hồ Chí Minh ăt hơmâo lu mơn hơbô̆ bruă. Hơdôm tơlơi hmư̆ hing anai ăt gum pơjing rai lu tơlơi pơplih klă amăng abih bang Ping gah să”.

Hăng hơdôm bruă ngă rơđah rơđông, sit nik, hơdră pơčeh phrâo, bruă hrăm hăng hla tui tơlơi pơmin, kơnuih Hồ Chí Minh ƀơi să Ea Drông djru akŏ pơdong ping gah mă bruă tơpă, klă, kjăp kơtang, pơdah pran jua gong gai jê̆ giăm mơnuih ƀôn sang, yua kơ mơnuih ƀôn sang. Laih dong, râu mơdưh pran kơtưn đĭ, pran jua gum pơgôp hăng akŏ pơdong plơi pla jai hrơi đĭ kyar, pơdrong sah, klă hiam./.