Deh mờ dờng kềng gah dà croh Dà Rơyồng lơbơn niam tềng hơđơm jơng bơnơm Brah Yàng dờng ơning ơnàng, ồng K’ Brệp, 75 sơnam, geh làng bol thôn Kala Kròt kờñ gơboh pồ lơh kra ƀòn. Ồng gam là cau chài jak ngan bè broă tàñ phan ờs mờng bơh kòn cau K’Ho dê.

 Ală sơ̆ àñ, đồng, lơ-i tàñ mờ gle, đơr bơh mpàng tê ồng dê lơh geh bơta niam ngan, kơ̆ wền mờ cèng bềng bơta niam chài. Ờ mìng tàñ phan nàng ngui tàm hìu bơnhă lơm, ală phan bơna bơh ồng dê lơh geh làng bol kờñ ngan. Nam lài, ƀòn pờ ơdŭ bơto tàñ phan ai làng bol kòn cau K’Ho in, cau chài K’ Brệp bơto tơn ai mờr 100 nă cau in. Ồng pà gĭt: “Să tờm añ tàñ tơl ală bơta bơh sơ̆, lơ i, đồng..., tŭ năc geh jơnau kờñ blơi phan bơna den añ tăc jat jơnau kờñ bơh khi dê nàng geh tai priă jền, ngui tàm rài kis. Nàng sền gàr broă tàñ phan, tŭ do, tàm ƀòn neh tơlik mat mpồl tàñ phan nàng lơh uă ală phan bơna, lùp bơsram bal mờ gơ̆p đah ală cau chài nàng tàñ geh ală phan bơna tàñ niam ngan, chài ngan lơh geh jơnau kờñ ai cau ngui in, jòi geh tiah tăc phan bơna mờ giă tăc phan di pal ngan rlau jơh”.

Ờ mìng là cau chài jak uă ngan lơm, kra ƀòn ồng K’ Brệp gam là krơh niam tàm bơtàu tơnguh lơh sa. Là cau lài ngan tàm thôn khin cha tam gơl bồ tơngoh kơlôi sơnơng lơh broă sa, ồng bơcri priă sơng ka sền gàr 5 lồ kơphê sơntìl pa. Tŭ do, pah nam, hìu bơnhă ồng lơh geh 12 tấn kơphê gar. Bơdìh hơ̆ gam geh priă jền bơh sầu riêng mờ ƀơ tam tàm bơrlŭ bal tàm suơn kơphê. 2 lồ kòi sre ai tơnhào rlau 8 tấn kòi. Gŏ ồng lơh geh cồng nha, uă hìu bơnhă tàm thôn rơ hời jat bơsram mờ lơh jat. Ồng K’ Brao, ơm tàm thôn Kala Kròt pà gĭt:“ Kra ƀòn ồng K’ Brệp là cau lam lài tàm lơh broă sa. Tàm broă tam mờ sơng ka sền gàr kơphê, ồng là cau ngui bơta chài pa tàm broă lơh sa sơn rờp bè phơng sih, ƀồm sơnơm lơh gơ sơ̆t tu kòp, tuh dà... Kơnờm bơh hơ̆, suơn kơphê hìu bơnhă ồng dê lơh geh cồng nha tơnhào uă. Tàm broă lơh kòi sre kung bè hơ̆ sơl. ồng kung là cau lơh kòi sre jak ngan den tàng tơnhào kòi uă ngan tàm thôn Kala Kròt. Kra ƀòn là dùl nă cau geh làng bol ki ngàm ngan bơh rài kis, tơm bơh bơr tus broă lơh sa”.

