Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, jơnum lok anai amra pok pơhai lơ 20/10 hăng pơđut truh lơ 12/12. Him lăng ƀing pơ ala mơnuih ƀôn sang dêh čar amra sem lăng, pơsit hĭ 45 kơčăo bruă čih pơkra tơlơi phiăn dêh čar, hră pơtrun kơ bruă čih pơkra tơlơi phiăn dêh čar; 13 khul boh yom phun pơdjơ̆ nao tơlơi bơwih ƀong huă mơnuih mơnam, prăk kăk kông ngăn kơnuk kơna, bruă krăo lăng hăng lu tơlơi lăp đing nao pơkŏn; laih dơ̆ng, djop sang bruă ăt mơit nao 13 khul hră lăi pơthâo kiăng ƀing pơ ala pơđok hlâo, kơsem min tong ten.

Khă hnun, truh ră anai, kiah hơmâo 16/45 mơta tơlơi pơdjơ̆ nao čih pơkra tơlơi phiăn dêh čar dưi hơmâo Jơnum min apăn bruă pơ ala mơnuih ƀôn sang dêh čar pơgôp hiăp giong. Khua git gai pơ ala mơnuih ƀôn sang dêh čar rơkâo djop ding jum anom bruă, khua jơnum min djuai ania hăng khua djop sang bruă jơnum min lăng tong ten, kơsem min dơlăm bruă čih pơkra tơlơi phiăn, lăi pơthâo hăng pơtong glăi djop kơčăo bruă tơlơi phiăn kiăng tŭ yua sit nik, hmao kru pơtrut tui boh tŭ yua amăng bruă mă čih pơkra tơlơi phiăn dêh čar.