Đĭ pơhiăp amăng mông ngă lơphet, Khua anih jưh pơ ala dêh čar Việt Nam ƀơi Japan Phạm Quang Hiệu lăi pơtong, tơlơi gum pơgôp prong mơng djop gơnong bruă hăng tơlơi yôm mơng bruă gum hrŏm kơplah wah anom bruă pơtom hiăp hăng hơdôm gơnong bruă pơkŏn amăng pơđĭ kyar lŏn ia.

Amăng mông ngă lơphet, ƀing pơ ala hơdôm gơnong bruă ƀuăn amra tŏ tui gir run, gum hrŏm kjăp hăng hơdôm anom bruă pơtom hiăp amăng ƀon lan, ngă tui tŭ yua bruă jao kơđi čar mơng rĭm anom bruă, pơgôp amăng pơđĭ kyar dêh čar Việt Nam, Japan hăng tơlơi rô nao rai dua bơnah. Hơmâo thâo, Sang anih jưh pơ ala dêh čar Việt Nam ƀơi Japan amra tŏ tui pơphun lu bruă brơi hơdôm bơnah ngă hrŏm ƀơi Japan, mơnuih ƀôn sang Việt Nam ƀơi Japan, anăp nao 80 thun tal ngă hơkrŭ blan 8 truh kih hăng akŏ pơjing kơnuk kơna lơ 2/9.