Ba nao kơsăk dưm ƀuăt, čai kơsu mut amăng kual pơgang păng rưng pơsơi hmâo bơbung pơgang, hlăk ai Nguyễn Chí Tâm, ƀơi plơi Dak Ri, să Tân Thành, mơ-ak lăi: Anai lĕ “Sang dô̆ 100 prăk” yua kơ khul hlăk ai să pơphun. Mơ̆ng rim ƀuăt nhôm 100 prăk, hlăk ai amăng să pơhrui pơƀut pơjing keh prăk djru hơdôm mơnuih tơnap tap:

“Kâo hyu duñ ñôm kơsu mơ̆ng djop mơnuih tui hơdră lĕ “pơƀut ƀiă jing lu”. Hăng kâo ăt pơsur mơn hlăk ai amăng plơi amăng să gum hrŏm kiăng dưi djru djop  mơnuih hmâo hơdôm hơpă lĕ klă hơdôm anun”.

Hơdră pơhrui pơƀut ñôm kơsu djah arăng glom lui mơ̆ng hlăk ai să Tân Thành hmâo tañ dưi hmâo ƀing tha, hlăk ai anăp nao hur har, pơjing tơlơi juăt klă amăng plơi pla. Ơi Nguyễn Văn Bé, dô̆ ƀơi plơi Dăk Ri, lăi pơthâo:

“Rim dah kâo leng kơ hơdor nao kơ get čai lĕ pơƀut glăi, sa lĕ plai ƀiă djah djâo glom lui ča, dua lĕ dưi djru ƀing dô̆ tơnap tap”.

Hur har hăng ƀing hlăk ai plơi Dăk Ri hyu duñ djah ñôm, kơsu, ayong Đặng Văn Hiếu, djuai ania Dao, brơi thâo, hơdôm bruă mă mơ̆ng hlăk ai kah hăng hrơi tơjuh mơtah, bơyan pơdơi prong hyu gum djru, pơphun tơdrŏn ngui ngor kơ čơđai muai …, djru ƀing hlăk ai hơdip hiam hloh:

“Blung hlâo lĕ tơlơi mơ-ak, dua lĕ hmâo bôh tŭ yua klă hiam. Kâo dưi bưp lu mơnuih, bơkơtuai lu hăng djop mơnuih tơlơi hơdip pô ăt rơhmač hloh mơ̆n”.

Ayong Đặng Phúc Xuân, Khua git gai Khul hlăk ai să Tân Thành, brơi thâo, “Sang dô̆ 100 prăk” pơhrui pơƀut ƀuăt ñôm, kơsu djah arăng glom lui dưi hmâo să pok pơhai mơ̆ng blan 4/2022 ƀơi kual krah să. Tŭ mă tơlơi gum hrŏm mơ̆ng lu mơnuih ƀôn sang, hơdră ngă anai tañ pok prong hyu abih bang hơdôm ƀut mơnuih ƀôn sang dô̆. Tơdơi hơdôm blan, lơm “Sang” hmâo pơƀut bă, mrô ñôm, kơsu amra ba nao sĭ mă prăk pơjing keh prăk djru čơđai tơnap tap, brơi sum ao, hơdrôm hră, hră čih, hră pơgang gah ia jrao kơ čơđai sang hră ƀun rin, hăng yak blung a pơjing prăk djru hlăk ai pơđĭ kyar bơwih ƀong. Ayong Đặng Phúc Xuân, lăi pơthâo:

“Dưi pơjing keh prăk anun pioh sa thun ƀing gơmơi brơi gơnam 4 wot amăng tal Tết tui phiăn juăt, tết čơđai muai, tal mut sang hră hăng tal blan pơmri. Tơdơi kơ anun dưi čơkă mă tơlơi gum djru mơ̆ng lu neh wa lĕ ƀing gơmơi dưi pơjing ƀơƀiă keh prăk kơ hlăk ai čan ƀu mă kơmlai pioh blơi pơjeh pla pơđĭ kyar bơwih ƀong huă”.

Tui hăng ơi Trần Doãn Hiếu, Kơ-iăng Khua Jơnum min mơnuih ƀôn sang să Tân Thành, “Sang dô̆ 100 prăk” lĕ tơlơi pơmin pơčeh phrâo mơ̆ng khul hlăk ai, bruă ngă anet mơ̆ tŭ yua prong hmâo lar hyu amăng mơnuih ƀôn sang, pơjing tơlơi juăt pơkrem hăng djru pơgang djah djâo glom lui ča. Hrŏm hăng khul hlăk ai, khul đah kơmơi să pơphun hơdră pơčruh prăk djru nao rai tơdruă pơdŏng sang, pơđĭ kyar bơwih ƀong sang anô̆ ăt dưi hmâo mă mơ̆n tơlơi gum hrŏm klă mơ̆ng mơnuih ƀôn sang. Ơi Trần Doãn Hiếu, brơi thâo dong, hơdôm hơdră ngă pơkĕ hrŏm plơi pla hmâo ba glăi laih lu bôh tơhnal ƀơi să hmâo giăm truh 2/3 mrô mơnuih ƀôn sang lĕ djuai ania ƀiă:

“Anai ăt lĕ hơdră lăi pơhing pơsur klă biă, bruă mă sit nik laih anun ba rah hơdră pơtrun hơdră bruă mơ̆ng Ping gah, Kơnuk kơna truh hăng rim mơnuih amăng khul, hlăk ai hăng abih bang mơnuih ƀôn sang, mơ̆ng anun mơnuih ƀôn sang đăo kơnang hloh bruă kơđi čar mơ̆ng să. Biă ñu hơdôm khul grŭp hmâo pơkĕ hrŏm sit nik hăng mơnuih ƀôn sang, jing pô tô hyu ataih mơ̆ng Ping gah Kơnuk kơna truh hăng mơnuih ƀôn sang".

Ăt tui hăng ơi Trần Doãn Hiếu mơn, tơlơi tŭ ư hrŏm mơ̆ng mơnuih ƀôn sang hmâo djru laih să kual asuek Tân Thành hmâo 16 tơhnal pơkă plơi pla phrâo. Neh wa 7 djuai ania amăng să glăk gum pran hrŏm gong gai să pơdŏng plơi pla phrâo, hrưn đĭ truh abih thun 2025 amra truh akô̆ jơlan hơdră anai./.