Lơh jat broă lơh bơt bơtàu ƀòn lơgar pa, kra ƀòn K’ Brệp là cau lam lài pà is ù lơh gùng. Hìu bơnhă ồng neh pà is rlau 300 thơk vuông ù tềng đăp hìu, tă sờr pơng gàr, kơl tơm kơphê nàng pờ ơnàng gùng lòt ală thôn. Ồng kung pà is rlau 1 rơbô thơk vuông ù mìr nàng pờ ơnàng gùng lòt mut tàm tiah lơh broă sa. Lơh jat krơh niam ồng dê, jơh thôn tă pơgồp bal dà kơl hề, dồ nùs bal: cau pà is ù, cau tă pơgồp bal ngai lơh broă, cau dong phan bơna bơt bơtàu lơh ală broă lơh bơt bơtàu ƀòn lơgar. Jơh thôn neh tă pơgồp rlau 600 tơlak đong nàng lơh gùng bề tông, lơh broă lơh dà sàng goh.

Ồng K’ Brẻo ơm tàm thôn Kala Kròt pà gĭt: bơh bơngă pin dờn bơh kra ƀòn dê mờ tus tŭ do jơh gùng lòt tàm thôn ƀòn ndrờm dờng niam mờ sàng goh: “Lài do, gùng lòt rê tàm thôn dê kàl mìu lơm bè ngan, kàl prang kơmbuh ờ gŏ gùng lòt, lòt rê kal ke ngan, ngan là jun pơndiang phan lơh geh bơh broă lơh sa suơn sre bơh tàm mìr rê tus tàm hìu. Tŭ do, tŭ neh geh gùng lòt lơh bê tông sàng goh, niam, broă jun pơndiang kơphê, ƀơ, sầu riêng ƀuơn ƀoài ngan, phan lơh geh bơh broă lơh sa suơn sre geh jun pơndiang mờ tăc bro ƀuơn rlau sơl”.

Bơdìh mờ broă hòi jà bơt bơtàu ƀòn lơgar pa, kra ƀòn ồng K’ Brệp gam jơh nùs mblàng yal gùng dà broă lơh Dà lơgar; tus bal cri tơrña bơyai tam lah tam ring tàm mpồl bơtiàn. Ồng K’ Hữu kwang bàng sàh Bảo Thuận, càr Lâm Đồng pà gĭt, kra ƀòn neh pơgồp bơnah kwơ màng dong ƀòn lơgar gàr kơ̆ lơngăp lơngai rơndăp tăp sèng, bơt bơtàu rài kis niam chài: “Kra ƀòn ồng K’ Brệp là cau geh bơngă pin dờn ngan mờ geh gơrềng uă ngan tàm mpồl bơtiàn. Bè broă hòi jà làng bol lơh jat gùng dà broă lơh bơt bơtàu ƀòn lơgar pa, ồng geh jơnau đơs, lam lài tàm srơh lơh gùng, lơh dà sàng goh, kơnờm bơh hơ̆ muh mat ƀòn lơgar ngai sơlơ dờng niam, sàng goh, gùng lòt tàm ƀòn niam ngan. Ồng gam tus bal tàm Mpồl duh broă cau jat Yàng bàp Kala mờ gơnoar broă mờ Củ tịc mpồl duh broă, jơnau đơs bơh ồng dê tàm hìu Yàng bàp ƀuơn ngan tus mờ làng bol cau jat Yàng bàp den tàng gùng dà broă lơh bơt bơtàu ƀòn lơgar pa, bơt bơtàu rài kis pa tàm thôn geh lơh jat niam mờ neh lơh geh cồng nha niam ngan”.

Mờ bơngă pin dờn, bơta chài mờ nùs nhơm jơh nùs bơh he dê, kra ƀòn ồng K’Brệp gam sền gàr mờ ngui niam broă lơh ờs mờng bơh kòn cau K’ Ho dê, mờ pơgồp bơnhă lơh tam gơl muh mat ƀòn lơgar thôn Kala Kròt. Ồng di pal là di kơldìng nùs nhơm, là krơh niam nàng oh kòn kòn sau in đòm jat tàm gùng lòt bơt bơtàu ƀòn lơgar ngai sơlơ hờm ram, lơngăp lơngai mờ chờ hờp.