Tui anom bruă wai pơgang tơlơi duam ruă tơring čar Gia Lai, duam đông drah hơđuh đĭ kơtang ƀơi abih bang 17 boh tơring glông, plơi prong hăng 732 čô mơnuih duam, đĭ 2,4 wŏt pơhmu tui tơđar thun hlâo. Hơdôm boh tơring glông hơmâo mơnuih duam đung drah lu hloh lĕ Krông Pa, AyunPa, Ia Pa hăng plơi prong Pleiku.

Ăt tui gơnong bruă ia jrao tơring čar Gia Lai mơn, duam đông drah amra tŏ đĭ tui hăng amra ngă tơnap tap pơ anăp anai lơm hơjan hlim, ayuh hyiăng lŏn mơnai djrưh, amra ngă keč amoaih, arŏng aroač čeh čar. Yua anun yơh, hrŏm hăng hơdôm tơlơi gir run mơng gơnong bruă ia jrao, tơlơi kiăng hloh lĕ mơnuih ƀon sang khŏm rang kơđiăng amăng bruă pơgang duam đung drah. Ơi Đinh Hà Nam, kơ-iăng khua gơnong bruă ia jrao Gia Lai brơi thâo:

“Kơ bruă pơgang duam đông drah ta anăm pơtah tai ôh, bruă pơgang duam đung drah klă hloh lĕ pruih ia jrao pơdjai keč amoaih kiăng huăi ƀuh kman duam đung drah. Pơhmutu get ia, ƀung ƀai, biă mă ñu pông rơdêh, amăng hơdôm hrơi laih rơgao hơjan na nao ngă ia pơkŏng mơng anun ngă keč čeh čar. Mơng hrơi keč čeh boh truh prong giăm rơbêh 10 hrơi đôč, yua anun, bruă pruih ia jrao pơdjai keč glăk por hyu, ia jrao amra dưi pơdjai keč giăm 48 mông. Tơdah ƀuh hlơi thơ duam đung drah kiăng ba nao pơ sang ia jrao pơjrao”.

Ƀơi tơring čar Dak Lak, duam đung drah ăt glăk đĭ kơtang, him lăng amra ngă hơđuh đĭ kman kơtang lơm yak nao bơyan hơjan hlim, lơm tơring čar glăk kơƀah ia jrao pruih pơgang kman. Dong mơng akŏ thun truh ră anai đơ đam tơring čar Dak Lak hơmâo 283 čô mơnuih duam đung drah. Pơhmu hăng blan 4, đĭ rơbêh 40 čô hăng hơmâo dong 3 anih ƀuh kman ƀơi hơdôm tơring glông Buôn Đôn, Krông Năng hăng Krông Ana.

Anom bruă wai pơgang tơlơi duam ruă tơring čar Dak Lak hơmâo git gai hơdôm bruă bruă bơdjơ̆ nao kơtưn pel ĕp kjăp, tañ ĕp ƀuh, pruih ia jrao pơgang anih hơmâo kman kiăng plai ƀiă lar hyu amăng mơnuih mơnam; pơsit tong kual him lăng amra hơmâo kman kiăng pơphun pruih ia jrao pơdjai keč pơhlôm pơgang duam đung drah. Laih dong pơtrut kơtang bruă pơtô pơblang, pơtrut pơsur mơnuih ƀon sang ngă tui hơdôm hơdră pơgang anih dŏ hơdip jum dar, pơdjai keč amoaih, arŏng aroač pơgang duam đung drah ƀơi sang anŏ hăng plơi pla.

Tui ơi ia jrao Lê Phúc, Kơ-iăng khua anom bruă wai pơgang tơlơi duam ruă tơring čar Dak Lak, tơlơi tơnap tap amăng bruă pơgang duam đung drah ră anai lĕ kơƀah ia jrao pơgang yua aka ƀu hơmâo prăk blơi ba glăi.

“Ră anai ia jrao aka ƀu hơmâo djop, ƀing gơmơi glăk rơkâo anom bruă wai pơgang klin kman Dap kơdư djru brơi ha bơnah kiăng pơhlôm pruih ƀơi hơdôm anih hơmâo kman. Dong mơng bơyan hơjan amra ƀuh keč čeh čar, ră anai sa, dua boh tơring glông ăt gơgrong amăng bruă pruih ia jrao mă mơng ngăn drăp tơring glông kiăng ngă hiưm pă sem lăng vec-tơ mơng anun gơgrong pơsir hĭ hlâo”.

Tơring čar Khánh Hòa ha guai hăng tơring čar Dak Lak laih dong Lâm Đồng, duam đông drah ăt glăk ngă tơnap tap. Mơng akŏ thun truh ră anai, ƀơi tơring čar Khánh Hòa hơmâo laih rơbêh 1.100 čô mơnuih duam đung drah, amăng anun hơmâo 1 čô mơnuih djai. Mrô mơnuih duam đông drah đĭ giăm 6 wŏt pơhmu tui tơđar thun hlâo. Brtuă pơgang kman duam đông drah ƀơi Khánh Hòa bưp lu tơnap tap yua bruă kiăo tui lăng, ĕp ƀuh kaih, pruih ia jrao ƀu hmao tlôn. Lu mơnuih ăt dŏ pơtah tai, blơi ia jrao glăi pơjrao, ngă tơnap tap brơi kơ bruă ĕp ƀuh mơnuih duam, pruih ia jrao ƀơi hơdôm anih hơmâo kman. Hơdôm bruă pruih ia jrao pơdjai keč amoaih yua hơdôm boh ƀon lan pơphun aka ƀu tŭ yua, kar hăng bruă pơtô pơblang đôč.

Ơi ia jrao Tôn Thất Toàn, Kơ-iăng khua anom bruă wai pơgang tơlơi duam ruă tơring čar Khánh Hoà brơi thâo, gơnong bruă ia jrao tŏ tui gum hrŏm hăng hơdôm anom bruă, gong gai ƀon lan kơtưn amăng bruă pơtô pơblang, pruih ia jrao pơdjai keč ƀơi hơdôm boh plơi pla, kual him lăng amra lar hyu kman. Djop sang ia jrao pơtrut amăng krăo lăng, tañ ĕp ƀuh, pruih ia jrao ƀơi anih hơmâo kman; pơhŭi hlâo hơdôm anom khăm pơjrao pok hơjăn črâo brơi mơnuih duam đông drah, ba nao sang ia jrao prong hmao tlôn, anăm brơi ruă kraih, ba truh djai brŭ. Ơi ia jrao Tôn Thất Toàn brơi thâo:

“Hơmâo lu boh sang anŏ glăk pơkŏng lui ia, kiăng rao rơgoh hĭ, pơdjai hĭ hơdôm boh keč klep ƀơi ƀung ƀai. Klup sir hơdôm gơnam pơkŏng ia kiăng huăi ƀuh keč amoaih čeh čar. Mơnuih ƀon sang lơ̆m mưn duam ră, kiăng nao pơ sang ia jrao khăm pơjrao hmao tlôn. Anăm blơi mă jrao, pơjrao mă pơ sang, hlâo anun, ƀuh laih mơnuih ruă kraih, lơm ba nao pơjrao, bruă pơjrao brơi tơnap tap”.