Ƀơi hơdôm arăt jơlan kah hăng jơlan rơdêh đuăi hmar Vĩnh Hảo - Phan Thiết; jơlan prong 27, 28B, jơlan čun čoe Prenn... ƀuh lu anih amuñ tơhlŏm lŏn, pơtâo tơhroh trun ngă kơđông jơlan nao rai hăng hŭi ngă ruă ană mơnuih ta, ƀu rơnuk rơnua kơ rơdêh nao rai.

Hrŏm hăng anun bruă lŏn tơhroh, ngă dun hĭ hơmâo ƀơi lu glông jơlan mơ̆ng tơring čar, amăng anun hơmâo jơlan Đạo Nghĩa - Quảng Khê; jơlan DT715 găn nao pơ să Hàm Thuận...Gong gai hơdôm boh tơring hăng anom apăn bruă tơring čar Lâm Đồng iâu pơthưr mơnuih mă bruă, rơdêh či pok jơlan, kuăi dor anih hlŏm, brơi ia thâo rô...hlă gong pơhŭi hlâo pơhlôm rơnuk rơnua kơ mơnuih ƀôn sang.

Hăng ayuh hyiăng adai pơplih phara, ƀu thâo hlâo, Jơnum min mơnuih ƀôn sang tơring čar Lâm Đồng hơmâo laih hră git gai Anom git gai pơgang pơhlôm brơi mơnuih ƀôn sang tơring čar, Jơnum min mơnuih ƀôn sang hơdôm boh să, phường hăng kual Phú Quý, prăp rơmet pơgang glăi hơjan prong, ia dăo, kơthel, tơhlŏm lŏn. Tơring čar Lâm Đồng glăk hơmâo 8 arăt jơlan prong, glông giăm 1.400km hăng giăm 1.300km jơlan tơring čar. Yua hơmâo lu jơlan aka ƀu hơmâo pơkra hiam abih bang, jơlan đĭ hăng čư̆, anun amuñ hơmâo tơlơi truh lŏn pơtâo tơhroh trun, ngă kơđông jơlan nao rai amăng bơyan hơjan kơthel anai./.