Ơi Rahlan Lêt, dŏ ƀơi plơi Klah, să Ia Mơ, tơring čar Gia Lai hơmâo dua čô ană hrăm tui jơlan hơdră 2 wơ̆t sa hrơi, mơguah tlam ƀơi sang hră gưl sa hăng gưl dua Nguyễn Văn Trỗi. Rim hrơi, ñu khom nao pơgiăng ană bă hrăm hră 4 wơ̆t mơtam, ƀơi anŏ gun bruă pưk hmua ia djuh, ƀing ană bă ñu đĭ rơdêh tang rơwang glăi pơ sang huă asơi añăm, nao rai tơnap tap hăng ataih biă mă.

Yua kơ anun yơh, lơ̆m hmư̆ hing să Ia Mơ kơnuk kơna djru 200 klai prăk man pơdong sang hră đôm lăm dua gưl ƀơi kual lŏn rơhaih 6 ha ƀơi akiăng jơlan tơring čar mrô 664, sang hră hơmâo djop anih hră, anih dŏ, sang huă, lan sang anih ngui ngor, hơmâo apui lơtrik, ia yua hăng anih pơjrao duăm ruă, ơi Lêt ƀu pơdop tah tơlơi mơak amăng pran jua ñu. Ñu đăo kơnang biă mă, sit sang hră dưi man giong, ană bă hơmâo yơh anih či hrăm, anih dŏ dong ƀong huă mơak, laih dơ̆ng hrăm hră amăng anih pơtô hrăm tong ten, amăng sang hră phrâo, hiam rô̆ hloh.

“Lăi nao sang hră, hlâo adih ăt hơmâo laih mơ̆n. Samơ̆ pơ anăp anai, gong gai kơnuk kơna  dua gưl tuh pơ alin man pơdong sang hră dua gưl mơ̆n, brơi ană amôn djop plơi pla hrăm, hmư̆ hnun mơak biă mă. Neh met wa hơ̆k mơak, klă biă mă yơh anun”.

Ƀu kơnong amĭ ama čơđai sang hră, ƀing nai pơtô đôč ôh mơak. Kah niai Ngô Văn Vững, Kơ-iăng khua sang hră wai lăng gah sang hră gưl sa hăng gưl dua sang hră Nguyễn Văn Trỗi, să Ia Mơ brơi thâo, ƀơi să hơmâo lu sang hră ataih mơ̆ng sang anŏ mơnuih ƀôn sang truh kơ 18 km, ngă kơ lu čơđai sang hră ƀơi kual ataih khom rơbat tơkai ataih biă mă mơ̆ng sang nao pơ sang hră. Yua kơ anun, tơdah hơmâo sang hră đôm lăm dua gưl, amra pơsir hĭ tơlơi tơnap, pơđĭ tui boh tŭ yua kơ bruă pơtô hrăm kơñ pơgi:

“Mơak biă mă yơh. Sang hră gơmơi amra hơmâo sang hră hrăm prong hloh, phrâo hloh, djop mơta gơnam yua pơtô hrăm, lu anih pioh ngă anih hrăm kơ tơlơi thâo phara, ră anai hlăk dŏ kơƀah. Tui anun lĕ, sang hră amra pơphun ƀơi sa anih phrâo. Bruă anun, amra djru pơđĭ tui boh tŭ yua pơtô hrăm”.

Hrŏm hăng să Ia Mơ, ră anai, jơnum min mơnuih ƀôn sang să Ia Puč, tơring čar Gia Lai ăt ruah mă anih rơhaih 5 ha plơi Gong, gêh găl hơmâo jơlan nao rai hluh gah, pioh prăp lui anih man pơdong sang hră đôm lăm dua gưl brơi rơbêh 730 čô čơđai sang hră gưl sa hăng gưl dua. Him lăng kơčăo bruă anai, man pơdong 24 boh anih hrăm phrâo, 14 anih pioh pơtô lu tơlơi thâo pơkŏn, anih dưm hră pơđok, anih hrăm gah rơngiao mông hrăm phun, anih pơtop rơjang drơi jăn, pah boh lông, adoh suang, anih dŏ, đih pit, sang huă ƀong laih anun sang brơi ƀing nai pơtô dŏ, jơlan glông hiam, apui lơtrik yua, ia mơnơi hơmâo djop. Nai Phan Thành Tiến, Khua sang hră gưlsa hăng gưl dua Phù Đổng, să Ia Puč brơi thâo:

“Sang hră đôm lăm dua gưl anai djơ̆ lăp yơh. Čơđai sang hră jing ană tơčô ƀing ngă kông ñơn ƀơi djop plah anom bruă ngă kơsu, khul grup mă bruă amăng kông ty lu biă mă. Hrŏm hăng anun, mrô čơđai sang hră mơnuih djuai ƀiă ăt lu mơ̆n, hơmâo truh 67%. Lơ̆m pok pơhai hơdră pơtô hrăm sang hră đôm lăm dua gưl, ngă amuñ brơi kơ čơđai sang hră hơmâo anih hrăm klă hloh”.

Tui hăng rơnoh jŭ yap, ƀơi kual giăm guai dêh čar gah yŭ tơring čar Gia Lai hơmâo rơbêh 9.400 čô čơđai sang hră. Amăng anun, hơmâo rơbêh 54% lĕ ană amôn djuai ƀiă. Tui hăng tơlơi pơtrun mơ̆ng Ding jum kơđi čar brơi tuh pơ alin man pơdong sang hră đôm lăm dua gưl, gưl sa hăng gưl dua ƀơi 248 boh să ter guai dêh čar amăng dêh čar, him lăng tơring čar Gia Lai amra tuh pơ alin hơmâo 1.200 klai prăk pok pơhai ƀơi 7 boh să guai dêh čar gah yŭ.

Dơ̆ng mơ̆ng blan 7/2025 truh ră anai, Jơnum min mơnuih ƀôn sang tơring čar Gia Lai git gai Gơnong bruă Pơtô hăng Pơjuăt ngă hrŏm gong gai kơnuk kơna pơphun ĕp lăng djop anih, laih dơ̆ng jao khul khua wai lăng kơčăo bruă ngă giong tañ hră pơar dăp hơdră, čih pơkra man pơdong. Sa dua ring bruă amra pok pơhai amăng rơnuč thun 2025. Ơi Phạm Anh Tuấn, Kơ-iăng Khua git gai ping gah tơring čar, Khua Jơnum min mơnuih ƀôn sang tơring čar Gia Lai pơtrun hiăp kơ djop să ngă hră pơar lŏn tơnah hăng sang hră pioh man pơdong tañ.

“Rơkâo djop sang bruă, djop să pok pơhai tañ mơtam ngă hră pơar yua lŏn, hră pơar jao yua lŏn, pơkă lăng, duh glăi lŏn mơnuih ƀôn sang. Ƀơi anăp lĕ pơkă lŏn man pơdong anih dŏ, khom ngă giong amăng blan 9 kiăng truh blan 10/2025 anai kač rup man pơdong sang hră tui Ding jum Man pơdong pơtrun, tơring čar hlong man pơdong mơtam yơh”.

Hăng bruă ngă khut khăt tui anun, hơdôm boh sang hră phrâo, hiam hloh amăng kual ter guai dêh čar, anih tơnap tap hloh tơring čar Gia Lai hlăk či jing sit nik, pok jơlan kơ bruă ngă kơñ pơgi ƀuh rơđah hiam mơak hloh kơ rơnuk ană tơčô mô yâo.