Sang hră wai lăng čơđai anet Họa Mi, să Buôn Đôn, tơring čar Dak Lak phrâo tuh pơplai pơdŏng dong ruăi sang hăng 3 anih hrăm hăng kual mă bruă, abih bang prăk mă yua 6 klai prăk. Anai lĕ tơlơi gir run mơ̆ng să pioh pơđĭ mrô anih hrăm đĭ 11 bôh anih hrăm ƀơi sang hră phun hăng sa anih pơdŏng jăng jai buôn Drăng Phốk, djop brơi tơlơi kiăng hrăm hră mơ̆ng 360 čô čơđai amăng đơ đam să. Nai H’ Nên Ksor, nai pơtô ƀơi Sang hră wai lăng čơđai anet Họa Mi, brơi thâo:

“Anai lĕ thun hrăm blung a ƀơi sang hră phrâo, anih hrăm phrâo, gơnam mă yua leng kơ phrâo, ngă gal brơi klă hloh kơ čơđai sang hră nao sang hră lu hloh. Sang hră phrâo, anih phrâo, nai pơtô hơk mơ-ak biă, hrơi mut sang hră amĭ ama čơđai ba ană nao sang hră lu biă”.

Ƀu kơnong kơ gưl čơđai muai đôč ôh, hơdôm bôh sang hră gưl sa hăng gưl 2 ƀơi să Buôn Đôn ăt đing nao tuh pơlai mơn gơnam mă yua. Lơm hơdôm bôh anih hrăm klă hiam ƀơi mơta, nai pơtô čơđai sang hră glăi nao rim sang dong, pioh pơsur čơđai sang hră nao hrăm hră. Ƀơi să guai dêh čar anai, čơđai sang hră djuai ania ƀiă hmâo truh kơ 86%; bruă pơsur ƀing čơđai nao hrăm hră djop tum ƀu amuñ ôh. Ơi Hồ Sĩ Lâm – Khua Sang hră gưl sa Y Jut brơi thâo:

“Akô̆ thun anai, Jơnum min mơnuih ƀôn sang să črâo ba kơjăp bruă pơsur čơđai sang hră, Grŭp khua apăn bruă sang hră hăng nai pơtô čơđai hmâo nao laih pơ̆ rim sang pioh ngă hră pơ-ar brơi kơ čơđai ƀơi sang. Kơnang kơ anun, truh ră anai 125 amăng 125 čô čơđai sang hră amăng hnưr thun nao sang hră tum djop. Ƀing čơđai anih sa ăt dưi tum pơƀut mơn pioh ngă juăt hăng sang hră anih hrăm phrâo”.

Tơdah kah hăng gưl sa, bruă pơsur čơđai sang hră hmâo črăn gal hloh mơn lĕ ƀơi gưl 2, bruă anai glăi bưp lu tơlơi lông dong. Yua kơ lu čơđai prong laih, sang anô̆ lĕ ƀun rin tơnap tap anun amra pơdơi hrăm hră pioh djru amĭ ama mă bruă lu hloh. Ƀơi anăp tơlơi anun, ƀu kơnong kơ gong gai hăng sang hră ôh mơ̆, lu khul grŭp, mơnuih thâo gum djru ăt gum hrŏm mơn pioh pơsur ƀing čơđai nao sang hră dong. Yă Võ Thị Loan – Kơ-iăng Khua Sang hră gưl 2 Võ Thị Sáu lăi pơhing:

“Thun hrăm anai, sang hră hmâo 425 čô čơđai, rơbêh kơ 80% lĕ mrô čơđai djuai ania ƀiă. Kiăng ƀing čơđai hơđong pran jua tui hrăm, hrŏm hăng tơlơi pơphun bruă mơ̆ng gong gai hăng gơnong bruă pơtô pơhrăm, ƀing gơmơi dô̆ čơkă mă tơlơi gum tơngan hrŏm ƀing thâo tơngia. Tal akô̆ thun, Kông ang ƀôn prong Hồ Chí Minh gum hrŏm hăng Kông ang tơring čar Dak Lak ƀơk 16 per hơdrôm hră hrăm, 10 bôh rơdêh dang wang kơ čơđai sang hră tơnap tap, hrŏm hăng 5 per măi kompiutơr kơ anih pơtô tin học. Sa bôh anom bơwih ƀong sĭ mơdrô gơnam kơ dêh čar tač rơngiao ƀơi anai ăt djru dong mơn 10 bôh rơdêh dang wang kơ čơđai sang hră kual ataih”.

Kiăng hmâo bôh tơhnal anun, dô̆ hmâo tơlơi gum hrŏm mơ̆ng plơi pla dong. Tha plơi, khua ƀôn, hơdôm khul grŭp amăng să leng kơ gum tơngan hrŏm sang hră pel ĕp lăng, pơsur, pơhlôm abih bang mrô čơđai nao sang hră djơ̆ hnưr thun. Yă H’ Đa Nê Byă – Khua ƀôn Buôn Đôn, să Buôn Đôn brơi thâo:

“Khua ƀôn hrŏm hăng Grŭp Khua apăn bruă Sang hră, nai pơtô čơđai pơsur rim sang amĭ ama čơđai sang hră nao pơhmư̆ mông pok phun mut sang hră djơ̆ mông tum djop. Kơnang kơ hmâo tơlơi pơkĕ hrŏm, tơlơi đing nao hmao tlôn mơ̆ng abih bang plơi hăng Grŭp Khua apăn bruă sang hră, pơsur mơ̆ng nai pơtô čơđai sang hră ƀơi anai nao hrăm tum djop. Anai lĕ tơlơi đing nao hmao tlôn mơ̆ng hơdôm gưl gong gai, sang hră truh hăng amĭ ama čơđai sang hră”.

Mơ̆ng tơlơi gơgrong hlâo tuh pơplai gơnam tam, nai pơtô čơđai truh pran pơsit ƀu pioh čơđai sang hră hơpă yua kơ tơnap ƀu dưi nao hrăm, truh ră anai, djop bruă prăp lui kơ thun hrăm phrâo ƀơi să guai Buôn Đôn phun ñu ngă giong laih, amra yak mut thun hrăm phrâo. Ơi Lê Thanh Sơn – Kơ-iăng Khua Jơnum min mơnuih ƀôn sang să Buôn Đôn, tơring čar Dak Lak pơtŏng sit:

“Pơ̆ anăp anai, să amra tuh pơplai dong gơnam tam mă yua, pơplih pơkra lan sang hră anih hrăm, hrŏm hăng anun pơđĭ dlông kơjăp bruă pơtô pơhrăm, pơhlôm tơhnal ba tơbiă prong hloh kơ thun hrăm phrâo”.

Hăng tơlơi lăng ba tuh pơplai mơ̆ng Kơnuk kơna, tơlơi pơphun ngă tui khut khăt mơ̆ng gong gai, tơlơi abih pran jua mơ̆ng nai pơtô čơđai, tơlơi ha pran jua mơ̆ng amĭ ama čơđai sang hră hăng tơlơi gum djru mơ̆ng ƀing thâo tơngia hơdôm tơlơi mơ-ak pơhlôm. Anai ăt lĕ phun akha kơ bruă pơtô pơhrăm ƀơi kual lŏn dô̆ hmâo lu tơlơi tơnap tap anai./.