Tuai hyu čuă ngui glăi dong

VOV4.Jarai – Tuai hyu čuă ngui dêh čar sit nik pok amăng glăi abih bang laih mơng lơ 15/3/2022 hăng hơkrŭ glăi tañ ƀơi hơdôm bôh anih anom phun.

Tui hăng tơlơi lăi pơthâo glăi mơng Ding jum wai lăng Bôh thâo, Bơkơjăp drơi jăn hăng Tuai čuă ngui, amăng thun 2022 phrâo rơgao hmâo laih 3 klăk 300 rơbâo wot čô tuai mơng dêh čar tač rơngiao rai pơ̆ dêh čar Việt Nam; Tuai amăng lŏn ia yap him lăng hmâo 101 klăk wot čô mơnuih hloh giăm truh dua wot bơhmu hăng tơhnal ba tơbiă mơng akô̆ thun. Thun 2023, Gơnong bruă wai lăng tuai čuă ngui Việt Nam ba tơbiă tơhnal hrưn đĭ čơkă 110 klăk wot čô tuai, amăng anun năng ai ñu 8 klăk wot čô tuai mơng dêh čar tač rơngiao, tuai amăng lŏn ia năng ai ñu 102 klăk wot čô, abih bang pơhrui mă mơng tuai čuă ngui năng ai ñu 650 rơbâo klai prăk. Gơnong bruă tuai čuă ngui amra đing nao amăng hơdôm bruă phun kah hăng pok pơhai lăi pơthâo “Pơkă kual tuai čuă ngui Việt Nam rơwang 2021-2030, tơhnal lăng nao truh thun 2045”, Pok pơhai bruă marketing čuă ngui Việt Nam truh thun 2030, Akô̆ bruă “Mă yua hơdră phrâo mơng măi mok 4.0 kiăng pơlar bruă tuai čuă ngui phrâo, pơtrut tuai čuă ngui jing bruă bơwih ƀong ba jơlan hlâo”, Akô̆ bruă pơđĭ kyar tuai čuă ngui plơi pla Việt Nam…

Tơdơi kơ abih klin Covid-19, thun 2022 bruă bơwih brơi tuai amăng tơring čar Kon Tum hơmâo hơkrŭ glăi, đơ đam tơring čar čơkă 1 klăk 100 rơbâo čô tuai. ABih tih prăk pơhrui mơng bruă bơwih brơi tuai čuă ngui rơbêh 265 klai prăk, đĭ rơbêh 3 wŏt pơhmu hăng thun hlâo. Thun phrâo 2023 tơring čar Kon Tum gir run čơkă 1 klăk 300 rơbâo čô tuai nao čuă ngui. Ñu lĕ mơnuih ba jơlan hlâo amăng plơi Kon Pring, tơring kual Măng Đen, tơring glông Kon Plông amăng bruă bơwih brơi tuai čuă ngui amăng plơi pla, amai Y Lim brơi thâo, hơdôm hrơi ngui tui gru grua yua tơring glông pơphun amăng thun 2022, anun lĕ ngui bơyan bơnga anh đào, ngă yang čơkă thun phrâo tui phiăn juăt, Jơlan hơdră ngui buh eng ao hơnuai kual Dap kơdư…hơmâo pơhưč hơdôm pluh rơbâô čô tuai nao pơ tơring glông. Amai Y Lim hok mơ-ak hăng boh tŭ yua mơng bruă bơwih brơi tuai amăng plơi pla amăng ha thun hăng čang rơmang tơlơi hiam klă amăng thun 2023.

“Kâo ăt đing nao bruă djă pioh hăng lăi pơthâo gru grua djuai ania pơlir hăng bruă bơwih brơi tuai čuă ngui amăng plơi pla, anăm ngă rơngiă gru grua djuai ania pô ôh. Kâo ăt pơtô pơblang brơi neh met wa hluh rơđah hơdôm bruă bơwih brơi tuai čuă ngui pơhrui glăi amra lu ƀiă bruă ngă hmua. Mơng anun, pơhmutu prăk pơhrui rĭm čô mơnuih amăng ha thun, ngă hmua glêh glar biă mă mơ̆ pơhrui glăi aset đôč, bơwih brơi tuai čuă ngui amăng 1 blan amra dưi pơhrui mơng 10-20 klăk prăk. Neh met wa kiăng tŏ hrăm tui bruă bơwih brơi tuai, thâo pơmĭn, ngă hơdôm bruă ba glăi pơhrui kơ ƀing ta pô hăng sang anŏ. Yua anun, neh met wa gir run bơwih brơi tuai kiăng pơđĭ kyar bơwih ƀong amăng sang anŏ, djru pơplih ƀô̆ mơta plơi pla jai hrơi hrưn đĭ”.

Dơnao ia Ayun Hạ ƀơi să Čư̆ A Thai, tơring glông Ayun Pa ƀu djơ̆ kơnong kơ ring bruă hnoh ia prong pioh kơ bruă đang hmua, rông akan hơdang ôh mơ̆, anai dô̆ jing anih tuai čuă ngui pơhư̆c pran jua tuai biă. Hăng kual ia prong rơbêh kơ 37 km kơ rê Dơnao ia Ayun Hạ hiam hloh amăng hơdôm hrơi akô̆ bơyan phang, ăt lĕ tal Tết tui phiăn juăt. Dơnao ia Ayun Hạ hmâo anô̆ hiam klă biă hăng hơđong dong amăng krah dua bơnah hang ia bơhư̆t kơ angin hmâo pơgang mơng hơdôm kơdư kyâu pơtâo mơtah hlê̆. Amai Villa (djuai ania Jarai) dô̆ ƀơi să Ia Sol, tơring glông Phú Thiện, tơring čar Gialai ư-ang kơ anih anom hiam anai mơng plơi pla. Ñu brơi thâo, lom rai pơ̆ Dơnao ia Ayun Hạ, tuai hmâo lu tơlơi găn rơgao lăng mơ-ak biă.

 “Lom đĭ song ƀơi dơnao ia, lăng hyu, phun kyâu pơtah jum dar dơnao ia hiam biă, mơtah mơng hla kyâu, ia jơngeh ƀơhač. Tuai nao čuă lăng amra ĕp blơi akan mơng dơnao ia, amăng anun hmâo lu djuai akan amăng dơnao ia. Đĭ song lăng hyu ia tơglak gơglưč amăng ayuh hyiăng rơ-ơ̆ hăng hyơhyor mơ-ak biă. Ia mơng bơnư̆ Ayun Hạ rô nao pơ̆ hơdôm bôh kueng hnoh, pơđoh ia kơ mơnuih ngă hmua ia dua bơyan. Ia Ayun Hạ djru mơnuih ngă hmua hơdôm bôh tơring glông Phú Thiện, plơi prong Ayun Pa, đa lĕ sa dua anih anom pơ̆ Krông Pa dong. Tơring čar Gialai ăt glăk hơduah ĕp lăng mơn prăk yua pơkra, hơkrŭ glăi bơnư̆ Ayun Hạ pioh pok prong hơdôm bruă mă ngui ngor čuă lăng anih anom hiam kiăng gal brơi mơnuih ƀôn sang hmâo tơhnal gal pơđĭ kyar bơwih ƀong”./.     

Viết bình luận