Tơlơi čih mrô 1: link: https://vov4.vov.vn/jarai/toloi-hing-ang-monuih-topul-thoi-su-xa-hoi/kpi-toloi-potrut-poplih-phrao-mong-khanh-hoa-truh-po-do-dam-deh-car-ta-496697.vov4

Ƀơi tơring čar Khánh Hòa, tơdơi kơ rơbêh 5 blan mă yua KPI-Mrô pơkă kơ boh tŭ yua amăng bruă mă brơi ƀuh, KPI ƀu dŏ glăi ƀơi hơdôm mrô pơƀuh amăng măi komputơr đôč ôh mơ̆ ăt lĕ anŏ pơkă brơi bruă mă mơng rĭm čô mơnuih hăng khul grup. Ơi Phạm Minh Nhựt, Khua khul bơwih brơi tuai čuă ngui Nha Trang Khánh Hòa brơi thâo:

“Bruă mă yua KPI amăng djop mơta bruă ăt lêng kơ ba glăi boh tŭ yua soh. Hăng ƀing apăn bruă lơm mă yua hơdôm hơnong pơkă anai, hlơi hlơi lêng kơ hluh rơđah ƀing gơñu kiăng ngă hơget, ngă hiưm pă ñu. Lơm mơnuih pơsir bruă mă thâo kiăng ngă hơget hăng kiăng ngă hiưm pă brơi klă, amra djru brơi mơnuih kiăng kơ bruă anai dưi pơsir hĭ bruă mă tañ ƀiă”.

Yua hơmâo KPI, Khua mua tơring čar thâo rơđah mông mă bruă rĭm hrơi mơng hơdôm anom bruă, sang bruă. Pơhmutu, hơdôm anom bruă amăng Ping gah tơring čar, Jơnum min djop djuai ania mơnuih mơnam Việt Nam tơring čar, Ping gah khul hơdôm anom bruă Ping gah hăng gưl Ping gah bơdjơ̆ nao dưm pơhlôm 4,97 mông; gong gai gưl tơring čar 6,13 mông; hơdôm anom bruă 6,11 mông; Ping gah hơdôm să, phường 5,21 mông; hăng Jơnum min mơnuih ƀôn sang gưl să 6,17 mông. Ƀơi khul wai lăng kual bơwih ƀong huă hăng tuh tia pơkra ming tơring čar Khánh Hòa, Khua khul Trần Minh Chiến brơi thâo, mơng KPI, bruă mă hơmâo pơdah tong ten:

“Mơng KPI amra pơkă tong ten, ƀing apăn bruă ƀuh rơđah bruă mă kiăng ngă tui bruă jao mơng anom bruă. Biên chế ƀu đĭ tui, bruă mă jai hrơi lu tui. Yua anun, kiăng hrưn đĭ klă amăng bruă mă hăng bruă pơtô hrăm, mă yua boh thâo phrâo brơi lu ƀiă dong”.

Tơring čar Khánh Hòa tơdơi kơ pơmut hrŏm glăk ba tơbiă hơnong pơkă prong biă mă: đĭ GRDP mơng 11-12% ha thun; GRDP ha čô mơnuih dong amăng grup 10 đơ đam dêh čar; tơlơi bơwih ƀong huă mrô truh 35% GRDP; bruă pơplih đĭ plơi prong 70%. Tơlơi lông ăt ƀu ƀiă lơi: dua tơlơi gun prong amăng man pơdong anih anom phun (sit biă ñu anih yua boh thâo phrâo) hăng mơnuih mă bruă rơgơi, hrŏm hăng tơlơi rơkâo đĭ tui boh thâo mơng ƀing apăn bruă. Yua anun, KPI lĕ anŏ kiăng pơkă lăng, kiăo tui lăng bruă ngă tui hơdôm hơnong pơkă anai, pơjing tơlơi gir run jing tơlơi pơdah tong ten. Khua git gai Ping gah tơring čar Khánh Hòa, ơi Nghiêm Xuân Thành pơsit tong KPI amra jing anŏ wai lăng rah hăng tô nao rai kơplah hơnong pơkă hăng boh than ngă tui rĭm hrơi.

