VOV4.Jarai - Ƀơi tơring čar Dak Nông, tơdơi kơ lu blan ưt ƀiă laih, klin pơtah čroh un Châu Phi ƀuh glăi dong laih ƀơi hơdôm plơi pla. Kiăng dưi pơgăn hĭ klin lar hyu ƀơi lu anih, gong gai plơi pla hăng hơdôm anom apăn bruă glăk gir hyu guang dar, pơgăn hĭ anih hơmâo klin, čuh hĭ abih mrô un djai klin. Ră anai, Dak Nông hơmâo 4 boh tơring glông ƀuh klin ngă pơtah čroh ƀơi un anun lĕ Tuy Đức, Dak R’Lấp, Dak G’Long hăng Dak Song. Amăng anun tơring glông Dak Song hơmâo ƀuh 5 boh plơi hơmâo klin amăng 3 boh să anun lĕ Dak N’Drung, Dak Hòa hăng Thuận Hạnh.

Čuh prai hĭ un djơ̆ klin.

Anih hơmâo klin prong hloh hơmâo ƀuh ƀơi sang anŏ ơi Nguyễn Xuân Thủy ƀơi să Quảng Khê, tơring glông Dak G’Long, pŭ un rơbêh 80 drơi hơmâo laih 52 drơi djai. Anom bruă wai lăng hlô rông hơmâo mă čơđeh ba nao pơ Anom bruă wai lăng hlô rông kual IV pơčrang lăng laih anun pơsit anai lĕ klin pơtah čroh un Châu Phi. Truh ră anai, ƀơi Dak Nông ƀing wai lăng gah hlô rông hơmâo čuh prai rơbêh 160 drơi un djơ̆ klin, hăng mrô kơtrâ̆o truh 5.800 kg.

 Siu H’Mai: Pơblang