“Bruă mă yua KPI amra pơƀuh mrô mơnuih mă bruă kiăng hloh. Lăng nao mông mă bruă amra ƀuh anom bruă glăk kơƀah ƀudah rơbêh mơnuih mă bruă, glăk rơbêh hơdôm čô mơnuih apăn bruă, rơbêh ngă bruă hơget”.

Tơring čar Khánh Hòa lĕ anih pok pơphun mơ̆ dêh čar lĕ tơlơi anăp nao mă yua KPI brơi ƀing apăn bruă. Ding jum wai lăng bruă mă hơmâo prap lui akŏ bruă pok pơhai KPI ha amăng plĕ đơ đam dêh čar dong mơng akŏ thun 2026, pơmut hrŏm hăng pơplih mrô. Lơm mrô jŭ yap hơmâo pơƀut tui hrơi mông sit nik, sa pok hră pơ-ar ngă brơi kaih ƀu djơ̆ kơnong dŏ glăi mơng tơlơi pơblang đôč ôh mơ̆ ăt pơƀuh tong ten amăng măi mok, ba bruă ngă hră pơ-ar jing anih pơplông klă hloh. Khua ding jum wai lăng bruă mă Phạm Thị Thanh Trà lăi pơtong:

“Kơnuk kơna amra hơmâo tơlơi pơkă tong ten kơ bruă sem lăng ƀing apăn bruă. Hơnong pơkă amra pơjing hluai tui bruă mă yua boh thâo măi mok, pơlir hrŏm KPI hăng bruă djru mơnuih ƀôn sang ƀơi Việt Nam, pơlir hăng hơdôm anih mă bruă, pơhlôm tong ten, rơđah rơđông hăng sit nik. Anai lĕ atur kiăng ngă tui djơ̆ tơlơi pơkă, ƀu ƀuh tơlơi pơmĭn “ngă bruă truh tha”.

Anai lĕ anih kiăo tui lăng, mrô pơkă boh tŭ yua bruă mă - KPI mơ̆ Khánh Hòa glăk mă yua ƀu djơ̆ kơnong pơƀuh tong ten bruă mă hăng tơlơi gir run mơng rĭm anom bruă, mơnuih apăn bruă. Tui anun Kơ-iăng Khua git gai pơ ala mơnuih ƀôn sang dêh čar Nguyễn Thị Thanh, anai ăt lĕ anŏ pơtrut ngă pô ƀơi ƀon lan.

“Khánh Hòa lĕ sa amăng hơdôm anom bruă ba jơlan hlâo amăng pơjing KPI kiăng kiăo tui lăng, pơjing anih mă bruă. Tơlơi bơngač amăng ngă tui hơdôm boh tơhnal anai phrâo biă mă kơ pơhlôm ngă pô, laih dong pơhrua boh tơhnal phrâo brơi kơ bruă ngă pô amăng rơwang pơplih yua boh thâo phrâo”.

Mơng ƀon lan, truh tơring čar, dêh čar, mrô pơkă lăng boh tŭ yua amăng bruă mă-KPI glăk pơtrut hơdôm tơlơi pơplih phrâo amăng gru grua hăng boh tŭ yua bruă mă. Amăng črăn hră lăi pơthâo kơđi čar Jơnum Ping gah tơring čar Khánh Hòa tal I, KPI hơmâo pơsit lĕ anih kiăo tui lăng kiăng ngă tui tơlơi rơkâo: jing anih pơđĭ kyar kơtang đơ đam dêh čar, truh thun 2030 lĕ plơi prong gah gơnong glông, anih bơwih brơi tuai čuă ngui-bơwih bơwang kual ia rơsĭ jar kmar. KPI hơmâo pơsit tong ƀơi 3 anŏ phun: Ba jơlan hlâo amăng bruă mă mơng ƀing apăn bruă; pơplih sit nik amăng kiăo tui lăng, dong dăp; hăng mă yua ha amăng plĕ amăng djop anih anom kơđi čar, pơhlôm tong ten, tơpă sit. Anai ăt lĕ tơlơi yak nao blung a kiăng bruă mă ƀơi Việt Nam giăm ƀiă hăng hơdôm hơnong pơkă phrâo, klă ƀiă dong hăng tŭ yua./.